بختيارلار/ نريمان ناظیم

nariman-nazim3
بختيارلار

نريمان ناظیم

شهرين بؤيوٍك پارك‌لاريندان ساييلان «ميللت پاركي» اؤز اوزون عؤمروٍ‌ بويو، جوٍربه‌جوٍر اينسان‌لاري ‌قارشي‌لاييب، اونلارين احوال- روحيه‌سيني، سئوينج و كدري‌نين دؤزوٍملوٍ شاهيدي اولوبدور. اونلاردان كيمي‌سي درد اليندن قورتاريب قاچميش، پاركين بير بوجاغينا سيغينان؛ كيمي‌سي اؤز ايستكليسي ايله بيرليكده بير دينج يئر آراييب آختاريب، شيرين رؤويالارا دالان؛ كيمي‌سي اعتیاد جايناغيندا سيخيليب، يئرسيزليكدن بير گوٍشه‌يه دالدالانيب گئجه‌له‌ين؛ كيمي‌سي گنج‌لييين قانادلي آرزيلاري‌لا كيتاب الينده آغاجلار كؤلگه‌سينده وار- گل ائده‌رك دانيشگاه عشقي ايله اوچوشان، كيمي‌سي… كيمي‌سي… آنجاق هره‌سي بير درده دالان، هر بيري بير رنگه چالان ايديلر…

پاركين بؤيوٍك دروازاسي‌نين يانيندا يئرلشن قوجامان چينار، بير آغ‌ساققال كيمي سانكي باشقا آغاجلارين هنده‌وريندن گلن‌لري قارشيلايير، گئدن‌لري يولا ساليردي.

او گوٍن ايسه بو قوجامان چينار ال- اله وئريب قوشا گئدن بير اوغلان ايله بير قيزين شن‌ليكله گزيشمه‌لريني، بختيارجاسينا اونون قاباغيندان سوٍزوٍب دروازادان چيخمالاريني ايزله‌دي. اونلار دئيه- گوٍله خيياوانا چيخديلار.

اوغلان ايييرمي‌ بئش، ايييرمي آلتي ياشار ايدي؛ اونون ائينينده‌كي قيسا قول ساريمتيل «تي‌شئرت»ين هر اوٍچ دوٍيمه‌سي آچيق ايدي. بوغازيندان آسيلان بويون باغي‌نين آلتين زنجيري ايشيلداييردي. كيبريتي مخملدن تيكيلميش عنّابي دار شالواري اونون آريق و اوزون قيچلاريني داها آريق و اوزون گؤستريردي. او آغ ايسپورت باشماغي‌لا تلسمه‌دن ييرغالانا- ييرغالانا يئريييردي.

قيزين زولاق- زولاق نازيك مانتووا بوٍروٍنموش نومودلو اندامي يولدان كئچن‌لردن باخيش اوموردو. قيز، اوغلان‌لا قول- قولا گئدير، آستا- آستا پيچيلداشير، اونون نسه سؤيلمه‌سيندن نارين- نارين گوٍلوٍردوٍ. بعضن ده دايانير اوغلاني ‌احتيراصلي، چيلغين باخيش‌لاريلا سوٍزوٍب، سونرا باشين اونون چيينينه دؤيه‌رك اوغونوب گئديردي.

اوغلان او بيري الي ايله ايكي ايتين مكسيگيندن توتوب چكيردي. ايتين بؤيوٍيوٍ قولاغي ساللاق، اتلي- جانلي بير تازي ايدي. اونون زيل قارا بويالي دريسي پار- پار پاريلداييردي. بالاجا ايت اوزون و گوٍدك قيچ ايدي. يئرييه‌نده قارني يئرده سوٍيروٍشوٍردوٍ. اوزون قولاق‌لاري اويناقلاييردي. آغيمتيل قيوريم توٍك‌لري اونو امليك قوزويا اوخشاديردي.

اونلارين قاباغينجا ايييرمي- اوتوز آدديم آرالي بير كيشي گئديردي. الينده‌كي بيرزئنت ساكي الدن- اله وئرير، گاهدان بير گئري‌يه چئوريليب بوغوق سسله «گئده يئيين اول»- دئيه، كيمسه‌ني سسله‌ييردي. بو سسي ائشيدجك اون- اون ايكي ياشار بير اوغلان اوشاغي الينده‌كي تورباني دالينا آتير، قاچا- قاچا گئديب، اؤزوٍنوٍ كيشي‌يه يئتيريردي. آمما هله بئش- اون قدم گئتمه‌ميش دؤنوٍب دالا طرف باخيردي. سونرا بير آز گئدير، يئني‌دن دؤنوٍردوٍ. آنجاق ايستر- ايسته‌مز ياواش- ياواش كيشي‌دن آرا آچيب، ايت‌لره ياخين‌لاشيردي. گاه اونلارلا ياناشي گئدير، گاه دا اونلاري آرخادان ايزله‌ييردي. هردن ده بير اليني اوزاديب بالاجا ايتي تومارلاماق ايسته‌ييردي. آمما قارا ايتين ميريلداماسيندان قورخوب گئري چكيليردي. اوع بو ايشه دؤنه – دؤنه جان آتير، آمما ايتين چيخيريغي اونو اوغورسوز قويوردو.

بير آن اوشاق داياندي، سونرا سئوينجك چؤمبه‌ليب، الينده‌كي پيلاستيك تورباني قوردالاييب بير تيكه چؤره‌ك چيخارتدي. قاراش- قاراش- دئيه چؤره‌يي ايته ساري اوزاتدي. ايت ايسه اونو سايمادي. موچ- موچ ائله‌ييب چؤره‌يي ايتين قاباغينا آتدي. ايت چؤره‌يي ايي‌له‌دي، آمما يئمه‌دي.

اوشاغين اوٍزوٍنه كده‌ر چؤكدوٍ. قارا ايت اؤزوٍنوٍ قيزا ساري وئردي. اونون قيچينا ساري سوٍرتوٍشوٍب كوٍچوٍك‌لنمه‌يه باشلادي. قيز ايته دوغرو دؤندوٍ. اليني اونون باشينا چكير، «ائي وآآ… نه نازدي بووو»- دئيه، اونون ايكي قولاغيندان ياپيشيب اؤزوٍنه ساري چكدي. اوشاق تعجّوٍبله قيزي سوٍزدوٍ. قيز ايتين كمسييين اوغلاندان آلدي. اينديسه ايتين بيري بو الدن، بيري او الدن گئديردي.

اوشاغين قيريشيغي آچيلدي. گؤزلري گوٍلدوٍ. او فوٍرصتي فؤوتا وئرمه‌ييب؛ قانوو قيراغي ايله بالا ايته ياخين‌لاشدي؛ آمما اوغلانين ايتي باخيشيندان چكينه‌رك يئنه ده ايت‌دن آرا آچدي.

كيشي‌نين «گئده، يئيين اول!» سسي يئني‌دن ائشيديلدي. اوغلان ايكي كؤنوٍل‌لوٍ‌ اولان كيمي بير كيشي‌يه طرف، بير ده ايته باخدي. سانكي سون دفه اولاراق بير داها ايتي تومارلاماق ايسته‌يي ايله تله‌سيك ايته ياناشدي.

هامان لحظه‌ده قارا ايت بيردن- بيره اونون اوٍستوٍنه سيچرادي. كمسيك قيزين اليندن چيخدي. اوشاق قانوودان آتيليب خيياوانا ساري قاچديقدا، يوخاري باشدان گلن ماشين اونو حاخلادي. بوق سسي، سونرا تورموز قيژيلتي‌سي ائشيديلدي… موٍسافيرلر ماشين‌دان يئنيب اوشاغا طرف قاچديلار؛ سوٍروٍجوٍ ايسه «آخ‌‌خ…» دئيه‌رك، ايكي الي ايله گؤزلريني اؤرتوٍب باشيني فرمانا سؤيكه‌دي.

سوٍروٍجوٍ بير نئچه لحظه او حالدا قالدي، سونرا جاماعاتين‌هاي- كوٍيوٍندن اؤزوٍنه گلميش كيمي ماشين‌دان يئنيب، قيچ‌لاري دالينجا سوٍروٍنه- سوٍروٍنه اؤزوٍنوٍ صحنه‌يه يئتيردي. جاماعاتي ياريب، اوشاغا باخان كيمي ايكي الي ايله باشينا دؤيوٍب «واي‌ي…»- دئيه يئره چؤكدوٍ.

اوغلان اوجادان بیر فيشقا وئريب چيغيردي:«Blacky!!». ماشينين سسيندن هوٍركن قارا ايت سسه دوغرو دؤندوٍ. اوغلان قاچيب اونون كمسييين توتدو. قيز اؤزوٍنوٍ اوغلانا يئتيريب، تعجّوٍبله سوروشدو «ائوآآآ… نه اولدو؟». اوغلان «نه اولاجاق ايدي، حامبال اوغلو حامبال، آز قالميشدي Blacky –ني اؤلوٍمه وئرسين»- دئيه، قيزين قولوندان ياپيشيب چكدي. سونرا يوٍيوٍروٍب قانوو قيراغيندا دوٍشوٍب قالميش برزئنت ساكا بير تپيك ووروب، قيزي داليجا چكه‌رك بوروغو بورولدو.

بالا واي- دئيه اينيلده‌ين آتانين آرزولاري «بختيارلار»ين‌هارين-‌هارين گوٍلوٍش‌لرينده بوغولوردو. اوشاغين اوٍستوٍنه آغ پرده چكيلديكده گؤي اوٍزوٍنوٍ سانكي قارا بولودلاراؤرتوٍردوٍ.

قوجا چينار يئنه ده دونوخوب قالميش نظره گليردي…

Check Also

سویوق اوره‌ییمدن بئینیمه یوکسه‌لیر / سید رضا حسینی مرند

سویوق اوره‌ییمدن بئینیمه یوکسه‌لیر سید رضا حسینی مرند قار یاغیردی. ماشین سس‌سیزجه خیاباندا ایره‌لی‌له‌ییردی. سوروجو ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *