آلاچیق، گؤزل گؤرکمی ایله سانکی باش قالدیریب اللرین قوینونا آلارکن داغلارا باخیب، گؤیلره سورتوشونده، قالانمیش اودون رقصه گلن قیغیلجیملاری، سانکی آتش، اویون هاواسی چالدیریر دئیه، تره‌کمه‌یه باشلامیشدی. قوجا کیشی، موسی دوستومون قوهوملاریندان بیریسی و قوجا بیلی (qoca bəyli)ائلیندن ایدی.
ایلین بو گؤزل واختیندا گلیب یایلاقلاری گزمه‌ییمیزی و دولاشماغیمیزی، خوش‌گلدین دئیه‌رک، گؤزل قارشیلامیشدی و ایندی آخشام چاغی اودون قاباغیندا، قیزیل قان رنگینی یامسیدان دملنمیش چایلارین اینجه بئل ایستکان لارا سوزولمه‌سینه بیرگه باخیردیق. گؤزل سؤزلر گئدیردی. سؤزلر ایندیلیکدن باشلاییب کئچمیشلره و حتی اسکیلره اوزانیب یاشلی کیشی‌نین دیلیندن آچدیم صاندیغی توکدوم پانبیغی سؤزونو ائشیتمه‌مه‌یه قدَر داوام ائتدی. ساوالان اته‌یی‌نین یایلاقلاریندا سو جوشان کیمی سؤز جوشور. چوخ زامانلار آدین ائشیدن کیمی منی باشقا دونیالارا گؤتورن “آت گؤلو”نون آدی خیالیمدا دینج قالماییب و هئی بینیمده جانلاناراق آغزیمدان چیخماق ایسته‌ییردی و سونوندا بو آدی سؤیله‌دیم و قولاقلاریم بو تلَسگن و بیر یئرده قالمایان سؤزو ائشیتدی . بو سؤزو سؤیله‌ین کیمی اودون بیر آنلیق دورماسینا و حتی سسیمین اوجالیب داغلاردان – داشلاردان بئله ترس صداسی گلمه‌سینه اینانان کیمی اولدوم. اوشاقلیق چاغلاریندا گئجه‌لر گؤردویوم او قیرمیزی مینجیقلار کیمی.
یاشلی کیشی بو سؤزو ائشیدن کیمی هر سورغونون جوابین بیلن بیر بیلیجی معلیمه تای درین بیر نفس آلیب گؤزلری پارلادی.
-سنجه اوجا داغلار باشیندا بیر گؤلون آدی نه‌دن آت گؤلو اولا بیلر؟
-منجه بو بیر حیکایه‌دن قایناقلانا بیلر.
-سنجه حیکایه‌لر دوغرودور مو؟
-منجه دَییشیلیب باشقا واریانتلارا دؤنسه ده نه‌دن‌سیز بیر حیکایه اولابیلمز.
یاشلی کیشی سویله‌دی: “آتام یوز اییرمینی یاشامیشدی آتاسی دا ائله جه ، منیم ایسه سکسن بلکه ده دوخسان یاشیم اولا اولمایا. یایین اورتا آیلاریندا بیر گئجه وار، یوز ایللرجه بوندان قاباق آدلیم اولان بیر گئجه. او بیر گئجه ده منیم آتا – بابالاریم بو گؤلون هنده‌ورینه گلیب قلبی(بیر آز هوندور) بیر یئرده دورارمیشلار. گئجه یارینی اؤتنده اوزاقلاردان چاپاغان بیر آتین کیشنه‌مه سسی گلرمیش، گئتدیکجه بو سس اوجالیب و گولوو اؤتن بیر آتین چاپماق سسی گلیب، اؤزو گؤرونمه‌دن فینخیریب کیشنه‌ییب دیرناقلاری‌یلا یئری ائشیب سویو لپه‌لندیریب، چاپارکن اوزاقلاشارمیش. بو آتا، گئجه‌نین قارانلیغی کیمی گؤزه گؤرونمه‌دیینه گؤره “قارا” دئیرمیشلر. بیر آسلان و باهادیر ساواشچی‌‌نین آتی ایمیش. قنیملر او باهادیری توتوب آما آتینی توتا بیلمه‌میشلر. آت او قنیملرین قوماراسیندان قاچاراق داغلاردان داشلاردان کئچیب بو گؤله یئتیشر و اؤزونو قنیملرین قوماراسیندا گؤرن کیمی اؤزونو گؤله تاپشیریب، سولارین ایچینده گؤزدن ایتر………
بو قدَر آغیر و اینانیلماز سؤزلری ائشیدن کیمی سانکی یوخو گؤرورم سسلندیم:
-او باهادیرین آدی نه ایمیش؟
یاشلی کیشی گولومسه‌دی:
-یئنی‌یئتمه‌لر اونا بابک دئییرلر ….
یای۱۳۹۱
یک پاسخ
من شاهسون و قوجابیلی الیندنم. بو هیکایه بو شکیلده بیز دییلیب. آما او آت آق آپپاق سؤت کیمین و اؤزؤده خیزیر پیغمبر ین آتی ایمیش دیه بیلدیریبلر.
ساولاندا ایکی مقدس حیواندان سؤز اولور ، ایکیسیده گؤزه گؤرؤنمه ین. کیشنین سؤت آق بیر آت و بوزلویان سؤت آق بیر مایا .
(بوزلاماق = دوغماق واقتیندا حیوانلار دان چیخان سس، مایا = بیر نوو دیشی دوه))