Friday , 31 October 2014 / جمعه , ۹ آبان ۱۳۹۳
یئنی خبرلر

منی قوجاقلا آنا/ مقصود تقی زاده هریس (نیسگیل)


منی قوجاقلا آنا
مقصود تقی زاده هریس (نیسگیل)

کندلی بیر قیزین دیلیجه آناسینین مزاری اوسته

 قیرخین یئتیشدی آنا

مزاریوا گلمیشم

سنسیز نه قرار تاپیب،

نه یاتیب دینجلمیشم!
×××

قوش کیمی اوچدون گئتدین

یووامیزا سئل گلدی

ائویمیزین یئرینده

آغ چادیرلار دیکلدی!
×××

کنده گلن چوخ اولدی

آه…آنا گؤرمه دین سن

یایینا بیلمیردیم هئچ

دوربونلرین گؤزوندن.
×××

توز النمیش باشیما

سیغال چکن چوخ اولدو

آنجاق یالان وعده لر

اوره ییمه اوخ اولدو!
×××

اوچوق کندیمیز اولدو

ماشینلارین اویلاغی

بیری منه پول وئردی

بیری وئردی قولچاغی.
×××

بونلارین هئچ بیریسی

توختاتمادی یارامی

سنسیز گوله بیلمیرم

کده ر قیریب چارامی.
×××

آتام دئییر:آغلاما!

هئی منی قوجاقلاییر

آمما اؤزو گیزلیجه

هؤنکور- هؤنکور آغلاییر.
×××

ائولر اولوب یئرله بیر

دارما- داغیندی یوردلار

قورخورام،چئوره میزده

گئجه اولاشیر قوردلار.
×××

بیزله قانشار چادیردا

اوخشاییر سونا خالام

دئییر: هایاندا قالدی

منیم قارا گؤز بالام؟!
×××

غملر «پری» عمه مین

دؤزومون الدن آلیب.

اونو تانیماق اولمور

سانکی قیرخ ایل قوجالیب!
×××

چادیرلارین بیریندن

سس گلر آخشام- سحر

او قونشوموز «گولناز»دی

اوخشاییب بئله سؤیلر:

“عزیزیم باکیم آغلار

شیروانیم شکیم آغلار

سن اؤلدون من آغلادیم

من اؤلسم به کیم آغلار؟!”
×××

قیرخ گون گلیب سوووشدو

قیرخ گون دئمه، قیرخ ایلدی.

نه ییغیلدی چادیرلار

نه ده ائولر تیکیلدی!
×××

داغلارا دومان چؤکوب

قورخو آلیب قلبیمی

آنا اؤزون دئمیشکن:

“قیش گلیر قیلیج کیمی!”
×××

چادیردا دؤزمک اولماز

قار- کوله یه، بورانا

یامانجا اوشویورم

منی قوجاقلا آنا…!

۲ نظر

  1. سلام یازنتلارین یاخجیدی .ساغول همسایا

    Like or Dislike: Thumb up 0 Thumb down 0

  2. یاشاسن نیسگیلی. دارخدردی شعرین منی

    Like or Dislike: Thumb up 0 Thumb down 0

جوابی بنویسید

ایمیل شما نشر نخواهد شدخانه های ضروری نشانه گذاری شده است. *

*

شما می‌توانید از این دستورات HTML استفاده کنید: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>

بالا