قاراداغ
ع. یالچین

اوجاق سؤنوب کول اولسادا

یئنه یاناجاق- یاناجاق

ائولر یئرله بیر اولسادا

قالخاجاقدیر اویماق- اویماق

باشین ساغ اولسون قاراداغ!
***

چوخ گؤرسنده سازاق، بوران

آلچالمادین هئچ بیر زامان

سوفرنده‌کی تامدان دادان

دؤنوک چیخیب، اولسادا آغ

باشین ساغ اولسون قاراداغ!
***

کیم قینادی، کیم قارغادی

بئله سئویندیردی یادی

خوش گونلرین قاباغدادی

بولود اول شیمشک کیمی چاخ

باشین ساغ اولسون قاراداغ!

***

سهنده باخ، آیاغا دور

ساوالان قول- قانادیندیر

دردینی بوغ، غمی یاندیر

ملهمیندیر آنا تورپاغ

باشین ساغ اولسون قاراداغ!
***

دیل- دیل اؤتر اوغول‌لارین

قهرمانلیق ناغیل‌لارین

سؤز ثروتین، صنعت وارین

خزینه‌لر یاراداجاغ

باشین ساغ اولسون قاراداغ!