او منی چالدی گئتدی / مسعود آذر

او منی چالدی گئتدی
مسعود آذر

آی جاماعات دادا یئتین،
شاهید اولون،
او منی یاردی گئتدی!
یاریمی‌چاپدی گئتدی!
یاخشی باخین، یاریمی‌یوخ
یاری چره‌کیمی‌قوپاردی گئتدی!

هئی
هئی
هئی
دایان گؤروم قارداش،
آیاق ساخلا!
بیرآز یاواشی!
هارا بئله تلسیک باش آپاریرسان؟!
یوخسا دؤشووون دیبی یانیر؟!
سؤیله گؤروم
سنی کیم پئشنگ ائله‌دی، منی سالدین قئیغانا؟
یئنه ال وئرمه‌دی دوشدون جیغالا؟!
دوستوم
بیز بئله دانیشمامیشدیق!
یادیندا وارسا،
بو داغی بیرگه باشلادیق چیخماغا،
بیرگه یوللاندیق،
بیرگه دیرماشدیق قایالارا.
بو یولدا دفعه‌لرله توللاندیق،
یارالاندیق،
کندیرلرده پاندول اولوب توولاندیق،
آنجاق بیرگه یاشادیق…
ایندی ایسه یورولموسان،
دؤنمک ایستیرسن؟!
سؤزوم یوخ،
بیرگه دؤنمه‌لییک.
ساده‌جه
من بو ظارافاتی دوشونمورم آخی!
بو ایشه ده دؤزه‌ن دئییلم،
سن ده گل ساتاشما منه!
دور شله‌نی گؤتور، دوش یولا!
من اؤزوم تؤوشه‌ییرم،
یوکینی ده چاتما منه!
باخ؛ دده‌م اوغلو،
قاش قارالیر، گئجیکریک،
یوبانیب قارانلیغا دوشه‌ریک.
خسته‌سن قارداش؟
یورولموسان؟
اوزولمه!
قولونو سال بوینوما،
بیر ته‌هر گئده‌ریک.
یوخ، یاتماق ایسته‌ییرسن‌سه،
یات، باشینی آلیب دیزیم اوسته،
سحره قده‌ر تومارلارام ساچلارینی،
یا سن اویانارسان،
یا دان‌اولدوزو گولر حیاتا.
۲۳ دی ۹۶

Check Also

بیر اوووج شیفره‌دن عیبارتم/ افراسیاب نورالهی

بیر اوووج شیفره‌دن عیبارتم افراسیاب نورالهی بو منیم بانکا کارتیمین شیفره‌سی…… بو یاناجاق کارتیمین …… ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *