کؤلگه یاخینلیغیندا ۵/ نیگار خیاوی

کؤلگه یاخینلیغیندا ۵
نیگار خیاوی

دئییرم چیخیم شهرین میلیونونجو گؤی‌ده‌لنینین دامینا سؤیله‌ییم می‌گؤرن؟
سؤیله‌ییم می‌آناما
قارداشلاریمی‌گئجه گؤزونه ساعاتین صفه‌سیندن بیر بیر سیلیب سوپورورلر
سؤیله‌ییم می‌بیری قلبیله انتحار ائدیر
بیری بئینیندن ایدزه توتولور
بیری او بیرینی، اؤزونو، قیرمیزی کندیرینی گیردکان آغاجینا آسیر‌
دئییم می‌گؤرن قیزینی بو گون شهرین زئرزمیسینده گؤردوم
بیر یئنی انتحار آختاریرکن؟
گؤرن دئییم‌می‌گئتدیلر باجیلاریم فله‌یین کؤهنه بورجونا ؟
و قادینلیق گودازینا؟
دئییم‌می‌آلمانین سئوینجینی نئجه الیمین چوخوروندا قویلادیم
و قار دنه‌لریله ال اله وئریب‌هارایا گئتدیم
دئییم می‌گؤرن شعریمین شیریملاریندا کیملرله سئویشمه‌دیم
جانیمین جیریقلاریندا وئرانابادلار وئرانابادلار وئرانابادلار تیکدیم
سونرا پاییز گلیب سحر-سحر ساچلاریما تؤکولدو
آناما دئییم‌می‌گؤرن جنازه‌سی قالمیشدی الیمیزده
کی قبرینه یئر تاپانمیردیق قبریستاندا
سونرا سیچانلارا گیلئیلنیردیم،
سونرا دریمین آلتیندا سیچان سیچان سیچان اویناقلاییردی
و هئچ کیم شهره یئنی قبریستان دوزلده بیلمیردی
هامیسینی بونلارین دئیه‌جم آناما
آتامین قاپیسینی تاپا بیلسم اگر.
تبریز/۹۵

Check Also

قاییتماز اولدو/ بهروز دولت‌آبادی(چای اوغلو)

قاییتماز اولدو بهروز دولت‌آبادی(چای اوغلو) چوخ صفالی، چالیشقان، آزادلیق وورغونو ده‌یرلی دوستوم «سیفی»یه اتحاف. نئجه ...

One comment

  1. حسین امکانی

    نیگار خانیم الینیزه قلمینیزه و دویغونوزا ساغلیق، هله ده سیزین چئویردیگیز توپ و بیل عزالیلاری رومانلارینین اتمسفری بئینیم دن چیخماییب، حاققینی وئره رک بو امه گی وئریبسیز. یازدیغیز شعر رئال لارین دویغولو اؤیکوسودور.

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *