سنسیزلیک‌لر(۲۷) / مجتبی نهانی

سنسیزلیک‌لر(۲۷)
مجتبی نهانی

(۱)
نه قورشون
نه یارا
نه قان
آغریمی‌بیله تاپانمیرام
بئله وورغون دوشموشم کی سنه
آغزیمیدا آچانمیرام…

(۲)
آنلیمین تاسی
دوشدو یئره
یا بیر یا آلتی نه فرق ائدهر-
گؤزلریم سنه باغلانماسا…

(۳)
دار بیر کوچهده
وورغون دوشدوم سنه
آدین حیات قویدولار…

(۴)
هاوا دومانلیدیر
بیزیم تبریزیمیزده
ائله ازلدن بری
ایستهسم گئدهم-
چیخمازا گلر هر زامان

(۵)
یوخلوغون
بوتون شههری بورودو اؤزونه
یوللار بؤلوندو
آیریلیق یاییلدی هر یئره
هارالارا قاچیم
آیاقلاریمین آلتی بوشالدی-
سون باخیشیندان
گئتمهییم چیخمازا گلدی

(۶)
یاشامین دؤشون اَمیب،
توپوردون می‌هئچ
ایلک یالاماقدی ایستهیین
ایشینه گلمدییینده
یئمهیه باشلادین-
اوجوندان، دیبینه قدهر…
آی اوغلان نئجه بیتیردین-
بو گؤزلیم چاتلامیش دویغویو

(۷)
دَلی آختارما
آی منی، مندن ایتگین سالان
گونبهگون
سنی سئودیکجه
وورولموش بئیینلرین آراسیندا
دَلی‌لنیرم…

Check Also

قاییتماز اولدو/ بهروز دولت‌آبادی(چای اوغلو)

قاییتماز اولدو بهروز دولت‌آبادی(چای اوغلو) چوخ صفالی، چالیشقان، آزادلیق وورغونو ده‌یرلی دوستوم «سیفی»یه اتحاف. نئجه ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *