بو اوجا یئرلر/ انصار قاراداغلی

بو اوجا یئرلر
انصار قاراداغلی

گؤیلر یامان بیزی داریخدیراجاق
بیر اولدوز اوجا بوی، بیر اولدوز آلچاق
دونیانین ‌گؤزلری دونیایا آنجاق
بیز تک گیپریک چالیب تاماشا قیلمیر!

بو اوجا یئرلرده دیار با دیار
آللاهین اؤزونون کؤهنه‌لییی وار
‌گؤیلر ساعاتییلا چاتاندا ناهار
مین تیکه توتوروق، بیر آللاه آلمیر!

عالم، بیر سئوگینین ایکی خط سؤزو
او خطی سئچنمیر هئچ نه‌یین ‌گؤزو
اؤلن دونیالارین توستوسو، توزو
حتی بیر شکلین ده ذهنینده قالمیر!

بیر یول ائله تومموش اؤز ایزلرینه
‌گؤز آچیر گئجه‌نین گوندوزلرینه
داریخیر ‌گؤیلرین او اوزلرینه
قولاق دا یاتیردیر، سس -سوراق آلمیر!

بو تؤر-تؤکونتولو ‌گؤیلری بیر قیز
ییغیب -ییغیشدیریر، باخ ، اولدوز-اولدوز!
هانسی خاقان اوچون، شاه اوچون کنیز؟
نه ساچی آغارمیر، نه ده قوجالمیر!
۹۶/۹/۲۵

Check Also

قاییتماز اولدو/ بهروز دولت‌آبادی(چای اوغلو)

قاییتماز اولدو بهروز دولت‌آبادی(چای اوغلو) چوخ صفالی، چالیشقان، آزادلیق وورغونو ده‌یرلی دوستوم «سیفی»یه اتحاف. نئجه ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *