آذرین ییرمی بیری/ سحر خیاوی

آذرین ییرمی‌بیری
سحر خیاوی

سازاقلی بیر گون ده تبریز شَهَرین
گزیرم یادین‌لا دولان با دولان.
سن اولدون آنا دیل، وطن سئوگیسین
دویغو اللرین‌له کؤنلومه سالان.

ساری امنیّته گومولوبدو وای
چیرتمک ووور دیکسینسین پنجره‌م یئنه!
کؤنلومون سئرچه‌سی نه یامان اویوب
بو کور تَله‌لره، سپیلمیش دَنه!

نئجه من سئوینجدن، سئوگیدن یازیم؟!
دوغرانیر دیلیمده آنامین دیلی.
ساهات قاباغیندان کئچن زامانی
اییلیر ایچیمده آتامین بئلی.

برنوولار شاققیلدیر افسرلر دوشور،
قار اوسته سورونور گول یاناقلاری.
آغ- آپباق کؤینک‌لر قانا بورونور
بالتالار دوغراییر گول بوداقلاری.

نئجه عارسیز یازیم ساری سئوگیدن؟!
گولله -گولله یانیر اوره‌ییم باشی.
گؤردوکجه بو شاهید سؤیودلری من
کسمه‌دن تؤکولور گؤزومون یاشی.

یانیلیر تورکجه کیتابلاریمیز،
آذرده قور چکیر ایچیمدن منیم.
کیتابلار آلیشیر کلمه به کلمه
یوخسا سئللول – سئللول بدنیم منیم؟!

بیر ایل ده قورولموش شانلی سرگینی
خزان تئز سوووردو، آپاردی کولک.
قویمادی دویونجا بیر تامسیناراق
بو دیلین، بو ائلین شانینی گؤره‌ک.

سئوگیلیم باغیشلا، باغیشلا منی!
من سنه یارایان یولداش اولمادیم.
اکدینسه قلبیمده گول چیچکلری
بو باغا وفالی باغمان قالمادیم!

آذرین بو غملی سازاقلی گونو
ییرمی‌بیر گولله‌یله کؤنلومو یاخین!
سوچلایین، هوولایین بو غیرتسیزی
آسیلمیش گؤوده‌مه ال چالین، باخین!

Check Also

قاییتماز اولدو/ بهروز دولت‌آبادی(چای اوغلو)

قاییتماز اولدو بهروز دولت‌آبادی(چای اوغلو) چوخ صفالی، چالیشقان، آزادلیق وورغونو ده‌یرلی دوستوم «سیفی»یه اتحاف. نئجه ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *