چئویرن: ایشیق
ترجمه: ایشیق
ایشیق

آذربایجان ادبی- مدنی درنک‌لری‌نین زلزله فاجعه‌سی مناسبتیله وئردیگی همدردلیک بیاننامه‌سی

 آذربایجان، باشین ساغ اولسون!

 یئنه‌ده، دوغما تورپاغیمیزین باغرینی، یئر ترپنمه‌سی یاردی؛ پالچیق دام‌لار اوچولدو؛ یوخسول ائولر ییخیلدی؛ یورد- یووالار داغیلدی؛ کندلردن بیر چوخو تورپاغا قاریشدی؛ اوچقونلارین آلتینداکی باغیریش‌لار, اینیلتی‌یه چئوریلدی و سوسدو. یئر- گؤی حشیر چکدی؛ کند – شهرلریمیزی قورخو بورودو؛ اوره‌ک‌لر سارسیلدی؛ گؤز یاش‌لاری آل قان اولدو؛ سؤزلر یاندی؛ آذربایجان یاسا باتدی:

اود یوردو یاندی، قوورولدو

کولو دونیایا سوورولدو

یوردوموزا اولان اولدو

وطن داغلاندی- داغلاندی

بو میللی فاجعه‌نی دویان‌لار‌ دا اولدو، دویمایانلار دا؛ دویوب اوست- باستیر ائتمه‌گه چالیشانلار دا؛ خبری ائشیدیب، قولاق آردینا ووران‌لاردا. گئجه سحره جن اوچقون‌لار آلتیندا اؤلولری، یارالی‌لاری چیخاردانلاردا اولدو. بو بیزی جاندان اوساندیردی:

گؤیدن آخدی او اولدوزلار

گئجه‌یه دؤندو گوندوزلر

قانا باتدی چؤل‌لر – دوزلر

وطن داغلاندی – داغلاندی

بیز، آذربایجان ادبی- مدنی درنک‌لری انسان سئور، وطن سئور، ائل سئور انسانلارا اوز توتاراق، اونلاری یاردیما چاغیریریق و اینانیریق کی شرفلی انسانلار بو فاجعه‌دن ضرر چکن وطنداشلاریمیزا، اؤز مادی و معنوی یاردیملارینی اسیرگه‌مه‌یه‌جکلر.

ائل‌لر بیزه درمان وئرین

اومید یوخسا گومان وئرین

کؤنول سسلی کمان وئرین

وطن داغلاندی- داغلاندی

بیز، بو آجیناجاقلی فاجعه‌نی اؤز فاجعه‌میز سانیریق؛ دردلی‌لرین دردینه اورتاق اولوروق؛ عزیزلرینی ایتیرن‌لره باش ساغلیغی وئریریک؛ یارالی‌لارا ساغلاملیق، یورد- یوواسی داغیلمیش‌لارا دؤزوم و بؤیوک خالقیمیزا اؤلمزلیک دیله‌ییریک و آدربایجان، باشین ساغ اولسون! دئییریک.

×××

  • آذربایجان ادبیات اوجاغی – تهران
  • ایشیق سایتی(آذربایجان ادبیات و اینجه صنعت سایتی) – تهران
  • یئنی تبریز ادبی انجومنی – تبریز
  • چنلی تئل ادبی انجومنی – میانا
  • قاراداغ ادبی انجومنی – تهران
  • شیدا ادبی انجومنی – شهریار
  • صابر ادبی انجومنی – تهران
  • ساهر ادبی- مدنی درنه‌یی- تهران

یئنی امضالار:

  • نباتی ادبی انجومنی – شهریار
  • دده قوربانی ادبی انجومنی – تهران
  • انجمن ادبی صبا – مشهد
چاپ

3 پاسخ

  1. موسیقی چیلریمیز ایچینده، قاراداغ زلزله سینه ایلک آغیت آشیقلاردان گلدی.آشیق قوربان علیار بوگون ۲۳/۵/۱۳۹۱ تاریخینده اورمونون آشیقلار درنگینده اؤز شعری ایله بیر نیسگیللی منصوری هاواسینی ایفا ائتدی.

    آشاغیدا اولان لینکدن ائندیرین……

    http://s3.picofile.com/file/7468847953/Mon_Aug_13_175040_2012.amr.html

    گنج آشیقلار….

  2. باش ساغلیغی و چاغری

    اولو یارادانین آدی ایله

    ((من اصبح و لا یهتم بامور المسلمین فلیس بمسلم)) پیغمبر(ص)

    آخشامی مسلمانلارین ایشلرینه چالیشمایاراق صبح ائدن، مسلمان دگیل.

    قاراداغ ماحالی ورزیغان بخشی

    شیرین دیللر ایله خاطرلا منی

    هر زامان قلبیمده دولانیر نقشی

    آچان گوللر ایله خاطرلا منی

    آشیق ائلینکی دیر، ائل آشیغیندیر. ائلینده غمی آشیقلاریندیر.

    یوردوموزون گوللو چیچکلی بؤلگه سی و قهرمانلار دیاری اولان، قاراداغین زلزله خبری و اورادا اوز وئرن فاجعه لر بیزی ده سارسیتدی.اوزونتولرله بو اولایدا نئچه یوز نفر حیاتین ایتیریب. نئچه مین نفرده یارالی اولاراق، یوردوموزون مختلف شهرلرینده اولان خسته خانالارا یئرلشدیریلیبلر.

    بوتون وطنداشلاریمیزی، اؤزللیکله هنر و اینجه صنعت دونیاسیندا چالیشانلاری بو آغیر حادثه نین آجیلارینی قالدیرماغا چاغیریریق.انشاء الله وطنداشلاریمیزین یاردیملاری ایله بو حادثه نین آجیلاری آرادان تئزلیکله قالدیریلار.

    مادی یاردیم چاغری لاری ایله بیرلیکده ائلیمیزی، یارالی اولاراق خسته خانالاردا یاتان وطنداشلاریمیزی یاد ائتمگه چاغیریریق. مختلف شهرلرده غریب اولماسینلار دئیه و معنوی دستک اوچون اونلارلا گؤروشوب، دردلرینه اورتاق اولماغا چاغیریریق.

    بورادان زلزله دن ائتگی لنن یوردداشلاریمیزا بیلدیرمه لی ییک، ۱۱۰ نفر غربی آذربایجان آشیقلار درنگی­ نین اویه لری سیزین یانینیزدادیر و سیزین اوچون اللریندن گلنلری اسیرگمه­یه­جکلر.

    آللاهدان اؤلنلره رحمت، قالانلارا دؤزوم و یارالیلارا شفا دیله ییریک. تانری یاردیمچیمیز اولسون.

    غربی آذربایجانین آشیقلار درنگی

    ۲۳/۵/۱۳۹۱

    ـــــــــــــــــــــــــــــــــــــــــــــــــــــــــــ

    ـــــــــــــــــــــــــــــــــــــــــــــــــــــــــــــ

    ـــــــــــــــــــــــــــــــــــــــــــــــــــــــــــــــــــــــ

    اهره هئریزه ورزیغانا گل

    طبیعت یئنه ده شیلتاقلیق ائتدی

    اهره هئریزه ورزیغانا گل

    زلزله باتیردی ائلی اوبانی

    طبیعتین الی باتدی قانا گل

    اهره هئریزه ورزیغانا گل

    ***

    سهندله ساوالان گئیسین قارانی

    چونکو یاسا باتیب داغی آرانی

    آللاه کیم ساریسین بئله یارانی؟

    طبیعتین الی باتدی قانا گل

    اهره هئریزه ورزیغانا گل

    ***

    هارایا امدادا چاتانیم گلسین

    ییخیلان قولوندان توتانیم گلسین

    وارینا گومانی یئتنیم گلسین

    طبیعتین الی باتدی قانا گل

    اهره هئریزه ورزیغانا گل

    ***

    اوغلو الدن گئدن آنا آغلاییر

    آناسین ایتیرمیش بالا آغلاییر

    آشیق قوربان چکیر نالا آغلاییر

    طبیعتین الی باتدی قانا گل

    اهره هئریزه ورزیغانا گل

    آشیق قوربان پورولی علیار- اورمو

    ۲۲/۵/۱۳۹۱

  3. سلام. ادبی- مدنی درنکلرین کناریندا گلین انفرادی اولاراق بیز یازیچیلار – شاعیرلر و آذربایجان یوردونون عاشیقلری انفرادی صورتده ده آذربایجانا باش ساغلیغی وئره ک. بیزیم صاف اوره کلی قاراداغلیلاریمیز بو ضایعه ده جوخ آغیر ماتمه اوغراییب لار. گلین هامیمیز بو یازینین آردیندا کامنت یازماقلا اوزوموزون گوجوموزو گوستره ک. آللاه اولنلرین هامیسینا رحمت ائله سین.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

آذربایجان ادبی- مدنی درنک‌لری‌نین همدردلیک بیاننامه‌سی

ایشیق
www.ishiq.net

آذربایجان ادبیات و اینجه‌صنعت سایتی

آذربایجان ادبی- مدنی درنک‌لری‌نین همدردلیک بیاننامه‌سی

ایشیق
www.ishiq.net

آذربایجان ادبیات و اینجه‌صنعت سایتی

آذربایجان ادبی- مدنی درنک‌لری‌نین همدردلیک بیاننامه‌سی

ایشیق
www.ishiq.net

آذربایجان ادبیات و اینجه‌صنعت سایتی