«موغان اوغلو»نون مزاری باشیندا خاطیره ییغینجاغی تشکیل ائدیلدی

«موغان اوغلو»نون مزاری باشیندا خاطیره ییغینجاغی تشکیل ائدیلدی

موغان ماحالی‌نین گؤرکملی شاعری «بختیار علیمرادی(موغان اوغلو)نون اؤلومونون ایل دؤنومونده قلمداشلارینین اشتراکیلا مرحوم شاعریمیزین مزاری باشیندا خاطیره ییغینجاغی تشکیل ائدیلدی. بو ییغینجاقدا موغانین یازیچی و شاعرلری بیر ایل بوندان اؤنجه سیرالارینی ابدی‌لیک ترک ائتمیش قلمداشلاری حاقیندا بیر داها اوره‌ک سؤزلرینی دیله گتیردیلر و اونودولماز آذربایجان شاعرینین خاطیره‌سینی عزیزله‌دیلر. ییغینجاقدا موغانین تانینمیش شاعر و یازیچیلاریندان اوستاد میرجلیل حسینی(سید)، همت شهبازی، بهروز صدیق، اسماعیل خرمی، قوجا موغانلی، میرجمال اینجیک، پریسا حیدری، مینا محتشمی، زهرا پاسبان، مالک رهنما، فرامرز دهقان، توحید نامور، یونصور شجاعی(ائل سئون)، ائل سسی، عربلی، برات اناری و باشقالاری اشتراک ائتمیشدیلر.
«بختیار علیمرادی(موغان اوغلو) اوچ جیلدلیک «آی ساوالان» منظومه‌سیله و «شاعر اوره‌ییم» و «عؤمرومون آغاجیندان بیر یارپاق» آد‌لارینداکی ایکی شعر مجموعه‌سی‌له آذربایجان مقیاسیندا ادبی شهرت قازانمیش، ۱۳۹۵ینجی ایلین آذر آیی‌نی ۲۴نده ۵۵ یاشیندا ابدی‌لیک اولاراق آرامیزدان کؤچموش و دوغما کندینده تورپاغا تاپشیریلمیشدی. اؤلومونون ایل دؤنومو موناسیبتیله مزاری باشیندا تشکیل ائدیلمیش خاطیره ییغینجاغیندان شکیل‌لرله برابر، یازیلمیش ایکی اوره‌ک سؤزونو سیز حؤرمتلی اوخوجولارا تقدیم ائدیریک:

نئجه ده اعتبارسیزدیر بو حایات!!! / میرجمال اینجیک

نئجه ده اعتبارسیزدیر بو حایات!!! سانگی دونن ایدی! سانکی او قارلی آیریلیق گونو بیر نئچه ساعات اؤنجه ایدی!
دوغوردانمی‌بختیاریمیزی ایتیردیک!؟ گؤره‌سن بو ابدیت آدلانان یوخلوق، اؤز آجی قانونو-ایله ان سئویملی انسانلاری، تئز- ائرته ایکن حایاتدان بیر چیچک تک قوپارماقلا نه دئمک ایسته‌ییر؟ اولمایا داهی شاعیر «ممد آراز»ین (دونیا سنین – دونیا منیم – دونیا هئچ کیمین) شعیرینی بؤیله قدارجاسینا تحلیل ائدیرمی‌بو ابدیت!؟
هر نسه بو ابدی آیریلیغین آجی حقیقتی، بیر سؤزله، اصیل انسانلارین اصیل معناسیندا اؤلومونه اینانماق ایسته‌مه‌دییمیزی دویارکن، یاخینلاریمیزین، دوست -یولداشلاریمیزین، فیکیرداشلار، قانداشلار، سیلاحداشلاریمیزین آیرلیغی اؤنونده، مایوس ائدیجی بیر چاره‌سیز تسلیم-ین مجبوریتنی تکرار-تکرار ثبوتا یئتیریر.
بلی آرتیق بختیار بیر ایلدیر بیزدن آیریلیب و سونسوزلوقلاردان اؤزو دوغما ائل اوباسینا باخیر. صدفلی سازینا، مهربان یار- یولداشلارینا، سئودیکی قیزا داریخیر! بختیار بلکه ده هرنه‌دن چوخ بیر صحیفه‌لیک شعیر یازماغا و اونو بیر غملی اوزانین چالدیغی، روحانی‌هاواسی مشایعتی ایله بیر صمیمی‌مجلس ده اوخوماغینا لاپ چوخ داریخیر!
بختیار بیر ائل شاعیری ایدی؛ آنجاق ایندی بختیار یازدیغی شعیرلره چئوریلیب و اؤزو سکوتا قاتیلارکن خالقین دیلیندن اؤزونو دینله‌ییر.
بختیار ایندی بیر شعیردیر بیر کیتابدا کی، آرتیق اؤزو اوخومور؛ اوخونور! او یالنیز اوخونوشونا باخیر؛ او یالنیز اوخونارکن اوره‌کلرین ریتمی‌ایله اؤزونون گوجونو دویور! آرتیق اوخونوشلاردا‌هانسی اؤزونه مخصوص حاللارین تعبیرینه چئوریلدیینی تفسیر ائدیر. معنا اولونور بختیار بیر ائلین اوغلو کیمی؛ بلکه ده آذربایجانیمیزین هر گوشه‌سینی سئیر ائدیر. خداآفرین کؤرپوسوندن قاراباغا باش چکیر؛ دمیرقاپی دربنددن شیروانا اوچور، صابیرله دانیشیر، سید عظیم‌له تبریزدن دئییر، خاقانی‌نی نئجه زیارتینه گئتدیی آندان او وطن سئودالیسی، باکی‌دان اولو نظامی‌نی گنجه‌ده آراییر. اونا اورمو گؤلونون گؤزه‌للیگیندن دئییر؛ ناخجواندان آرازین بو تایینا کئچرکن چالدیران شهیدلرینه احتراملا ال ائدیر، سلاملاییرموغان اوغلو. اردبیله، دویونجاق ساوالانین زیروسیندن باخیر؛ آرتیق یایلاق قوخوسو گلیر، آی ساوالان سئودیگی پیری حیدربابانی شاهسون آلاچیغینا قوناق چاغیریر. لاکن خیوودان کئچرکن قاراداغدا نباتی‌نی ده سالاملاییر؛ اهردن کلیبره گلیر او وطن سئودالیسی. قانلی گونشین عوصیانکار روحونون سارسیلماز قالاسیندان سامرا شهرینه یولا دوشور، بابکی آراییر قانلی قتلگاه ایچره! حلبه اوچور: – سالام محیط اعظم! جنابینیزا آراز ساحیلی‌نین مقدس تورپاغی موغاندان بیر قهرمان ائلین سئوگیسینی ارمغان گتیرمیشم. ای خالق انسان منده آذر آییندا ابدیته قووشموشام. آیریلیقیمدان دوز ایکی گون اول پیشه‌وری ایله بی‌ریا یانیما گلدیلر؛ اونلار بشریت دردینی چکدیینه گؤره سنه تشکور ائتدیلر؛ لاکن شاه اسماعیل حضرتلریندن بیر آز گیلئیله‌نیردیلر. باغیشلا من گئتمه‌لییم؛ موغاندا سازلی -سؤزلو بیر مجلیس ده ایندی منی آنیرلار قانداشلاریم، قلم داشلاریم. بیر ائوه باش چکمه‌لییم، سیدجلیل مندن دانیشیر شاعیر.

یئددی اوغول ایسته‌رم… یئددیسی ده بختیار…/ حمید آصف

تهرانین قیزمار ایستی‌سینده تؤوشه‌یه – تؤوشه‌یه اؤزومو خسته‌خانایا چاتدیردیم. آت یوخوم ایدی، آنجاق یولدا تاکسی‌لار خسته‌خانایا تئز چاتماغا منه یاردیمچی اولدولار. «یئددی قارداش» دا دئییلدیم، ساده‌جه تک اؤزوم ایدیم و «یئددی اوغول ایسته‌رم» کینوسوندا اولان کیمی‌اوزاقدان اوزاغا یئددی آتلی گلمیردی. آنجاق تهرانین تیخاجی یئددی یوخ، یئتمیش میلیون ماشینلارین یاشادیغی دردسردی. نهایت خسته‌خانایا چاتدیم. بو دؤنه «ساری شمیستان» تاختادان دوزلمیش داخمانین اوست قاتیندا یوخ، بلکه خسته‌خانانین اوچونجو قاتیندا ۱۰۱ینجی اوطاقدا یاتمیشدی. گؤرونوردو کی «ساری شمیستان» آرتیق «بختیار» ایدی. موغان اوغلو بختیار.
بورا خسته‌خانا
بئشینجی اوتاق…
بختیار گولله‌لنمه‌میشدی. خرچنگ خسته‌لییی غفیل گولـله‌دن ده چتین ایدی اونا. یاتمیشدی و غریبه بیر معصوملوق وار ایدی چؤهره‌سینده. غفیلدن اوره‌ییم تیتره‌دی. ایتیره‌جه‌ییک ساری شمیستانی سانکی. بو بویدا کندین جاماعاتیندا سانکی بیر باشی پاپاغلی اولمادی داغ بویدا کیشینی قورتارسین بو غفیل گولـله‌دن. نهایت اوتوردوم بختیارین لاپ یاخینلیغیندا. من اوتوران همن گؤزونو آچدی. به نییه گئج گلمیسن دئدی. «ساری شمیستان» دا بونو «بختیار»دان سوروشموشدو کینودا. و بیرده نئجه نفرسیز….؟ تک اولدوغومدان اوتاندیم. آنجاق من عمومیتجه تهراندا تکم، میلیونلاری ایچینده تک و تنها…
منه تاپشیردی تهراندا گئجه‌لر و سحر تئزلر خیاوانلاردا دولانما خطرلی‌دیر. ساری شمیستان «قانلی‌چاناق» دا سحرلر دومانلی اولدوغوندان و قورخولو اولدوغوندا گئتمزمیش دئیه بختیارا دا ائله بونو تاپشیردی.
نهایت دوداقلارینین قورو اولدوغونو، عطش اولدوغونو دئدی بختیار موغان اوغلو. عسگر (یانیلماسام موغان اوغلونون اوغلو) آتاسینین آیاقلارینی اووردو. سینه‌سینی اووردو. بختیار دئدی: سینم گؤینه‌ییر. ایستی‌دی، سوسوزام، دوداقلاریمی‌ایسلات…!
عسگر ایسلاتدی. منیم ایچیم آغلادی. شاعیری ایتیرمه‌لییک دئمه‌لی…

ییغینجاقدان شکیل‌لر

Check Also

رونمایی از کتاب «آجی چای» (مجموعه اشعار ترکی) استاد مفتون امینی

رونمایی از کتاب «آجی چای» (مجموعه اشعار ترکی) استاد مفتون امینی انتشارات «آواز» با همکاری ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *