خاطیرلانان ایل کیمی‌ییک! / ائلدار موغانلی

خاطیرلانان ایل کیمی‌ییک!
ائلدار موغانلی

پاییز یاغیر گؤزوموزده،
یاشیلباش‌سیز گؤل کیمی‌ییک!
حسرت بیتیر ایزیمیزده،
غریب دوشموش یول کیمی‌ییک!

کیرشانلانیر اوفوقده دان،
انیر چیسگین، قالخیر دومان؛
یاری یولدا کؤچو قالان-
کؤچری بیر ائل کیمی‌ییک!

بعضا اینجیک، بعضا کؤورک،
یاغیش وورموش بیر کپه‌نک؛
واختسیز چووغون، واختسیز کولک!!
سووورولموش کول کیمی‌ییک.

گاه سئوینج، گاه غم ییغینی؛
چوخلوغونو، آزلیغینی,
بیر سئودانین یازلیغینی-
توتار- توتماز دیل کیمی‌ییک!

نه اولاردی بیرده یئنه
عؤمروموز یازا بزه‌نه؛
ایندی، یالنیز دؤنه- دؤنه-
خاطیرلانان ایل کیمی‌ییک!
آبان ۱۳۹۶- تهران

Check Also

قوروماز کسیلن دیللرین قانی/ معصوم جبارپور

قوروماز کسیلن دیللرین قانی معصوم جبارپور چارمیخا چکیلن آغریلاریم تک قابارلی سؤزلریم کیتابلاریمدا. ایللردیر یانیری ...

One comment

  1. اکبر صالحی قاداش

    اللرینیزه ساغلیق ائلدار موعللیم! چوخ گؤزل یازیبسینیز! بو میصرانین تایپیندا بیر هئجا دوشوبدور، زحمت اولماسا ایصلاح بویورون.«سوورولموش کول کیمی‌ییک.»

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *