فریبا وفی
چئویرن: لاله جوانشیر
ترجمه: لاله جوانشیر
لاله جوانشیر

آتام قاپینی چیرپیب گئتدی. بیزی ده پارکا آپارمادی. آنام اوزانیب الی ایله اوزونو توتموشدو. سانکی گون ایشیغی‌نین گؤزونه دوشمه‌سینی ایسته‌میردی. آیدین قاپی-باجانی بیر-بیرینه ووردو. ساواش اویونو اوینادیق. من اوغرو اولدوم، آیدین توفنگله منی قووالادی. آنامین یئکه قارنینین دالیندا سنگر توتدوم. او منه گولله آتدی. آنام بیزه دئیینمه‌دی. آیدین بیر آز دا اوجادان قیشقیردی. من تسلیم اولدوم. دئدیم: – گل ایندی بیر پارک دوزلدک. اول پیلله‌لری دوزدوک. سورا دا پارکین آغاجلاری اولسون دئیه، گولدان‌لاری گتیردیک. آیدین دئدی: – هئیکل! تئز قاچیب کور قولچاغیمی گتیردیم. گؤزلرینی آیدین چیخارتمیشدی. آیدین آیاق اوسته آناما باخیردی. قولومدان چکیب دئدی: “گل، آنام دا اولار هئیکه‌لیمیز.” آنامین آیاغیندان توتوب چکدیک. ترپه‌ده بیلمیردیک، آغیرییدی. ایکیمیز یاردیملاشاراق یئنه ده او بیری آیاغینی چکدیک. دال – دالی گئدیب دوشدوک. گولوشدوک. بیر داها قالخدیق. بو دفعه باشینی چکدیک. سورا او بیری آیاغینی چکدیک. او قدر ترپتدیک کی، سونوندا اونو اوتاغین اورتاسینا گتیره بیلدیک. ایندی آنامین گؤزلری یومولویدو؛ اللرینی ده یئکه قارنی‌نین اوستونه قویموشدو. سونرا آنامین دؤوره‌سینه چپر چکدیک. ائوده ‌کیبوتون یاستیق‌لاری گتیریب دوزدوک. آتام ائوده اولسایدی، ایکیمیزی ده آنبارا سالیب قاپینی قیفیللایاجاقدی. آنام دا گؤزلرینی آچسا قیشقیراجاقدی. آما آچمیردی. او، دوغورچو بیر هئیکل کیمی اولموشدو. ایندی آنام اوتاغین تام اورتاسیندایدی، اطرافیندا من اوجالیقدا بیر دیوار.
آیدین دئدی:
– گل داوا-داوا اوینایاق.
دئدیم:
– پارکدا ساواشمازلار.
– اوندا گل «ننه منی قوردا وئرمه» اوینایاق.
بیر-بیریمیزی قووالاییب قیشقیردیق. آیدین بیردن دایاندی. آناما ائله باخیردی ائله بیل اونون اوزونده یئریین بیر قاریشقایا باخیردی. یاخینلاشدیم. آنامین گؤزونون اوجوندان سو آخیردی. ساچلاری دا ایسلانمیشدی. دئدیم:
– آیدین بو دا فواره‌میز!
آیدین آنامین بولاق کیمی آخان گؤزلرینه باخماق اوچون اَییلدی. یاواش سسله دئدیم:
– گل بو یانا، بوردا داها چوخدو.
آیدین آنامین اوزونه ساری اَییلیب قیشقیردی:
– آنا!
ایکیمیز ده بیردن دئدیک:
– آنا! آنا!
آنام اللریمیزدن توتدو. اللری بوز کیمی‌یدی.
– بو قدر اویناماقدان یورولمادیز؟… من چوخ یورولدوم، اوشاقلار. اویون اویناماقدان چوخ یورولدوم.
او گولدو و سو گؤزلری‌نین اوجوندان ساچلارینا تؤکولدو.
قادینلار
قادینلار ایکی قروپدور. قورونانلار و قورونمایانلار. بیرینجی قروپو ماشین‌لا او یان-بو یانا آپاریرلار. واختلی-واختیندا گؤزل‌لیک سالونوندان، حوض‌دان، مکتبدن، ایش یئریندن و… گؤتورورلر. تئلئفون‌لا حالینی سوروشورلار و بیردن باشی آغریسا، «بیر آز استراحت ائتمن گرکمیرمی؟» دئین بیری واردیر. ایکینجی قروپون قادین‌لاری یئلده، یاغیشدا و کولکده ساعاتلارجا آوتوبوس نؤوبه‌سینده دورورلار و دفعه‌لرجه آوتوبوسون گله‌جگی یئره باخمایاجاقلارینی دئسه‌لر ده، بویونلاری ایستر-ایسته‌مز بیر داها و بیر داها او یؤنه چئوریلیر. گئجه‌یه قدر او یان-بو یانا قاچیرلار و گئجه «عزیزیم، آغری کسیجی ایسته‌ییرسنمی؟» دئین بیری یوخدور. بیرینجی قروپون قادینلارینین سسی یومشاقدیر و تئلئفونلا دانیشارکن گئرچک یاشلارینی بیلمک چتیندیر. ایکینجی قروپون قادینلاری کوبود و آجی‌دیرلار. دیش‌لری تئز چورویور. و هر آن ساچ بویاسی‌نین باهالیغیندان شیکایتچی‌دیرلر. قورونان قادین یئرلی-یئرسیز کیلوسونو اؤلچور و شیشمیش قارنیندان ناراحاتدیر. او، ایدمان سالونلارینا، سونایا گئدیر… گئجه یئمگی یئمیر و بونو بؤیوک بیر لذتله هر یئرده آنلادیر. دوستلاری‌نین آراسیندا چئشیدلی آریقلاما دیئتی اوصول‌لارینی پایلاشیرلار و اونلاردان بیری‌نین بیشیردیگی تورتو ذؤقله یئییرلر. ایدمان معللیم‌لری اونلارا مشقی ائوده ده داوام ائتمه‌لرینی مصلحت گؤرور. اونلار ارلریندن ایدمان ائتمه‌ینده اونلاری جزالاندیرمالارینی ایسته‌ییرلر. ماقنیتافونا بیر کاسئت سالیرلار. دار بیر پالتار گئییرلر و ائوین بالکونوندا ایپ‌آتدی اویناییرلار. قارینین ایچری گئتمه‌سی آنجاق شانسلیلارا اوز گتیرن بیر معجیزه‌دیر. شانسلی قادین سیررینی آچیقلاییر: «سحر یئمگیندن اؤنجه یئریمک.» اونلار بیر-بیریله قرارلاشیرلار و سحر یوخولو گؤزلرله ائولرینه ان یاخین پارکا گئدیرلر.
دؤنوشده دویون قارینا بیر یئمک یئییرلر. سونرا دا بیر-بیرلرینه گئجه‌لری یئمک یئرینه سالات یئمگی اؤنریرلر. ایکینجی قروپون قادینلاری نه سونا تانییرلار، نه حوض. یاواش-یاواش بوش ممه‌لر و آسیلمیش قارینلارینا ضررسیز بیر ائو پیشیگی کیمی آلیشیرلار. ساچ اوستاسی قورونان قادین‌لاری ایلک باخیشدا تانییر. او، الی آچیقلیلیقلا باغیشلاییر و گیزلی بیر آنلاشمادا اوندان، زامانین اثرلرینی اوزوندن یوخ ائتمه‌سینی ایسته‌ییر. اؤزونو آجی بیر لذتله ساچ اوستاسی‌نین اللرینه تاپشیریر و تزه گؤرونوشونون انتظارینی چکیر. قورونمایان قادین مین بیر دیل‌له، ساچ اوستاسیندان اونو کیشیسی‌نین ایسته‌دیگی شکله سالماسینی ایسته‌ییر. ساچلارینی بویاییر، آما قیسالتمیر. بیر آز غرور و اوتانجلا، اری‌نین اوزون ساچدان خوشو گلدیگینی سؤیله‌ییر. ائولیلیک‌لریندن بیر نئچه ایل سونرا اؤزلری‌نین ساندیقلاری بیر جسارتله ساچلارینی آلمان مانکن‌لری کیمی قیسالدیرلار. بیر قادینین اللریندن اونون هانسی قروپا عاید اولدوغونو بیلمک اولار. قورونمایان قادینین الینده گؤی رنگلی، شیشمیش دامارلار وار و سوموکلری گؤرونور. بارماقلاری‌نین تکلیکده حرکتی یوخدور. الی‌نین هر طرفی عینی آندا بئیین‌دن امر آلیر. آما قورونان قادینلارین اینجه بارماقلاری وار. یومشاق و قیوراقدیرلار و الین حرکتینی تکمیللشدیرمک اوچون سرعتله اونا اویوم ساغلاییرلار. قورونمایان قادینین اللری اطاعت ائدرجه‌سینه بدنی‌نین کناریندان ساللانیب و هردن یوخاری قالخماق ایسته‌دیکده سینه‌سیندن یوخاری قالخمیر. قورونان قادینلار آغیر یئریشلی‌دیرلر. آما قورونمایان قادینلار یا چوخ یاواش، یا دا چوخ سرعتله یئرییرلر؛ یا بئل‌لری اَییلیب، یا دا باشلاری بدنلرینه اویومسوز بیر یوکسکلیکده یئر آلیر. اونلارین یئریشلرینین تاماشاچیسی یوخدور. اونلار کیشی‌لرین سؤز آتمالاریندان لذت آلمیرلار و دقتله، مهربانلیق‌لا، عشقله دولو باخیشلارین اونلارا باخمایاجاغیندان امیندیرلر. قورونمایان قادین یا دئیینیر، یا بیر یئره زیلله‌نیر، یا دا گیجلله‌نیر. یا قارین‌قولولوغا باخیر، یا دا اؤزونو بئل، تنگه گتیره‌جک قدر خسیس‌لیک ائدیر. قورونان قادین قوناقلیق قورور، خارجی سفرلریندن دانیشیر، اورتا یاشلارینی کئچسه ده، سرعتلی بیر رقص ده ائده بیلیر. دوستلاری اونو اؤیورلر و بو قدر جاوان قالدیغی اوچون تعجوبله‌نیرلر. قورونمایان قادین اوینامیر. دیرناقلارینی اوزاتماقدا اوغورلو دئییل. دار بیر کؤینگی وار. او، قیزینا باخیر. اونون اَینینه کسه بیله‌جکمی؟ قورونان قادین کیشینی تانییر. اوندان نه زامان و نئجه پول ایستیه‌جگینی بیلیر. بیر اووچو کیمی کیشی‌نین ضعیف یئرلری‌نین پوسقوسوندا یاتیر و اوندان یارارلانیر. قورونمایان قادین اؤزونو ده تانیمیر و هر زامان نه‌دن او و کیشیسی هئچ نه‌یی عینی آن دا ایسته‌میرلر دئیه، شاشیریر. قورونمایان قادین گوناه و وجدان عذابینی دوغولمامیش اکیزلر کیمی اؤزویله داشییر. او، اریندن نیگاراندیر، او بیریسی ایسه اؤزوندن. هر دفعه چئک-آپ ائدیر. قان آنالیزینه گئدیر، ساغلامدیر، آنجاق انرژیسی آزالیب. خسته‌لیک و یاشلیلیق اونو مین اژداهادان داها چوخ قورخودور. آما قورونمایان قادین زامانین کئچمه‌سینی بیلمیر. بیرینجی گونه ایکینجی گون دئییر، اوچونجو گونه دؤردونجو گون. اری‌نین اوزونده‌کی آغ توکلری گؤرور و صاباحی دوشونور. قورونمایان قادین آغلاییر. گؤز یاشلاری بیته‌جک قدر آغلاییر. قورونان قادین آغلاماق و حوزنون یاری یولوندان حیاتا قاییدیر.

ائدیت: نرمین کمال

فریبا وفی
چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

اویوندان یورغون

لاله جوانشیر
www.ishiq.net

آذربایجان ادبیات و اینجه‌صنعت سایتی

اویوندان یورغون

لاله جوانشیر
www.ishiq.net

آذربایجان ادبیات و اینجه‌صنعت سایتی

اویوندان یورغون

لاله جوانشیر
www.ishiq.net

آذربایجان ادبیات و اینجه‌صنعت سایتی