چئویرن: ایشیق
ترجمه: ایشیق
ایشیق

دئییرم آی علی خال‌اوغلو، دوغوردان آللاه او شاها، مخصوصا آتاسی ایرضاشاها غنی غنی رحمت ائله‌سین. نییه؟ چون کی قویمادیلار بیز اؤز دیلیمیزده اوخویوب، یازاغ. البتده ایندیکی حکومتدن ده من راضییام ها! انصافدان کئشمییک؛ بولار دا اللریندن گلنی اسیرگمه‌دیلر؛ یوخسا ایه قویسئیدیلار بیز اؤز دیلیمیزی، ادبیاتیمیزی مدرسه‌ده، دانیشگاهدا اوخویوب اؤیره‌شک, اشی واللاه ایندی اوستاد، معللیم ترافیکیندن تنگه- باجادا یئریمک اولمازدی.
دئییر بیر شیعه مسلمان اؤلور، قبیرین اول گئجه‌سی انکیر منکیر باشینین اوستون آلیب سوروشورلار: رببون کیمدی؟ دئییر: آللاه؛ کیتابون؟ دئییر: قران؛ پیغمبرون؟ دئییر: محمد؛ اماملارین سایی نئچه‌دی؟ دئییر: یوز. یوز سؤزونو ائشیدنده اودلو کوسوونان دوشورلر کیشی‌نین جانینا. حضرت علی (ع) گلیر کیشی‌نین باشینین اوسته، قولاغینا پیچیلداییر: دئمه یوز! دئ اون ایکی! کیشی دئییر: آی آغا قوربانین اولوم! من یوز دئییرم بولار ویریرلار؛ گؤر اون ایکی دئسم نئیلرلر؟! ایندی رحمتلیک عمران صلاحی دئمیشکن: حالا حکایت ماست! آی قارداش بیز بیرجه دنه تورکو کیتابی تاپیب، قاباغیمیزا قویوب بیر قاراما اؤز باشیمیزا، بیر بامماچا کیتابین باشینا سالا-سالا اؤیرشدیییمیز حالدا، ماشالله گؤیدن دی کی اوستاد یاغیر؛ یئردن دی کی معللیم قایناییر. ایندی گل گؤر بونون درسین اوخوسایدیق نه اولاجاقمیش؟!
علی خال‌اوغلو دئییر کی، آخی سن بیرین گؤرورسن؛ او بیریسین گؤرمورسن دده بالاسی! دوزدو کی بیز بو دیلده آکادئمیک تحصیلات آلمامیشیق، آنجاق سن تشویقین تاثیرین نئجه گؤرورسن؟! سن بو مجازی گروپلاردا گؤستریلن تشویق‌لری، بیر بئله آلقیشلاری شوخلوق بیلیرسن؟! کیشی بولار داشی دیله گتیرر، هاندا قالا بیر پارا کؤیرک قلبلی اینسانلاری. باخ لاپ سن اؤزون. گؤر بوجور آلقیشلانسان، سنین او پلتک دیلین آچیلیب، بولبول کیمی اؤتر یا اؤتمز؟ قولاغ آس!: «اللریزه ساغلیق!»، «یاشایین اوستاد!»، «اوره‌یینه ساغلیق!»، «دوشونجز گوزلدیر!»، «نه یاخشی کی وارسیز!»، «چوخ گؤزل، اعلادی سایین شاعیر!»، «چوخ اوره‌یه یاتان!»، «چوخ گؤزل، اعلادی علی معللیم!»، «سایین شاعیریمیز ولی معللیمه آلقیش!» و … یاخشی ایندی بویور گؤرک سن ده بئله- بئله تشویق‌لری ائشیتسن، اؤزووه بیر شاعیر اولارسان، یوخسا اوتوروب بوش- بوش دانیشارسان؟ دئییرم: آی خال اوغلو باشیوا دؤنوم، آخی بهبه جهجه‌نن کی ادبیاتین ایشی یوللانماز؛ اونا تنقید لازیمدی. میوه آغاجی کیمی‌دی؛ او آلچاق اوجاسی داللانماسا بار وئرمز…!
علی خال اوغلو سؤزومو کسیر: تنقید؟! نابا نابا سؤزون دانیشاسان ها! تنقید کین- کدورت گتیرر اشی! باشین آغریییر سنین؟ گئت محبت جارچیسی اول کیشی! جان دئ، جان ائشیت!!

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

تنقید / دیلی‌پلتک ممی

ایشیق
www.ishiq.net

آذربایجان ادبیات و اینجه‌صنعت سایتی

تنقید / دیلی‌پلتک ممی

ایشیق
www.ishiq.net

آذربایجان ادبیات و اینجه‌صنعت سایتی

تنقید / دیلی‌پلتک ممی

ایشیق
www.ishiq.net

آذربایجان ادبیات و اینجه‌صنعت سایتی