شام آغاجی / محمد خلیلی


شام آغاجی
محمد خلیلی

آدینی مئشه‌یه دئدیم،
باشین ایدی
حزین-حزین
خزل شعرین اوخشادی.

آدینی دنیزه دئدیم،
چالخالاندی
جانی یاندی
گؤز دولوسو آغلادی.

آدینی ذیروه‌یه دئدیم،
هارای… چکدی
دالین غمه سؤیکه‌دی
غم یاراسین اوره‌گینده ساخلادی.

آدینی گونشه دئدیم،
آلوو توتدو
غضبلندی
سمالاری اوخلادی.

آدینی تاریخه یازدیم،
هئجالاری
شعله چکدی
واراق‌لاری اودلادی.

قانلی کؤینک
قانلی بایراق
قهرمان!

آدینی کؤنوله یازدیم،
گؤزل آدین
قان ایچینده ریشه ووردو
پؤهره‌‌لندی
بوی آتدی.

آدینی کؤنوله یازدیم.
۲۱/۶/۶۸

Check Also

دیل‌سیزلیین دیلی / ع.ن. چاپار

دیل‌سیزلیین دیلی ع.ن. چاپار منه دیل یوخ، دیل‌سیزلییی اؤیره‌دینیز! منه دئیین معناسینی – اوغرون – ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *