کور دومان / بهمن زمانی

کور دومان
بهمن زمانی

اوچ قارداش داغیندان قالخدی جانبازا
آتین یالمانینا یاتدی کور دومان!
دینجلدیم د‌ٮٔمه‌دی قانادی سینمیش
اودور، بیزیم کنده چاتدی کور دومان!

سیرتیق کله کیمی‌تپیلدی کنده،
بٮٔش_اون گون بوردایام _دٮٔدی گلنده،
یاغیش کوره‌یینده، چیسگین الینده
اوزادیب قیچلارین یاتدی کور دومان!

کند اوسته بارداشین قوروب اوتوردو،
الینه گٮٔچه‌نی سویا باتیردی،
او قده‌ر دایاندی، قیشی گتیردی
پاییزی چیلله‌یه قاتدی کور دومان!

الیندن قورتاران شهره قاشدی،
تهرانا، تبریزه، اهره قاشدی،
هرکسین اؤزونه اؤزو ساتاشدی،
ده‌یرین ده‌یمزه ساتدی کور دومان!

«بهمن» یاز دوماندان چندن الحذر!
عؤموردن هدره گٮٔتدی او گونلر؛
هر آخشام، هر ناهار، هرگون، هر سحر
شیش کیمی‌گؤزومه باتدی کور دومان!

Check Also

اینتحار / سمیر کهیه‌اوغلو(عراق)

اینتحار سمیر کهیه‌اوغلو(عراق) قالخ! بیر سیقارا یاندیر کیبریت آراما اؤره‌ییمین آتاشیندان یاخ بیر نفس من ...

One comment

  1. اکبر صالحی قاداش

    اوستاد زمانی نین شئعرینی گؤردوکده چوخ سئویندیم. اومید ائدیرم، اونون شئعرلری توپلانیب، یلییلسین. اوستاد زمانی بیر گنجینه دیر کی، قییمتلی جواهیرلری خالقین گؤزلرینی ایشیقلاندیرمالی دیر.

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *