انتحار / شعبان جابوللو

انتحار
شعبان جابوللو

میکاییلی پسیخاترییا کلینیکاسینا گلینی و اوغلو گتیرمیشدی. ایچری گیرندن سونرا دئمیشدیلر کی، میکاییل اؤزونو اؤلدورمک ایسته‌ییر. میکاییل ایسه، ال‌اوستو جاواب وئرمیشدی کی، یوخ ایندی ائله بیر فیکریم یوخدور. ائوه گئتمک ایسته‌ییرم.
طب باجیسی اؤز ایشلرینی گؤرندن سونرا میکاییلا دئمیشدی کی، سن گرک حکیمله دانیشاسان. حکیم موعایینه‌سیندن کئچمه‌میش من سنی ائوه بوراخا بیلمه‌رم.
طب باجیسی:
– دوکتور نؤوبتی خسته‌میز وار، انتحارا جهد ائتمیش، تله‌سیر، ائوه قاییتماق ایسته‌ییر.
حکیم:
– ائوه بوراخما، بئش-اون دقییه‌یه قبول ائدرم.
حکیم الینده‌کی ایشی تاماملایارکن دوشوندو کی، بو خسته ندن ائوه تله‌سیر؟ اولمایا گئدیر، یاریمچیق قالمیش ایشینی بیتیرسین، اؤزونو اؤلدورسون. بیردن حکیمین عاغلینا گلدی کی، خسته اؤزونو ائله بورادا، کلینیکادا دا اؤلدوره بیلر. اودور کی، الینده‌کی ایشی یاریمچیق بوراخیب، خسته‌نی تعجیلی گؤرمک قرارینا گلدی.
حکیم خسته‌نین اولدوغو اوتاغا گیرنده، گؤردو کی، خسته‌دن باشقا ایکی نفر ده اونونلا یاناشی اوتوروب. اونلارین بیری خسته‌نین اوغلو، او بیریسی ایسه گلینی اولدوغونو دئدی.
حکیم قرارینی تئز وئردی و دئدی کی، سیز گؤزله‌یین، من خسته ایله تکلیکده گؤروشمک ایسته‌ییرم.
حکیم الینده‌کی،خسته‌لیک ژورنالینا باخاراق، دوداغینین آلتیندا پیچیلدادی:
– میکاییل…
میکاییل حکیمی‌دیقتله ایزله‌ییردی. اونون باخیشلاری، داورانیشی، چیینینه تؤکولموش آغ ساچلاری میکاییلین دیقتینی چکدی و فیکیرلشدی کی، تجروبه‌لی حکیمه اوخشاییر، بونون الیندن قورتارا بیلمیه‌جک. دئیه‌سن، گئجه‌نی پسیخاتئرییا کلینیکاسیندا کئچیره‌جک. دریندن بیر آه چکیب باشینی آشاغی سالدی.
حکیم گؤزلرینی الینده‌کی ژورنالدان آییریب، میکاییلا باخدی و سوروشدو:
– نه اولوب میکاییل، بورا نه اوچون گلمیسن؟
میکاییل:
– من گلمیردیم، اوغلومنان گلینیم منی مجبور ائتدی.
حکیم:
– ندن سنی مجبور ائتدیلر، نه اولوب، نه باش وئریب؟
میکاییل:
– من اؤزومو آسماق ایسته‌دیم. اونلار بونو بیلدی، داها دوغروسو، اؤزوم دانیشدیم، سونرا دئدیلر کی، بیزیمله پسیخاترییایا گئتمه‌لیسن. اوغلوم پولیسه زنگ ائتدی، پولیس بیزی دوز بورا قدر گتیردی. بیز ایچری کئچندن سونرا پولیس گئتدی… یوخسا، من گلمک ایسته‌میردیم.
حکیم:
– ندن اؤزونو اؤلدورمک ایسته‌ییرسن، نییه یاشاماق ایسته‌میرسن؟
میکاییل:
– یاشاماغا گوجوم چاتمیر، یورولموشام، حیاتدا داها هئچ بیر شئی منیم اوچون ماراقلی دئییل. سون واختلار دا بیر سیرا ایشلر باش وئردی، داها دؤزه بیلمه‌دیم. دئدیم، یاخشیسی بودور کی، اؤزومو آسیم.
حکیم:
– اؤزونو آسماغا جهد ائتدینمی، یوخسا هله فیکیرلشیرسن؟
میکاییل:
– ایکی دفعه جهد ائتدیم، هر ایکیسینده ایپ قیریلدی، سریلدیم یئره. اوچونجو دفعه گئتدیم ایتیمیزین ایپین گؤتوردوم. ایت گؤردو، ائله بیلدی کی، من اونونلا چؤله گئتمک ایسته‌ییرم، اونو گزمه‌یه آپارماق ایسته‌ییرم. گلدی آردیمجا. ایپی تاواندان آسمامیش ایته باخدیم، اونو تومارلادیم، منی آغلاماق توتدو. ایتین بوینون قوجاقلاییب آغلادیم. فیکیرلشدیم کی، من اؤزومو اؤلدورسم، بو ایته کیم باخاجاق. سونرا گؤردوم کی، یوخ، یاشایا دا بیلمیرم. بیر ده ایتین بوینون قوجاقلادیم. هؤنکور-هؤنکور آغلادیم، دئدیم منی باغیشلا، باجارمیرام، یاشایا بیلمیرم. بونلاری دئییب تاواندان آسیلان قارماغا باخدیم. ایت ایشین نه یئرده اولدوغونو باشا دوشدو، من تاوانا باخارکن زینگیلده‌دی، گؤزلریندن یاش سئل کیمی‌آخدی. اَییلیب ایپی گؤتورمک ایسته‌ینده، ایپ یوخ ایدی. ایت ایپینی گؤتوروب آرادان چیخمیشدی. زینگیلدییه-زینگیلدییه‌هارا گئتدی،‌هاردان گلدی بیلمه‌دیم. بئش-اون دقیقه دن سونرا قاییتدی. آما ایپ یوخ ایدی. قاپینین آغزیندا دوروب گؤزلرینی منه زیلله‌دی. ائله بو زامان گلینیم بیر مئساژ یازدی: «بیزیمله شام یئمک ایسته‌ییرسنمی؟»
اوغلوم‌گیله یولا دوشدوم. ایتی باغلاماغا ایپیم اولماسا دا، او منیمله گلدی. دابان-دابانا منی ایزله‌دی. هئچ ائله بیل همیشه‌کی دجل و شیلتاق ایت دئییلدی. ایپینی بوراخان کیمی‌آرادان چیخاردی، سؤزه باخمازدی. ایندی ایسه سانکی منی قورویورموش کیمی‌گودور، گؤزونو مندن چکمیردی. بئله‌جه ایت بوتون یول بویو غملی باخیشلاری ایله منی ایزله‌دی.
اوغلوم‌گیله گلدیک. گلینیم بیزی قارشیلادی. “خوش گلدین” دئدی، بوینومو قوجاقلادی. من ده اونو قوجاقلادیم، گؤروشدوک. اوغلوملا دا گؤروشدوک. گلینیم ده، اوغلوم دا بیزی دیقتله سوزدو.
گلینیم دئدی: “سیزه نه اولوب؟ بیر تهر گؤرونورسوز. ایتین ایپی‌هانی؟ نه عجب دجللیک ائله‌میر؟”
اوغلوم اوزومه دیقتله باخیب، باشینی آشاغی سالدی و آستاجا دئدی: “کئچین ایچری”.
بیز ایچری کئچدیک. ایت قاپینین آغزیندا اوتوروب گؤزونو منه زیلله‌دی. هردن زینگیلده‌ین کیمی، نسه دئمک ایسته‌دیگینی ده اورداکیلارا خاطیرلادیردی. اوزون مودت آرایا سوکوت چؤکدو. گلین یئمک حاضیرلایارکن، فیکره دالمیشدی. گؤزآلتی منی سوزور، ایته باخیردی. اوغلوم منیمله اوز اوز اوتورسا دا، دینیب دانیشمیردی.
بیردن سوروشدو: “آتا، سنه نه اولوب؟”
اؤزومو ساخلایا بیلمه‌دیم. هؤنکور-هؤنکور آغلادیم. گلینیم منه سو گتیردی. یانیمدا اوتوردو. الینی چیینیمه قویدو. آغلاماق منی خئیلی ساکیتلشدیردی. بونو اونلار دا گؤردو.
گلینیم آستاجا دئدی: “دانیشسانا”.
دانیشدیم. احوالاتی نئجه وار ایدی، ائلجه ده آنلاتدیم. ایکی دفعه ؤزومو آسدیغمی، ایپین قیریلدیغینی و نهایت، ایتین ایپینی گؤتوردویومو ده دئدیم. ایت بونو گؤزله‌ییرمیش کیمی‌آیاغا دوردو، باییرا چیخدی. بیر آزدان یئنه قاییدیب قاپینین آغزیندا اوتوردو.
اونلار منی ساده‌جه دینله‌دی. آرا-سیرا بیر-بیرینه باخسالار دا بیر سؤز دئمه‌دیلر. یئمکدن سونرا اوغلوم دئدی: “ایندی بیزیمله خستخانایا گئتمه‌لیسن، پسیخاترییایا.
دئدیم: “یوخ، گئتمیرم. بو ایش بیتدی. من بیر ده انتحارا جهد ائتمیه‌جم”.
گلینیم منه یاخینلاشیب دئدی: “بونو اوردا دئیرسن. بیز سنی تک بوراخا بیلمریک. گئدک، معاینه ائتسینلر. بو جهددن سونرا قرار حکیملریندی، نئجه دئیرلر، ائله ده اولار”. من دیرندیم و بورا گلمک ایسته‌میردیم.
اوغلوم پولیسه زنگ ائتدی. پولیسی قاپینین آغزیندا گؤرن کیمی‌دیره‌نیشیمین یئرسیز اولدوغونو آنلادیم و کؤنوللو اولاراق گلدیم.
حکیم:
– اوغلونلا گلینین حاقلیدیر. انتحار جهدی وار. سن معالیجه اولونمالیسان، اؤزو ده ان آزی بیر ایل بیزیمله، یعنی کیلینیکا ایله علاقه‌ن اولمالیدیر. ائوه بوراخیلاندان سونرا دا بیز سنی واختاشیری چاغیراجاییق. اومیدوارام کی، امکداشلیغیمیز آلیناجاق.
میکاییل:
– ایندی ائوه گئده بیلرممی؟
حکیم:
– بوردا قالماغینی ایستردیم. نه اوچون ائوه تله‌سیرسن؟
خسته:
– ایتیم مندن نیگاراندی. ایندی او نه چکیر من بیلیرم. گئدیم، گؤرسون کی، من یاشاییرام.
حکیم خسته‌یه ایناندی و یقین ائتدی کی، بو خسته اؤزونو آسمایاجاق و دئدی:
– گئت ائوه، آما صاباح ساعات ۱۱-ده بوردا اول.
خسته سئوینه‌رک معایینه اوتاغیندان چیخدی. خسته‌نین اوغلو ایله گلینی حکیمه دیقتله باخدی، نسه دئمک ایسته‌دیلر، آما حکیم اونلاری قاباقلادی:
– نیگاران اولمایین، بو گئجه بیر شئی اولماز، صاباح ساعات ۱۱-ده بوردا اولون.
خسته ائوه تله‌سیردی. او، ایتینی گؤرمک ایسته‌ییردی. ائوه چاتان کیمی‌ایتینی گؤتوروب اؤز ائوینه گئتدی. یئرینه اوزانان کیمی‌اونو درین یوخو آپاردی. او، بو گئجه اوزون ایللرین یورغونو کیمی‌یاتدی.
سحر آییلاندا ایتی باشینین اوستونده گؤردو. ایتین بوینون قوجاقلادی، آغلادی و اونا سؤز وئردی کی، بیر ده اؤزونه قصد ائتمیه‌جک.
ایت چؤله چیخماق ایسته‌دی. میکاییل قاپینی آچدی. ایت گؤتورولدو،‌هاراسا گئتدی. بیر آزدان آغزیندا ایپ گئری قاییتدی. قاپینین آغزیندا دایانیب، گؤزلرینی میکاییلا زیلله‌دی.
ایت میکاییلا، میکاییل ایته باخدی.

Check Also

سویوق اوره‌ییمدن بئینیمه یوکسه‌لیر / سید رضا حسینی مرند

سویوق اوره‌ییمدن بئینیمه یوکسه‌لیر سید رضا حسینی مرند قار یاغیردی. ماشین سس‌سیزجه خیاباندا ایره‌لی‌له‌ییردی. سوروجو ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *