زهرا* / حسین واحدی

زهرا*
حسین واحدی

هئچ اؤزوم ده اینانمیردیم زهرا ایکی یاشینا کئچیر. سحرچاغی یوخودان دوراندان، اون دفعه؛ «آللاه سنی تانیمایانا لعنت! آللاه سنه مین شوکور» – دئمیشم. علی آلتی‌دا ایشه گئدنده‌ ده نئچه دفعه تاپشیردیم «آخشام ائوه گلنده الی بوش گلمه‌ها… اوشاغا دوغوم گونو کئیکی آل، یاددان چیخماسین سن آللاه!».
بلی،‌هامینین دا یادیندان چیخسا، منیم یادیمدان چیخماز کی. فیکریم مین یانا گئدیردی. آخشام کیم‌هارادا اوتوراجاق. کیم نه دانیشاجاق. اؤز-اؤزوم‌له دانیشا-دانیشا، گاهدان دا زهرانین اوتاغینا گئدیب اییلیب بویون-باشینی اییله‌ییردیم. بیلمیرم نییه بو قدر اوشاغین دونیایا گلنده یاش‌یاریم، ایکی‌یاشینا کیمی‌گلن قوخوسونون دلی‌سییم. بلکه ده زهرانین اییی‌سی منه خوش گلیر. المیدن گلسه ایدی، بو اییی‌نین عطیرینی، اودکولونونو دوزلتدیرردیم.
بالامین اییی-قوخوسونا دا قوربان اولوم اؤزونه ده. منه خوشبخت‌لیک گتیرن بالاما. ایکی ایل بوندان اؤنجه‌لر یادیمدان چیخماز هئچ واخت. چیخا دا بیلمز. ایندی ده یادیما دوشنده ال-قولوم اسیر. دیل-دوداغیم قورویور. اوره‌ییم دؤیونور. نه عذاب‌لار چکدیم. نه سؤزلر ائشیتدیم او زهراسیز گونلریمده. بالدیز بیر یاندان، قاینانا بیر یاندان اوستومه گلیردیلر.
او سیسقا، بورنو یئکه آداما بنزمز بالدیزیمین آجی سؤزلری، هله ده بیر زهریمار کیمی‌بوغازیمی‌یارا-یارا قارنیما دولور. قاینانامین آتماجالاری بیر اوخ کیمی، جانیمدا ساغلام بیر یئر قویماییب قالا. بویانا کئچیردیلر علی‌نی قوروردولار، اویانا کئچیردیلر علی‌یه قوش‌دیلی اوخویوردولار! بیر گون اولسون بئله، ائویمه داعوا سالماقدان نه دویوردولار، نه یورولوردولار.
هه! گلین گؤرون زهرالی گونلریمی! گلین گؤرون، آدینا قوربان اولدوغوم خانیم فاطیمه‌-یی زهرا (س)، نئجه بیزه، گول کیمی‌پای آلدی آللاهدان. اللری قیریلسین خانیم فاطیمه‌ی زهرانین جانینا قییانلارین.
زهرامین آدینی قویماغی دا منه چوخ گؤرودولر. بو آدی قوی! او آدی قوی. آد گرک بیز دئین اولا. کیم دئییب آد گرک سیز دئین اولا؟ بو اوشاغین آناسی یوخدور؟ آتاسی یوخدور؟ هله قاریمیش بیر قیز اونا آد قویاجاق یا آغ بیرچک‌لریندن اوتانمایان بیر قاری؟
وای اونو نه دئییم اولسون! گون اولمادی، هفته-آی اولمادی اریمی‌منیم جانیما سالمایالار. هله ده ساغ بؤیرومده سانجی وار. علی سن آللاها نئجه جاواب وئره‌جکسن؟ ووردوغون تپیک‌لره نه جاوابین وار؟ هه؟
بلکه منی خسته‌خانایا آپاراندا من سیرریمی‌دوکتورا دئمه‌یه‌یدیم. بلکه من اؤلردیم؟ نه جور دوکتورلار اوشاق‌لا آنانین دیری قالماق ریسکینی یاری-یاری دئیه-دئیه سن قبول ائله‌دین؟ اولسون عیبی یوخدور دئدین. اینشاللاه هئچ نه اولماز بویوردون!
جانیم بو فیکیرله ائله آجیییردی، هردن اونودوردوم بوگون بالامین دوغوم گونودور.
ائو-ائشییی سیل-سوپور ائدرکن، زهرا دا یوخودان اویانیب بیر آز سود ایچیب حه‌یط‌ده اویناماغا گئتدی. او بیری کند اوشاقلاری کیمی، تویوق-جوجه‌لردن او قدر خوشو گلیردی، گونون، اونلارلا اویناماق‌لا آخشام ائدیردی.
او حه‌یط ده اوینارکن، اؤز خیالیمدا فیکیرلشدیم ناهارا بیر یونگول‌وار یئمک حاضیرلاییم و دویو-تویوغو دا شاما بیشیریم. قوی دوغوم گونوموز اعلا اولسون.
حه‌یط‌دن بیر آز تره-توره دریب ناهاری بیشیرمک‌له ائله باشیم قاریشدی، هئچ بیلمه‌دیم نه زامان گون‌اورتا اولوب.
ناهاری بیشیررکن ایچیمده‌کی نیگرانچیلیغی نه اودا بیلدیم نه سوسدورا بیلدیم. من‌له قالدی کی من‌له قالدی. نه قدر اؤز خیالیمدا آخشام سئوینجینی توخوسام دا، بیر آن‌دا نم‌هارادان بیر عجاییب غم-غصه اوره‌ییمه دولوب ایچیمی‌پارتلادیردی.
بیر دفعه ده چؤلمه‌یین قاپاغینی گؤتوروب آشین دادینا باخدیم گؤروم بیشیب یا یوخ. سونرا دئدیم، گئدیم زهرانی دا گتیریم بیر آز آش‌دان ایچسین بیر آز دا یاتسین، اویادیم یویوندوروم آخشاما گول کیمی‌اولسون. من ایندی ده بیلمیرم نه اولدو! اوجاق باشینا کیمی‌یادیمدا. اوندان اویانا سئیرک باش کیمی، سئیرک خیال‌لاردی. نه اوجو بللی‌دی نه دیبی. بیلمیرم دونیا نه جور باشیما گلدی. بومبا پارتلادی؟ زلزله گلدی؟ قاز پارتلادی؟ نه اولدو؟ کیم دئیه‌جک کی؟ سحرچاغی‌لارین یوخوسو کیمی، یاری اویاق-یاری یوخولو کیمی‌بیر شئیدی. من یئره ییخیلمیشدیم و دیوراداکی ساعاتین عقرب‌لری باشیما فیرلانیردی. زهرانین گولومسه‌ین شکیلی، آغلاییردی و بیردن بیره یئره دوشدو. رؤیامدا بئله بیر شئی‌لر وار. بعضاً ده زهرانین شکیلین آغلایان کیمی‌دوشونورم و بئیناوا اوشاق او قدر آغلاییر قاب دولور گؤز یاشی ایله و قرق اولور… توبه-توبه! لاپ سفئهله‌میشم من.‌هامی‌سفئهله‌ییب بلکه ده!
علی کی نه دانیشیر نه دینیر! گاهدان زهرام-زهرام دئییب باشینا چالیر.
منه بیری تاپیلمیر دئیه نه اولوب! خانیم دوکتور سیز بیلیرسینیز نه اولوب؟ من نییه گلمیشم سیزین یانینزا؟ بو سؤزلری سیزه تعریف‌له‌دیم نه جور تعریف‌له‌دیم؟
دئییرم زهرانی حه‌یط‌دن گتیرین ایچری دوغوم گونودور هئچ کیم سایمیر! خانیم دوکتور پنجره قاباغیندان گلین بورا! خانیم دوکتور سیز نییه دانیشمیرسینیز؟

* ۲۰۱۷-جی ایلین یاییندا، ایشغالچی ارمنیستان طرفیندن آتیلان خومپاره‌لر نتیجه‌سینده شهید اولان و گول کیمی‌پر-پر اولان زهرانین روحونا اتحاف اولور.

Check Also

نیقالای / رقیه کبیری

نیقالای رقیه کبیری پاییزا ایکی گون قالیر. نوبار قاپیسینین دروازاسینین طاغی آلتیندان کئچیرم. خوشوم گلیر ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *