چئویرن: ایشیق
ترجمه: ایشیق
ایشیق

تکاب(تیکان تپه) شهرینده ادبی گؤروش!

تکاب(تیکان تپه) شهری‌نین شاعر و یازیچیلاری‌نین دعوتی‌ایله «ادبیات سئونلر» اینترنت گروهونون بیر تعداد عضولری تیر آیی‌نین اون‌بئشینده بو شهرده ایکی گونلوک ادبی گؤروش کئچیرتدی. بو ادبی گؤروشون گئدیشاتی باره‌ده «ادبیات سئونلر» گروهونون «ایشیق» سایتینا گؤندردیگی گزارشینی حؤرمتلی اوخوجولاریمیزا تقدیم ائدیریک:

***

«ادبیات سئونلر گروپونون ۱۷ عضوو تکاب شهرینده سئویملی گروپداشیمیز سرکار «خانیم نقدی» و اونون عزیز، مهریبان حیات یولداشی جناب «صمد نصراللهی»‌یه قوناق اولدولار. بو گؤروش تکاب شهرینین تخت سلیمان آدلی ساسانیان و ایلخانی‌لردن یادیگار قالان تاریخی بینانین گؤروشو ایله باشلاندی. سونرا هتل رنجی ده ساعات ۲۲دن تکاب شهرینین ضیالی‌لاری ایله ادبی گؤروش اولدو.
اؤنجه قوناقچیمیزین طرفیندن استعدالی گنج شاعر, آپاریجی جناب «مدنی» تکاب‌دان گلن قوناقلارین باره‌سینده تانیتیم وئردیلر. سونرا ادبیات سئونلر گروپونون ادمینی جناب کریم قربانزاده ادبیات سئونلر هئیتی‌نین باره‌سینده و ادبی گؤروشلرین خالقلار آراسیندا دوستلوق, قارداشلیق یارانماسینا سبب اولماسیندان سؤز آچدی و ادبیات سئونلرین تانینمیش سیماسی سینما، تئاتر آکتیوری شاعر اوستاد «آتش تقی‌پور» اؤز چیخیشی‌ایله مجلیسی آچیق اعلان ائتدی. تکاب شهریندن گنج شاعر «خانیم قمرنیا( تارلا)» تریبون آرخاسینا گلیب، گؤزل شعیرلریندن اوخودولار. مجلیس، ادبیات سئونلر گروپونون گؤرکملی عضوی اوستاد «دوقتور ارشد نظری» جنابلارینین چیخیشی ایله داوام تاپدی. گوروشون داوامیندا تانینمیش ادبیاتشناس و ترجمه‌چی «دوقتور حیدری» جنابلاری چوخ ده‌یرلی دانیشیقلاری ایله مجلیس اشتراکچیلارینی ذوقه گتیردیلر. سونرا اوستاد «جعفر آروینی(تانیش)»، سئویملی نظامی‌پژوه «خانیم رضوان حاجی‌قاسملو(جانای)»، یازیچی و مترجم «خانیم زکیه ذولفقاری»، «خانیم مرجانی» چیخیش ائتدیلر. مجلیسین سون حیصه‌سینده جناب «مرادیان» و «خانیم اذر افشار» تکاب شهریندن اؤز شعرلریندن اوخودولار. مجلیس آراسی موسیقیچی‌لر جناب «مدنی» تاردا و جناب «افشار» آوازدا گؤزل آن‌لار یاراتدیلار. مجلیس، ادبیات سئونلر گروپونون طرفیندن بوتون قوناقلارا آذربایجانین ابدی پارلاق اولدوزو حکیم ملامحمد فضولی‌نین ‌دیوانی‌نین هدیه‌سی‌ایله سونا چاتدی.
سفرین ایکینجی گونو تکاب شهرینین گؤرکملی خطاطی جناب «جعفرعلی سروی(همپا)نین گالریسی‌نین گوروشوایله باشلاندی. سانکی گؤزوموزون اؤنونده خط و رنگ عالمینده بیر انقلاب گؤرونوردو. سونرا مدرن اسلوبلو نقاش، مجسمه‌ساز اوستاد «عسگری»نین گالریسیندن گوروش اولدو. بو گؤروشده اوستاد عسگرینین اوره‌ک سؤزلرین ده دینله‌دیک، صعنتی باره‌سینده اطرافلی معلومات الده ائتدیک. گؤروشون سونوندا اوستاد عسگری قوناقلاری بیر گؤزل موسیقی ایفاسی‌ایله یولا سالدی.
تکاب شهرینده ایلک دفعه گؤرونن بئله بیر ادبی گؤروش و قوناقچیلاریمیز خانیم نقدی و جناب صمد نصرالهی‌نین صمیمیتله ادبیات سئونلری قارشیلاماسی و چکدیگی زحمتلر ایکی گون چکسه‌ده، شبهه‌سیز اوزون ایللر ادبیات سئونلرین یادداشیندا قالاجاقدیر.

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

تکاب(تیکان تپه) شهرینده ادبی گؤروش!

ایشیق
www.ishiq.net

آذربایجان ادبیات و اینجه‌صنعت سایتی

تکاب(تیکان تپه) شهرینده ادبی گؤروش!

ایشیق
www.ishiq.net

آذربایجان ادبیات و اینجه‌صنعت سایتی

تکاب(تیکان تپه) شهرینده ادبی گؤروش!

ایشیق
www.ishiq.net

آذربایجان ادبیات و اینجه‌صنعت سایتی