کوچه‌لره آچیلان یاشیل قاپی‌لار / ائلدار موغانلی

کوچه‌لره آچیلان یاشیل قاپی‌لار
ائلدار موغانلی

شه‌هرین روحونا هوپور سوسوزلوغا آخان باهار؛
یاشیللاشیر قاپی‌لار،
یاشیللاشیر کوچه‌لر،
یاشیللاشیر خزللنمیش شه‌هر؛
دالغا- دالغا آرخالانیر قیزیل دؤیونتولر بیر- بیرینه،
کوچه- کوچه یورویور یاشیل شه‌هر-
خزان ساحیللیگینه.

شه‌هرین روحونا هوپور سوسوزلوغا آخان باهار؛
اوتوز ایللیک تنهالیغینی اونودور غریبسه‌میش قاپی‌لار،
اوتوز ایللیک قه‌هرینی اودور سارالمیش کوچه‌لر،
پاییزلامیش شه‌هر.
قوجاغی آچیلیر آنالار کیمی‌قاپی‌لارین؛
سینه‌سینده پروازلانیر گؤیرچینلر کوچه‌لرین؛
باخیشلاریندا نغمه بسله‌نیلیر-
«انقلاب»‌دان «آزادی»یه جان آتان شه‌هرین.

کوچه‌لره آچیلان قاپی‌لاردا باهار قوخوسو وار،
پاییز قورخوسو وار؛
کوچه‌لره آچیلان قاپی‌لاردا
ایللردیر دؤیوشور پاییز‌لا باهار.
کوچه‌لره آچیلان قاپی‌لاردا یاشیللاشیر-
یئر،
گؤی،
تورپاق،
شه‌هر؛
تای-تای آچیلان آنا قوینوندا دینجه‌لیر یارالی گؤیرچینلر.
عشق اولسون قیزیللیغینا کوچه‌لرین؛
عشق اولسون یاشیللیغینا شه‌هرین.

Check Also

دیل‌سیزلیین دیلی / ع.ن. چاپار

دیل‌سیزلیین دیلی ع.ن. چاپار منه دیل یوخ، دیل‌سیزلییی اؤیره‌دینیز! منه دئیین معناسینی – اوغرون – ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *