«… و این مغاک کثیف!…»/ کیان خیاو (چوخ عزیزیم نادر الهی یه ایتحاف!)

«… و این مغاک کثیف!…»
کیان خیاو

(چوخ عزیزیم نادر الهی یه ایتحاف!)

دوشدن دوشونجه‌یه بیر آددیم یول وار
تیخچینا- تیخچینا قالیر بولودلار
گؤیده گؤی قورشاغی اوچور بیر آنلیق
و این مغاک کثیف
به علّت حضور خودم
یله در باد
و بیر- بیرینه کئچیشمیش ماشینلار و وحشیلیکلر!…
دئییرم
توپال تئیمور توختایاجاقمی‌تاریخده؟
و غزلیمدن بو بئیتی آنلایاجاقمی‌گؤره‌ن:
بو سفیل کوسموسون آرتیق گیزینی آنلامادیم
میتوسوندان، لوگوسوندان جانا گلدیم، جانیم اووووی!…

باخ!
هئچ بیر اؤلچویه باغلانمیر دوشونجه‌لریم
قیشقیردیجی، یاندیریجی، آغلادیجی
و بوتون چلیشکیلری بتیمله‌ین دوشونجه‌لریم
بیر ده پلاتون ایدییاسی
کانتین عاغیل فلسفه‌سی
و نییوتونون ماتئماتیییندن گوج آلان مودئرن بیلیم
و ایچینده موطلق دوزنسیزلییی باریندیران قارماشیقلیق بیلیمی
و سن
سن کی اورتاق بیلگی، اورتاق آماج اوچون جان وئرن شاعیر
و سن
سن کی سونماغا نه‌سه‌ن یوخ شئعیردن باشقا
و من
من کی سؤزجوکلرین بومبالی سالدیریسیندایام
من کی منی اوزو دؤنوک چکدیکده
ونسان ونگوک نه‌سه بیلیرمیش سانکی…

سن کی باکی اولدوزلاری سئییرچیسی
من کی تبریز داغلارینین لابیرئنتلرینده سورگون
سن کی بالتالار آغزیندا مئشه‌لر
من کی ائولرینده وور- توت بیر کیتابلاری اولانلار
سن کی چیچک، اوجاق، آنا، دوست و دوشمان
من کی کلوپلاردا بیلیارد اوینایانلارین ایشسیزلیک آجیسی
و آریق توپوقلو یالین آیاقلاری‌یلا قیزجیغاز- اوغلانجیقلار
سن کی سنه بابک یاراسی قان وئریر هله ده
من کی منه بوزقورد بیر سس سیستئمیدیر خاراب اولوب اولامیر
سن کی
من کی
هر کسه آجلیغی قدر چؤرک وئرین دئییریک…

و عشق، عشق، عشق
سنه بیر گون آغلامایان
منه هپ آجییا چالان بنؤوش آلمالار
و عشق، عشق، عشق
سنه آیاغا دوشمه‌لی ایشارت ائتسه
منه بیر آنلیق آنتونییو ویوالدینین لایت موتیولری
و عشق عشق، عشق
دونیامیزا بیر بوطریده مین بیر سؤزدور اینتئرنئت
و سن، و من
نه باشیمیزدا بیر بیلگین بئینی
نه کؤکسوموزده بیر شاعیر اوره‌یی
یالنیز
گونلر گونلر آردینجا سئیر اولونور
و….
و….
و نئجه دئییم آخی
دونیاسی ائوین اولانین ائوی دونیا اولا بیلمیر
و آیریلیق
بیزیم بیر- بیریمیزدن آیریلدیغیمیز دئییل
دونیانین ترسینه دؤور ائتدیییدیر
و شهریمیز
و شهریمیز… آه، ا…ی قانی سویوق و لیل آیدینلارین پته‌یی
و قلبیمیز
و قلبیمیز کی سنینکینی بیلمیرم
و قلبیمیز کی منیمکی سینیق کوزه
اؤلولرین کول قابی
و قلبیمیز کی دویمادی منیمکی آراز قیزیندان
دویمایاجاق دا آرازدا آغ کؤپوکلرین اوستونده یووالانسام دا
و عشق، عشق، عشق
اوره‌ییندن دوداغینین اوزونه
یاشیلباش سونالار چیخیر اؤپوشلری
جانیم آراز قیزینین!
و سن
و من
سن کی ایلیق بیر ایچدنلیک
من کی بو آی اوکتوبر آیی
من کی آراز قیزینی تبریک ائدیرم ایچیمده
لئنین مظلوم کوتله‌لره پیروز اولموشدور!
من کی بیر گون تاپاجاغیق دئیه حاققین یولونو
من کی
سن کی
و او آراز قیزی کی غایه آنلامدیر منیم اوچون
و او آراز قیزی کی
دوشدن دوشونجه‌یه بیر آددیم یولدور
و او آراز قیزی کی
تیخچینا- تیخچینا قویموش بولودلاری
و من
و من
و این مغاک کثیف
به علت حضور خودم
یله در باد!…

و سن، سن کی یارالیسان
و سن، سن کی سنسیزلیک
اولونماز بیر خسته‌لییه یاخالانمیش کیمی‌محکوم اولدوغومدور
و من، من کی سنین یاران دئییلم
یارالارینین ایچی‌یم
آجی- آجی آغریییرام
گؤیون- گؤیون گؤینه‌ییرم
و عشق، عشق، عشق
یعنی سندن
یعنی سنلی و سنسیز
یعنی آراز قیزینین هر آددیمیندان
خبر توتماق ایسته‌ییرم…
۱۳۹۶/ ۲/ ۸

Check Also

دیل‌سیزلیین دیلی / ع.ن. چاپار

دیل‌سیزلیین دیلی ع.ن. چاپار منه دیل یوخ، دیل‌سیزلییی اؤیره‌دینیز! منه دئیین معناسینی – اوغرون – ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *