ماراغالى تارزن «بؤیوک آغا»یا اتحاف/ ح. هریزلی

ماراغالى تارزن «بؤیوک آغا»یا اتحاف
ح. هریزلی

دریاى جنون قاینادى فرزانه‌لییندن
مئى مات قالیب نحوه‌ى مستانه‌لییندن
هرکیم دادا سئودا مئیینى تار چاناغیندان
سرمست چکر عربده میخانه‌لییندن
من مئى دیله‌دیم سرخوش اولام بیر نئچه ساعت
سن ده یانار اود سرخوشو پروانه‌لییندن
گزدیکجه فوسونکار الین پرده‌لر اوسته
تار پرده آچیر سیررى غریبانه‌لییندن
تامسیندى کؤنول دوم-دورو دویغو بولاغیندان
اومدوم ده‌لی‌لیک نعشه‌سى دیوانه‌لییندن
چیخسان اوزه هئچ حیرز سنى ساخلایا بیلمز
گیزلن صدفى فقرده دوردانه‌لییندن
سلطان هنرسن باشینى دیک توت! اوتانسین-
شاهلار‌هامیسى هئیبت شاهانه‌لییندن
ایندى دیریسن قیمتینى یاخشى بیلن یوخ
اؤلجک دئیه‌جکلر سنین افسانه‌لییندن
اصحاب قلم اهل هنر یاندى بو یئرده
چیخمادى «هریزلى» سسى مردانه‌لییندن
یاى-۱۳۸۴

Check Also

دیل‌سیزلیین دیلی / ع.ن. چاپار

دیل‌سیزلیین دیلی ع.ن. چاپار منه دیل یوخ، دیل‌سیزلییی اؤیره‌دینیز! منه دئیین معناسینی – اوغرون – ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *