«خسرو باقرپور»دان ایکی شعر / چئویرن: ائلدار موغانلی

«خسرو باقرپور»دان ایکی شعر
چئویرن: ائلدار موغانلی

 ۱- دلیجه‌سینه سئویرم سنی…
۱- (دیوانه وار دوستت دارم…)

سئویرم سنی:
ائله امانسیز،
دنیزلری جوشدوران
صحرالاری یویان
کئفلی یاز یاغیشی‌نین
دلیجه‌سینه یاغماسی کیمی.

سئویرم سنی:
ائله صبیرسیز،
داغ اته‌یی‌نین گئنیش‌لیگینده
یوواسی اوستونده قیرغی دولانان
و جوجه‌لری آچیق آغیزلاریلا
گؤیون دیمدیگیندن اؤلوم اودان
آنا کهلیگین اوره‌ک دؤیونتوسو کیمی.

سئویرم سنی:
ائله آشکار،
اوره‌ییمده گؤیه‌رن بو وحشی لاله کیمی؛
ائله آیدین،
منی گؤزلرینه سسله‌ین بو اولدوز کیمی؛
ائله قیزغین،
سیچراییر کولومدن قیغیلجیم
و یاندیریر گؤیون سینه‌سینی.

دلیجه‌سینه سئویرم سنی.

۲- فیرتینالی‌دیر هله‌ دنیز…
۲- (دریا هنوز طوفانیست…)

دونن گئجه نه دئدین سن،
هله‌‌ده فیرتینالی‌دیر دنیز
و یاغیشلی‌دیر لیمانین‌هاواسی؟
من ماهنیمین وحشی سوسغونلوغوندا
هر گئجه سنین خاطیره بنؤشه‌نی
الیمده‌کی گؤروش فاناری‌لا
گئجه وورموش دالغالارین گؤیرمیش ماویلیگیندن درمیشم.
من ساحیلده‌ اؤلموش میرواری‌لارین اهنگ آهیندا
پریشان غرور اولدوزلارینی تاخمیشام.
دونن گئجه نه دئدین سن،
هله‌ده اینله‌ییر دنیز؟
و دالغا قیزلاری
سرت قایالارا چیرپیر اؤزلرینی
و آخشام قانیندا یویورلار
پریشان ساچ‌لارینی.

منبع: فصلنامه ترکی- فارسی «آذری» شماره ۳۰ و ۳۱- ص ۱۵۰

شعرلرین فارسجا نوسخه‌سینی شاعرین فیسبوک صحیفه‌سینده اوخوماق اولار. Khosro Bagherpour

Check Also

۱۰ شعر از اورهان ولی کانیک / ترجمه: مجتبی نهانی

۱۰ شعر از اورهان ولی کانیک ترجمه: مجتبی نهانی (برگرفته از کتاب «ترانه‌ی پشت بام‌ها ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *