کیتاب رفیمیزده نه‌لر وار؟ (۴) / تانیتدیران: سحر بارانی

کیتاب رفیمیزده نه‌لر وار؟ (۴)
تانیتدیران: سحر بارانی

آغ مقبره‌لرین شاعرلری
• چاغداش آذربایجان شعر آنتولوژی‌سی «آلتی جیلد» (مجموعه شعر معاصر آذربایجان)
• حاضیرلایان: سعید موغانلی- صالح سجادی
• اؤن سؤز: همت شهبازی
• گرافیست: آتابای تیکان تپهلی
• انتشارات شهریاران/ تهران/ ۱۳۹۵
شعر آنتولوژی‌لری ادبیات دونیاسینین ائنسیکلئوپدیاسی‌دیر. زامانین بیر بؤلومونو آراشدیرمانین ان اولاسی هم ده ان آسان یوللاریندان بیری او چاغا عایید بیر آنتولوژی‌نی اینجه‌لمک‌دیر. شاعیرلر بیر توپلومون دانیشان دیللری‌دیرلر. بو دا بو دئمک‌دیر کی بیر توپلومون قایغی‌لاری، یاشام طرزی، سیخینتی‌لاری و س… ان اینجه دئتای‌لاری ‌ایلا شعرلرده ایضاح ائدیلیر. بونا گؤره ده آنتولوژی‌لر تاریخی توپلومسال، جغرافیا و باشقا علمی‌ساحه‌لرده تحقیق و آراشدیرماق اوچون بلکه ده ان صمیمی‌قایناق‌دیرلار.
آغ مقبره‌لرین شاعیرلری چاغداش آذربایجان شاعیرلرینین شعرلرینی احتوا ائدن آلتی جیلدلیک بیر کتاب سری‌سینین ایکی جلدینین آدی‌دیر. ۹۰۰ صفحه‌ده، ۱۵۰ یه یاخین شاعیرین شعر یا دا شعرلری بو کیتابلاردا توپلانمیشدیر. هله‌لیک ایکی جیلدی یایینلانان بو سری، آلتی جیلدده حاضیرلانمیش، ادبیات ماراقلی‌لارینا سونولاجاقدیر. ایلک ایکی جیلدده چاغداش سربست شعره (حبیب ساهردن بو گونه قدر) یئر وئریلمیشدیر، چونکو سربست شعر، چاغیمیزین ان غالیب شعر قالیبی کیمی‌تانینمیش‌دیر. اوچونجو جلدده (روشنایی در بیات ترک) تانینمیش شاعیرلرین سئچیلمیش شعرلری فارسجا چئویری‌لری ایله بیرلیکده، اردیبهشت آییندا، تهران کیتاب سرگیسینده یایینلاناجاقدیر. دؤردونجو جیلدی ده سایین موغانلی و سجادی جناب‌لاری کلاسیک شعره و داها اسکی شعر سبک‌لرینه و عمومیتله قوشما، غزل، مثنوی و دؤردلوک یازان (قیرخینجی، اللینجی و آلتمیشینجی ایللرین یارادیجی شاعیرلرینه) اختصاص وئرمیش‌لر. بئشینجی جیلد ایسه اؤز شعر دیلی، شعر سبکی اولان شاعیرلر و یا ادبی جریان یارادان شاعیرلره و عمومیتجه پستمدرن شعر آنلاییشینا اختصاص وئریلمیشدیر.‌ها بئله آلتینجی جیلد تماماً قادین شعرینه اؤزل بیر کتاب و آنتولوژی اولاراق حاضیرلانماقدادیر.

آنا وارلیق
• مدیر مسئول: آیدین سرداری‌نیا
• سردبیر: ابراهیم رفرف
• امور فنی-هنری: سعید موغانلی
• اوچ آیلیق تورکجه-فارسجا دیل ادبیات کولتور هنر آراشدیرمالار درگیسی

آنا وارلیق درگیسی‌نین ایلک ساییسی دوکتور جواد هئیت‌ین خاطیره‌سینه اختصاص وئریله‌رک یایینلاندی. بو درگی اؤزونه معنوی گؤره‌و بیلدییی اوچون ایلک سایی‌سینی حؤرمتلی تورکولوق، تاریخچی، دیلچی سایین دوکتور هئیتین پارلاق یاشامی، یارادیجیلیغی و دیرلی تحقیق‌لرینه اختصاص وئردی.
دوکتور جواد هئیت ایراندا ایلک قلب و بؤیرک عملیاتینی گئرچکلشدیرن جراح اولموشدور، علمی‌چالیشمالاریندان دولایی ۱۳۴۲-جی ایلدن اعتبارا اولوس‌لار آراسی جراحلار بیرلییینده ایرانین رسمی‌نماینده‌سی کیمی‌تانینمیشدیر،‌هابئله ۱۳۶۲ ده جراحلیق ساحه‌سینده پارلاق چالیشمالاریندان دولایی اولوس‌لار آراسی جراحلیق آکادمی‌سینین عضوو اولموشدور. علمی‌آراشدیرمالار، تألیف‌لر و مقاله‌لرین یانی سیرا، تورکولوژی، تاریخ، فلسفه و اسلام‌‌شناسلیق حاققیندا دا نظر و اثر صاحبی اولموشدورلار‌ . انقلابدان سونرا بیر نئچه یاخین دوست‌لارینین ایش‌بیرلییی‌ایله وارلیق درگیسی‌نی ایکی دیلده (تورکجه-فارسجا) ۳۵ ایل بویوجا آرا وئرمه‌دن یایینلامیشدیر. بو درگی‌نین سون سایی دوکتورون وفاتیندان نئچه گون اؤنجه یازیچی‌لار هئیتی چالیشمالاری‌ایلا یایینلانمیشدیر.
(دوکتور هئییتین اثرلری تورکولوژی ساحه‌سینده: «سیری در تاریخ زبان و لهجه‌های ترکی»، دونیاجا مشهور تورک شوناس گرهارد دؤرفر و آیریجا دوکتور حمید نطقی‌نین اؤن سؤزو ایله نشر اولوبدور.)
آنا‌ وارلیق ۳۵۲صفحه‌ده، دکتر براهنی، آنار رضا، پروانه ممدلی، دوکتور هئیتین اؤز اثرلریندن سئچمه‌لر، ابراهیم رفرف وارلیق درگی‌سینین باش یازاری، حسن راشدی، پروفسور سما باروتچو، پروفسور اؤزکول چوبان اوغلو، پروفسور مورسل اؤزتورک، پروفسور دورسون ییلدیریم، مرتضی مجدفر، اصغر زارع کهنمویی رحیم رئیس‌نیا و بیر چوخ دیرلی یازارلارین مقاله‌لری خاطره‌لری و اثرلرینی احتیوا ائتمیشدیر. آیریجا ۱۰۰صفحه‌لیک بیر آلبوم دا دکتر هئیت‌دن بلکه هئچ یئرده یایینلانمایان شکیل‌لر ده بو درگی‌ده یئر آلیب‌دیر.
آذری فصلنامه‌سی، درین سئوگی و سایقی ایله «آناوارلیق» درگیسینین مطبوعاتیمیزا قوشولماسینی بؤیوک و گؤزل بیر اوغور حساب ائده‌رک، اور مجله‌ده چالیشانلارا بؤیوک نائلیتلر آرزولاییر. بوتون آنا دیللی مطبوعاتیمیزی باغرینا باسیر، مدنیتیمیز و دیلیمیز یولوندا چالیشان شخصلری و موسسه‌لری همرأیلیک و بیر دیللیگه دعوت ائدیر.

• بو قفس ده اوچدو بلکه…
• سئچیلمیش شعرلر توپلوسو
• نـادر الـهـی
• آواز یایین ائوی/ پاییز۱۳۹۵/ تهران
• حاضیرلایان: سعید موغانلی
• گرافیست: نسترن الهی

اوزون سوره سوسان غزل دیلی آچیلدی، آچیلدی تورک دونیاسینین عینی دئمک!
نادر الهی چاغداش شعریمیزین سسسیزلیگه چؤکموش دیلی ایدی. بو گونه قدر شعرلرینی یایینلامایان شاعیر، سونوندا سکوتونو پوزوب شعر توپلوسونو یایینلاماق قرارینا گلدی.
یازیلی بیر کیتابی اولماسا دا، شعرلری مثل کیمی‌ائلین دیلینده دولانان شاعیر، سربست شعرده ده کلاسیک شعر قدر مهارتلی و باشاریلی اولماسینی، یازدیغی آخیجی، درین و گوندم شعرلری ‌ایله ثبوت ائتمکده‌دیر.
«بو قفس ده اوچدو بلکه» بو ایلین پاییز فصلینده، حورمتلی نادر الهی‌نین یاخین دوستلارینین اصراری و امه‌یی ایله ۱۸۹صفحه ده نشر ائدیلدی.
شعرلر اونون روحونون طبیعتیندن جوشوب آخان دورو بولاقلاردیر، مضمونلاری، عشق، عؤمرون چئشید‌لی دوراقلاری، عدالتسزلییه قارشی اعتراض، دوغا ایله ایچ ایچه‌لیک، کائناتا باغلیلیق‌دیر، بونلارین یانی سیرا بوتون شعرلرینین بطنینده سطیر-سطیر دویولان باغیمسیز بیر سئوگی وار.
شعرلری اینجه‌لیک‌له سئچیلمیش اولان بو کیتاب، بلکه ده تورک ادبیاتیندا اوخودوغوموز أن یاخشی و زنگین کیتاب‌لارین آراسیندا یئر آلیر.
کیتاب، محجوب شاعیریمیز نادر الهی‌نین شعرلری یارادیجیلیغی هم ده حیاتی حاققیندا دونیالارجا اونلو آذربایجانلی شاعیر رامیز روشن، ودود دوستی و سعید موغانلی جنابلارینین گؤزل مقدمه‌لری‌ایله باشلانیب، اوخوجو بیلمک ایسته‌دییی هر بیر خیردالیقلاری بو مقدمه‌لرده تاپا بیلر.
بو کیتاب و سایین نادر الهی‌نین حاققیندا، آذری درگی‌سینین ۲۸و ۲۹-جو سایی‌سیندا گؤزل و اطرافلی یازی‌لار و مقاله‌لر گئتمیشدیر. آذری‌ مجله‌سینین اؤتن ساییلاریندا درج اولونموش بو مقاله‌لرین اوخوماسینی، درین و تاثیرلی بیر اوخونوش اوچون، سایین اوخوجولارا اؤنه‌ریریک.

  • نــفــس
    • شعرلر، پوئمالار، نغمه‌لر (ایکی جیلد)
    • رامـیـز روشــن
    • انتشارات پارلاق قلم/ بناب/ ۱۳۹۵
    • حاضیرلایانلار: بهرام سورگون – پریسا داداشپور
    • گرافیست: آتابای تیکان تپه‌لی

۱۹۴۶جی ایلده باکیدا آنادان اولدو، دیلچیلیک بؤلومونده یوکسک تحصیلاتینی بیتیردی و سونرالار فیلمنامه یازماق اوزره تحصیل ائتدی و بیر اوستاد کیمی‌عالی تحصیل اوجاقلاریندا تدریسه باشلادی. رامیزین ۱۹۷۰-جی ایل ایلک شعر کیتابی چاپدان چیخدی. شاعیرین کیتابلاری، گؤی اوزو داش ساخلاماز ۱۹۸۷، کپنک قانادلاری ۱۹۹۹، و۲۰۰۶جی ایلده سون اولاراق نفس- کیتابلار کیتابینی نشر ائتمیشدیر. رامیزین بیر سیرا حئکایه‌لری، مشهور داش پووئستی و بیر نئچه سناریوسو دا یایینلانمیشدیر و او سناریولار اساسیندا نئچه فیلم چکیلمیشدیر.
نفس بئش کتابدان عبارت‌دیر. ۱. گؤی اوزو داش ساخلاماز (شعرلر، پوئمالار) ۲. کپنک قانادلاری(نغمه‌لر) ۳. بیر یاغیشلی نغمه (ایلک شعرلر) ۴.‌هامی‌اوغول بؤیوتموشدو (پووئست‌ و حکایه‌لر) ۵. آیین او بیری اوزو (ائسسهلر).
کئشکه دونیایا بوتون انسانلار رامیزین گؤزوندن باخایدیلار، او زامان جنتی یاشاماق بو دونیادا ممکون اولاردی. آخی رامیز انساندیر و انسانلیق‌لار شاعری.
گل ال اله توتوب گئدک / گئدک بیز اولمایان یئره
دردی غمی‌آتیب گئدک / دردیمیز اولمایان یئره…

• اوچماق دیله‌ییر دورنالارین حسرتی منده…
• (رحمتلیک عباس بابایینین حیاتی و یارادیجیلیغی)
• مقالهلر، شعرلر و یادداشتلار توپلوسو
• نازخند صبحی زنگانلی
• نشره حاضیرلایان: سعید موغانلی
• نشر آواز – قیش -۱۳۹۵
• [یاشماق سیرا کیتابلاری] گرافیست: اوختای ساحیر
حورمتلی آراشدیریجی و یازیچی خانیم نازخند صبحینین چالیشمالارینین نتیجهسینده یایینلانان بو کیتابدا رحمتلیک عباس بابایینین حیاتی و یارادیجیلیغینا یازیلان مقاله‌لر، مقدمه‌لر و شعرلر توپلانیب و بیر مقدمه و موخره ایله نشره حاضیرلانیبدیر.
اثرده آذربایجانین تانینمیش تنقیدچیلری، دیلچیلری، ادیب و شاعیرلری اؤز اورک سؤزلرینی قید ائدیبلر. اثرلری گئدن حورمتلی یازیچی، تحقیقاتچی و شاعیرلر بونلاردان عبارتدیرلر:
دکتر حسین محمدزاده صدیق / نازخند صبحی / محمدرضا کریمی‌/ علی اوجاقلو- سرین / شهرام یوسفی / دکتر بیوک مولایی / تئلناز زنگانلی / حامد رحمتی / علیمحمد بیانی/ ابوالفضل ملکی- آرتان زنگانلی / هوشنگ باقری- حیران / پیمان بازرگان / پرویز قاسمی‌افلاک / علی عطایی یاشار / رضا دژبان- آراز زنگانلی / کاظم تیموری- اومود زنگانلی / صمد مرادی / عاشیق مسلم عسگری / ارشد نظری / جلیل درهمجانی- تایماز / حسین رزمی‌/ عیسی قاسمپور- افشار زنگانلی / پرویز سودی – دالغا / عباس کریمی- اوخ / عبدالله فرجی- اینجیک / امیر نصیری- ائلمان / نظری م-ص ناصح / حسن رفیعی- آرار زنگانلی / رضا قاسمپور- یاشار زنگانلی / حسن حسینعلی / محمد رزاقی زنگانلی / شعبان کریمی/ جاوید ایماناوغلو / ایوب نوریزاده /
با یادی از: توکل غنیلو / عبدالله مرادی / حمیده رئیسزاده- سحر / حبیب ساهر / عمران صلاحی / بختیار واهابزاده / ناظم حکمت / اوزئییر حاجیبیلی / عمادالدین نسیمی‌/ علیآغا واحد / استاد شهریار / معجز شبستری / نیما یوشیج / بیدل دهلوی / مولانا رومی‌/ مولانا فضولی و … استاد بابایینین، بیر سیرا چاپ اولمامیش شعرلری… و بیر سیرا کیتابلارا یازدیغی مقدمهلر و گیریشلر…
بو کیتابدان اؤنجه خانیم صبحینین ایگیرمی‌عنوانا یاخین تورکجه- فارسجا اثرلری (رومان، حکایه، تحقیقی و آراشدیرما اثرلری، کودکان کار، قادین حقوقو، شناختنامه و…) ایشیق اوزو گؤرموش و اوخوجولار طرفیندن لایقینجه قارشیلانمیشدیر.

•‌هامی‌اللرینی بوغور
• شعر توپلوسو
• وحید ملک
• گرافیست: رضا غفاری
• انتشارات انور/ تبریز/ ۱۳۹۵

(سن‌سیزلیین سونراسیندان دانیشدی / اونودولموش بیر رومان / دایان دا ائشیت / گؤزلرینده بیر یول وار، / سونوندا بیر کیشی / داریخمالارینی اوخشاییر.)
وحید ملک ۱۳۶۹دا تبریز شهرینده آنادان اولموش، حقوق اوزره عالی تحصیلینی بیتیرمیشدیر. سادهجه شعر ساحه‌سینده دئییل، پیئس و حئکایه یازماغا دا ماراقلی اولان شاعیردن یاخین گله‌جکده حئکایه و پیئس توپلوسو دا نشر اولوناجاقدیر.
چوخ شاعیرلر کیمی‌چاغداش دیله مالک اولان شاعیر، شعرلرینده سئوگی، یالقیزلیق، دونیا و عدالت قونولاریندا یازماقلا باشلاییب شعر آددیم‌لارینی، اویسا کی هر کسین آسانلیقلا آلا بیلمه‌یه‌جه‌یی بیر یئر قازانیب‌دیر چاغداش ادبیاتین گؤوده‌سینده. دیلی کسگین سرت و باخیشی اؤزل‌دیر دونیایا. شعر تسلی‌دیر روحونون عصیان‌هایقیریشلارینا، اونون اوچوندور بلکه شعرلرینده‌کی اگزیستانسیال فضالار دیم دیک دورور اوخوجونون قارشیسیندا و دیکسیدیریر اونو. یاراتدیغی گؤزل و اؤزل ایماژلار هرآن اوخوجونو درین هم ده اولدوقجا رنگلی بیر سیاحته چیخارتمیش کیمی‌دیر.

• قــار آدام
• شعرتوپلوسو
• معصوم جبارپور
• انتشارات یاشار قلم/ تبریز/۱۳۹۵
• گرافیست: وحید دولتشاهی
معصوم خانیم جبارپورون اوزون ایللردن بری چالیشدیغی ادبیات ساحه‌سینده ایلک آنا دیلینده یایینلانان کیتابی‌دیر قار آدام، بوندان اؤنجه فارسجا بیر شعر توپلوسو دا یایینلانمیشدیر همین شاعیردن.
قادین دیلی و قادین ادبیاتی دئمک اولار ادبیاتین دوغولوش چاغیندان آتا‌بی‌لیک و کیشی محورلی قانون‌لار و دونیا باخیشلارینا معروض قالاراق بلکه ان مظلوم و ان کؤلگه‌ده قالمیش ادبیات‌دیر دونیا چاپیندا. بونا باخمایاراق یاخین کئچمیشدن باشلانان بیر دئوریم عصیانی‌دیر بوگونکو قادین شعری. مین عصرین دینه‌نی آلتیندا تاپدالانسا دا ایندی بوتون گوجو ایله واراولوشونو دونیا قولاغینا باغیرماقدادیر.
معصوم خانیمین شعرلری عصیان‌دیر. بوتون ادبی معیارلاری قورویاراق قادین اولدوغونو هم ده شاعیر اولدوغونو اؤزل دیله، وارلیغا صاحب اولدوغونو کیشی‌ محور دونیانین گؤزونه سوخماق‌دیر شعرلری. کلمه‌لرین باشیندان وار گوجوایله سیخینتیلاری سؤکوب آتماق‌دیر. شاعیر قادینین ایچ دونیاسینی بوتون ظرافت‌لری‌ایله و اؤزل اولاراق اؤز شخصی دویغولارینی ان اینجه شکیلده گؤسترمه‌یی باشارمیش‌دیر.

• دومانلی مکتوبلار
• منثور شعرلر
• لیلا خدایی
• گرافیست: رضا غفاری
• انور یایین ائوی/ تبریز/ ۱۳۹۴/ ایکینجی چاپ

«زمان دوردو، سمت ایتدی. بیر آن اوشودوم! بارماقلاریم سویوقدان چاتلادی حلبی‌ده اود یاندیردیلار. ائله بیلدیم کی بیر ایگیدی مئیدانچادا آسدیلا. قارا قارقالار، آنالارین آغلاماق سسینی اؤز قیشقیریق‌لاریندا گیزلتدیلر. اوزاقدان ایش‌سیز کیشی‌لر گلیب وحشت نمازی قیلدیلار.»
سیردیر سئوگی. اونو بیر تک انتظار آنلاریندا داها درین آنلاماق اولور. دومانلی مکتوبلار اوتوز بیر مکتوبدان اولوشان انتظاردیر. یازارین روح دولایی‌لاریندا جوجرن سؤزجوکلردیر، بویلانیر دومانلی دیوارلاردان. بو کیتاب، سئون بیر قادینین أن گیزلین حیس‌لری، قایغی و گؤزله‌ییش گؤسترگه‌سی‌دیر. چتین دئییل آنلاماسی، تکلف‌دان اوزاق، عادی جمله‌لرله یازیلیب. چتیندیر آنلاماسی. بیر قادینین روحوندان چیخماق اولارمی، ایتمه‌دن خیال کوچه‌لرینده!
ایلک مکتوبلا باشلانان بو کتاب، سایین استاد ابولفضل علی‌محمدی‌نین مکتوب‌لار حاققیندا یازیلمیش گؤزل و درین آچیقلامالار، سایین مشروطه‌چی جنابلاریندان و سایین دکتر محمدحسین مبین‌دن بیر مکتوبلا سونا چاتیر.

• همه ترک‌های دنیا
• تحقیقی-تاریخی
• افشین امیری ججین
• گرافیست: اوختای ساحیر
• انتشارات اندیشه نو/ تهران/ ۱۳۹۵
• [یاشماق سیرا کیتابلاری]

همه ترکهای دنیا، نگاهیست اجمالی به پراکندگی جمعیت ترکان در چهارسوی کره خاکی. این کتاب به بررسی آماری کشورهای محل سکونت ترکان، جمعیت، نژاد، لهجه و همچنین محاسبه آماری-درصدی ترکان در کشورهای مورد بحث میپردازد. این کتاب بر مبنای منابع ترکی، روسی و انگلیسی طی چهار سال تحقیق گردآوری و تدوین گشته و مولف در صدد ارائه معرفی پیشینه نژادی و زبانی ترکان دنیاست. با توجه به وسعت منابع مورد مطالعه، کتاب حاضر میتواند منبع ارزشمندی برای مطالعه و تحقیق محققین بوده و همچنین با توجه به تحلیل آماری-نژادی و زبانی می‌توان از آن به عنوان خلاصه‌ترین جغرافیای ترکان دنیا نیز استفاده کرد.

  • قارداش آندی
    بولود قاراچورلو
    (سهندین بوتون شعرلری)
    حاضیرلایان: سعید موغانلی
    انتشارات افکار- تهران
    بیرینجی چاپ ۱۳۹۱/ گرافیست آیاز تبریزلی
    ایکینجی چاپ ۱۳۹۵/ گرافیست: جواد آتشباری

    معاصر آذربایجان شعری‌نین گؤرکملی نماینده‌لریندن بیری بولود قاراچورلو (سهند) قیرخینجی ایللرده آنا دیللی شعریمیزین چیچکلنمه‌سی اوغروندا چوخ دیرلی ایشلر گؤرموش، اونون ایکی جیلدلیک «سازیمین سؤزو» کیتابی، صمدین «پاره پاره»سیندن (۱۳۴۲) سونرا تبریزین شمس نشریاتی ۱۳۴۳-جو ایا چاپ اولان شعر مجموعه‌سیدیر. اولو شاعیر بؤیوک باجاریقلا دده‌قورقود بویلارینی سربست وزن‌ده شعره چکمیش و اؤز فلسفی و اجتماعی فیکرینی درین و دولغون بدیعی واسیطه‌لرله ائپیلوق و پرولوق شکلینده بویلارین اولی و سونوندا افاده ائتمیشدیر.
    سهندین سازیمین سؤزو کیتابی او دؤرده شعریمیزه بؤیوک تکان وئرمیش و بیر چوخ شاعری اؤز دیلینه و بدیعی اوسلوبونا حئیران ائتمیش و آرخاسیجا چکمیشدیر. نه یازیق کی شاعیرین ساغلیغیندا اونون بو شاه اثری تام شکیلده ایشیق اوزو گؤرمه‌دی. سونرا سهندین «سئچیلمیش اثرلری» باکی‌دا باشقا شعرلری علاوه اولماقلا ۱۹۸۴ همان نشرین اساسیندا ۲۰۰۶-جی ایل ایسه لاتین الیفباسیندا چاپ اولدو.
    شاعیرین باشقا اثرلری و اونون اؤز سسی‌ایله لئنته یازیلمیش شعرلری قوجامان ادیبیمیز اوستاد محمدعلی فرزانه یانیندا امانت اولاراق قالمیشدی. استاد ساغلیغیندا اونلارین چاپی اوچون تشبث ائتدی، آنجاق بوردا ایش باش توتمادی. نهایت سوئدده اونلاری چاپ ائتدیره بیلدی. اوستاد فرزانه‌نین نشرینه اساسلاناراق سونرالار ختر نشریاتی طرفیندن آقای بهروز ایمانی رئداکته‌سی ایله ایکی جیلدده ۱۳۸۸-جی ایلده تبریزده تکرار چاپ اولوندو. فرزانه‌نین نشره حاضیرلادیغی، سهندین باشقا بیچیم شعرلری گنج نشریاتی طرفیندن نشر اولوندو.
    و سونرا دوکتور صدیق‌ین رئداکته‌سی ایله ۱۳۸۹-جی ایلده تبریزده اختر نشریاتی طرفیندن نشر اولوندو. سهندین بوتون شعرلری (دیوانی) ایندیه‌دک الده اولان شعرلری‌نین تام و کامیل متنی «قارداش آندی» باشلیغی ایله، حؤرمتلی ژورنالیست، شاعیر و ناشر دوستوموز سعید موغانلی‌نین رئداکته‌سی‌ایله، ۱۱۰۰ صحیفه‌ده گالینگور جیلدلی، رقعی قطعینده، نفیس شکیلده ۱۳۹۱-جی ایلده «نشر افکار» نشریاتی واسیطه‌سی ایله چاپ اولوندو.
    و بو ایلین (۱۳۹۵) قیشینین سون گونلرینده تکرار ایکینجی چاپی همن انتشارات طرفیندن باشقا بیر بیچیم و گورونوشله یئنی‌دن یایینلاندی.
    کیتاب، اوچ اساس بؤلومه و بیر نئچه آیریم‌لارا آیریلمیش‌دیر: ایلک آیریمدا، غلامحسین ساعدی، استاد فرزانه، گنجعلی صباحی، اوستاد باریشماز، علی تبریزلی، سعید موغانلی، علیرضا رشیدفر و محمدرضا راثی‌پورون یازی‌لاری یئرلشمیشدیر و بیرینجی بؤلومه: ۱.«دیوان» مختلیف بیچیم‌لرده یازیلمیش آذربایجانا شعرلر، ۲. «فارسجا شعرلر» ۳. «سازیمین سؤزو»؛ ایکینجی بؤلومه: دده‌مین کیتابی؛ اوچونجو بؤلومه ‌ایسه: «قارداش آندی» داخیل ائدیلمیشدیر. کیتابین سونونجو آیریمی‌شاعیرین فوتو شکیللریندن عبارتدیر. دئمک اولار کی شاعیرین ایندیه‌دک ان مکمل «سهند دیوانی» اوخویاجاغینیز بیر دیوان‌دیر. بیز سعید موغانلی‌نین بو بؤیوک ایشینه گؤره تبریک ائدیر و اونا بوتون دیرلی ایشلرینده اوغورلار آرزولاییریق.  اوزون و اوزو آغ یاشاسین.

    آذری مجله‌سی – ۲۰-جی سایی‌سی

Check Also

عاشیق عدالت وفات ائتدی

عاشیق عدالت وفات ائتدی یاییلان خبرلر اساسیندا، چوخ تاسفله دونیا شؤهرتلی آذربایجان امکدار اینجه صنعت ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *