گؤی قورشاغی / ائلیار پولاد

گؤی قورشاغی
ائلیار پولاد

گونون اورتا چاغیدیر. یاز یاغیشی شیدیریغی یاغیر. تله‌سرک ائوه گلیرم. اوست-باشیم تامام ایسلانیب. ایچری گیردیکده، ائله گیره‌جکده اوست پالتاریمی‌سویونورام. عایله‌م بیرلیکده ائوده‌دیرلر. من ایچری گیرر _گیرمز، اوغلوم قاچیر قاباغا:
– سالام آتا، آخشام سؤز وئرمیسن بو گون منله توپ اوینایاسان.
من ده جاواب وئریرم:
-اوغلوم باییردا یاغیش یاغیر ، ایندی اولماز. نئینک، یاغیش کسسین گئدیب حیه‌تده سنیله توپ اوینارام.
زامان اؤتور و یاغیش کسیر. اوغلوم دا مندن ال چکمیر. نهایت بیر یئرده حیه‌ته چیخیریق.‌هاوا چوخ اوره‌یه یاتیملی‌دیر. یاز یاغیشیندان سونرا هر نه تمیز و گؤیچک گؤرونور. اورکلره سئوینج پایلانیر. کوچه‌دن اوشاقلارین و یئنییئتمه‌لرین‌های–کویو گلیر. اونلاردا یازین ایلیق‌هاواسیندان ذوق آلیرلار. ائله بو آن اوغلوم هیجانلا، بارماغیلا گؤی عالمین منه گؤستره‌رک سئوینجله قیشقیریر:
– آتا، آتا . باخ «رنگین کمانا» باخ! نئجه‌ده گؤزلدیر؛
من ده گوی قورشاغینا باخدیقدا، اوز توتدوب اوغلوما دئییرم:
– هه چوخ قشنگدیر، آما او «رنگین کمان» دئییل. او «گؤی قورشاغی»دیر.
اوغلومون چؤهره‌سینده اولان تعجبلی حیسی دویورام. او زامان اوغلوم سؤزه گلیر:
-آتا. او «رنگین کمان»دیر. ائله آنام دا، کوچه‌ده‌کی اوشاقلار دا و حتا باخچامیزداکی معلیمه ده اونا «رنگین کمان» دئییر. سن منه یالان دئمزدین، بو دؤنه منی نییه آلدادیرسان؟
منی فیکیر گؤتورور. بو صؤحبتلر منی بیر آز سارسیدیردا. اوغلوم دا بو حیسی دویاراق منه دئییر:
– آتا نه اولدو . نییه کئفسیز اولدون؟
بو دؤنه من اوغلوما یالان دانیشیرام:
– اوغلوم بیر آز باشیم آغرییر. سن بو دفه گئت کوچه ده یاشیدلارینلا اوینا. سؤز وئریرم، بیر آزدان گلیب من ده سنلن اوینارام.
اوغلوم کؤنولسوز مندن آیریلیب، کوچه‌یه گئدیر. من ده حیه‌تین پیلله‌سینده اوتوروب خیالا دالیرام. ائله او زامانی دوشونورم کی اوغلوم یاشیندا اولاردیم. گونلرین بیر گونو آنام حیه‌تده دولاشیر و سیل-سوپورله مشغول ایدی. من ده اؤز- اؤزومه نسه حیه‌تده آختاریردیم. بیردن گؤزوم گؤیده‌کی گؤزل بیر منظره‌یه دوشدو. سئوینرک آنامدان سوروشدوم:
– آنا. او نه دیر؟ گؤر نه قده‌ر گؤزل‌دیر .
آنام گولومسه‌یرک دئدی:
– هه اوغلوم ،او فاطما خالانین حاناسی‌دیر.
نئچه گون اوستوندن کئچدی. بیر گون آخشام اوستو آناملا قونشو حیه‌تینه گئتدیک. ائله آستانادان ایچری گیردیکده حیه‌تده بیر منظره گؤردوم. من گؤیده اولان فاطما خالانین حاناسینی، یئرده گؤروردوم. ائله بو آن سئوینرک هیجانلا قیشقیردیم:
– آنا _آنا ،باخ. فاطما خالانین حاناسی. نه قدرده قشنگدیر.
ائله بو آن حانانین یاخینلیغینا چاتمیشدیم . الیمی‌حانایا سورترک گؤزوم حانانین ایلک و آخریندا اولان یئره باسدیریلمیش آغاجلارا دوشدو. منجه حانانی آغاجلارا باغلامیشدیلار. یئنه آناما دئدیم :
– آنا باخ . آغاجلارا باغلاییبلار کی گؤیه اوچماسین. هه؟
ائله بو آن قونشو قادینی ائودن حیه‌ته چیخیب و آناملا ساغولاشاندان سونرا من یئنه آنامدان سوروشدوم:
-آنا فاطما خالا بودور؟ نه یاخشی. ائله بیزیلن قونشویمش کی.
آنام اوجادان گولرک دئدی:
– یوخ اوغلوم بو اسمر خالادیر. بو حانا دا گؤیه اوچماز. اسمر خالا اونو آغاجا باغلاییب کی اوزه‌رینده گویچک ناخیشلار سالا بیلسین. او کی قالدی گؤیده‌کینه، او دا گؤی قورشاغی‌دیر. ائله بئله جاماعات آراسیندا اونا فاطما خالانین حاناسی دا دئیلیر.
من داها دینمه‌دیم. اسمر خالا گلدی اوتوردو و ایشله‌مه‌یه باشلادی. من اونون بارماقلاری و اللرینین حرکتینی ایزله‌ییردیم. او هر حرکتده بیر بویا ناخیشا آرتیریردی. گؤز اوخشایان ناخیشلار هر آن اؤتدوکجه ،بیر رنگه دوشور و گؤزللشیردی. اسمر خالا ایشله‌یه–ایشله‌یه حزین ماهنیلار زومزومه ائدیردی. اونون ماهنیلاری ندنسه منده بیر نیسگیل و یا حسرت اویادیردی. ائله ناخیشلاردا اولان اینجه‌لیک و ماهنینین ملاحتلیلیی منه سئوینج دولو – کدرده باغیشلاییردی.
ایندی یئنه‌ده او ماهنیلار و ناخیشلار گؤزوم اونونده جانلانیر و قولاغیمدا عکس – صدا یارادیر. ومن دوشونورم کی:
– گؤره سن اوغلومون اوشاغی «گؤی قورشاغین» اوندان سوروشاندا‌هانسی دیلده آدلاندیراجاق؟.

اسفند/۱۳۸۵

Check Also

قولاغیمی هاردا گیزله‌دیم؟/ رقیه کبیری

قولاغیمی‌هاردا گیزله‌دیم؟ رقیه کبیری «قیزیم گؤزله‌ بیردن ونگوک زاد یادیوا دوشمه‌سین‌هاااا». منسه قهوه‌ای پاستل رنگینی ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *