سنین گؤزلرین / سعید موغانلی

سنین گؤزلرین
سعید موغانلی

سنین گؤزلریندن باشلاندی زامان
قوی هئچ ایشله‌مه‌سین پوزوق ساعات‌لار
یالان- یانلیش یازسین قیسیر تقویم‌لر

گؤزلرینده سئوینج وار
حیات وار
بیر آزدا کدر
باخیشین تانرینین باغیرتیسیدیر

سنین گؤزلریندن باشلاندی تانری
گؤزلریندن اؤنجه
قارا بیر شئیطانین قوللوقچوسویدوم
و گؤزلریندن سونرا
یاشیل بیر تانرینین قیزیل بوقچاسی

سنین گؤزلریندن باشلانیرام من
بیله‌ییمده پولیس کلفچه‌لری
اوره‌ییمده آلا گؤزلرین
ساعات یئرینه
تیق…تیق…تیق…
قووالاییر کیپریکلرین ثانییه‌لری
تاخ… تاخ… تاخ…
قووالاییر منی پولیس‌لر
و اوره‌ییمده دؤیونور زامان, دایانیر ز…آمان

آخی گؤزلرینین باریتیندان آچیلیر
الیمیزده کی سئودا تاپانچالاری
و عئینی زاماندا پارتلایاجاق
سنین گؤزلرینه کؤکلنمیش
اوره‌ک بومبالاریمیز.

Check Also

اویناییر / یوسف جوادی

اویناییر یوسف جوادی آلقیشلایین، آلقیشلایین, ایچیمده بیر قیز اویناییر! فیریلداییر ائله بیل کی کؤز اوستونده ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *