قوش اوره‌یی
علی جوادپور
درددی، نه دی!…
بو تیکه نئجه تیکه‌دی،
اوددون بوغازیندان کئچمه‌دی
توپوردون یئره دوشمه‌دی!؟
بو درد
نئجه درددی گؤرَن،
یییه‌سی سرخوشدو بئله؟!
او آغاج یوخودا نه گؤروب،
یارپاقلارین وئریر یئله؟
ائشیکده هاوا سازاقدی، قیشدی
توپورسَن گؤیده دونار!
گوندوز گؤردویون قوشون
قانادی سینمیشدی،
اونون گئجه‌سی نئجه کئچدی گؤرَن؟
قوش اوره‌یی نئجه دؤزدو
قیشا، داشا؟!
ائئح…سَسینه سویوق دَیمیش دونیا.
سَسینده تَتیک چکیلمیش دونیا!..
سنده،
دردی درده سالماغا اومید وار بلکه ده،
یاشاماغا اومید وار بلکه ده!
یئرین اوره‌یی گؤیده یانیر
یئرله، گؤیون آراسی سازدی هله،
بیر-بیرینین باشینا دولانیر.
بئله گئتسه بیلمَک اولماز-
بو گئجه ده سحر اولدو بلکه.
یئنه ده یوخودان دوردوق،
یئنه ده گؤزوموزو سیلدیک
یئنه ده آلداندیق،
یاشادیق بلکه!…
