یورولموشام گونده‌لیکدن/ سحر خیاو

sahar xiyavیورولموشام گونده‌لیکدن
سحر خیاو

یورولموشام گونده‌لیکدن
بو هیسلی یاغلولی میطباخدان
چوروم- چوروم تؤکولور قاب یووان سینکینه یاشیل بارماقلاریم
سورولور دئشیک‌لرینه
قونوشور لؤهمه‌لی سولارا
قاریشیر فاضیلابا
من ایتیم- ایتیم ایتمیشم بوردا
سویوم چکیلیب، سوزولموشم دویولرله
پیشمیشم ات‌لرله
دوغرانمیشام گؤی‌لرله
سوپورولمیشم زیبیل‌لرله
بایرام قاباغی، تؤکسمده قورومومی
یوز دفعه قالایلاسامدا اؤزومو
ایتمیه‌جک بو اوز گؤزومون چین‌لری
گلمیه‌جک ساچلاریمین قارانلیغی، عصب‌لریم

قیریشیب بو آینانی پول- پول سیندیرام گره‌ک
ایسته‌میرم دای گؤرم اؤزومو
اوجوز چیت‌لر کیمی‌پورچوم وئریرم دییه‌سن
ایپ ساپیم آیریلیب کؤهنه خالیمیز کیمین
اینجه گؤده‌م چکه بیلمیر دای بو آغیر یوکو
اینانمیرسان؟ دای چوخداندیر یئرییییر یوللار منی
آنام منی ده‌ییرمانین دیب داشی دوغوب گؤره‌سن؟!
یا بو ائوین کول باشی، داش باشی
کیتابلاریم تاواندان آشیر
بیلیک‌لریم بئینیمدن جوشوب، داشیر
امما نه فایدا؛ نه فایدا….
اوستومده قارا آدلار، یالان عنوانلار:
– آرواد، قاپی قورویان، ائو آدامی، اوشاقلارین آناسی-
بیر آدامین پاراسی
نئجه بیتیشسین کؤنلومون یاراسی؟!
اؤز آدیمی‌چاغیرین قولاغیما لوطفن!
ایتیرمیشم آدیمی، واللاه ایتیرمیشم آدیمی
باغیریرام باغلی پنجره‌لره
چیغیریرام قارا دووارلارا
سینیرلاری سیندیرماق ایسته‌ییرم
یئتمیر سسیم
چیخمیر نفسیم
الو الو ۱۱۵ اورژانس
نفسیم آز گلیب آغالار کؤمک…کؤمک
یادداشت بویورون لوطفن: یالنیزلیق خیاوانی، قادین دؤنگه‌سی
قاپینی آچماقادا اینجاریم یوخ
ایجازه وئریرم گلین
یارین دووارلاری
قیرین حصارلاری
سیندیرین پنجره‌لری
یالنیز منه تزه‌هاوا، باکیره اکسیژن گتیرین
نفسیم آز گلیب آغالار لوطفن!

Check Also

«هاشیم ترلان»ین ایتگیسینین اوچونجو ایل دؤنومو(اؤزه‌ل سسلی صحیفه- دینله‌یین!)

«هاشیم ترلان»ین ایتگیسینین اوچونجو ایل دؤنومو(اؤزه‌ل سسلی صحیفه) آبان آیی‌نین ۲۵ ادبی جمعیتیمیزده میللی و ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *