ایلمک سالانلارین سؤزلری/ حمید احمدزاده(تیلیم‌خانلی)

tilimxanli
ایلمک سالانلارین سؤزلری
حمید احمدزاده(تیلیم‌خانلی)

آذربایجانین باشا باشیندا، اؤزللیکله محتشم تبریز شهرینده عائله‌لرین دولانیشیغی فرش توخوماقدان چیخاردی. ایلمک سالانلار دا بو صنعتین مظلوم اعضالاری ساییلاردیلار کی زور ایله‌، فرش اربابلارینین ظولمو آلتیندا جان و دل ایله چالیشیردیلار. گاهدان اوشاقلارین آتالاری‌، یوخسوللوق اثرینده‌، اوشاقلارین فرش اربابلارینا‌، معین زمان قارشیلیغیندا ساتاردیلار. بو شعرلری‌، ائلیمیزین قهرمان اوغلو مناف فلکی تبریزلی و اونون معلیمی‌عباسعلی رضایی‌نین ۵۰ ایل بوندان اؤنجه آدینه مهدآزادی درگیسی‌نین یئدینجی نمره‌سینده یازدیغی مقاله‌دن‌، خلاصه اولاراق‌، تورکو لشدیریب‌، خدمتیزه چاتدیردیم.
کرخانادا ایشله‌رم
میخانادا خشله‌رم
پالتارلاریم ییرتیلسا
دؤره‌سین کیریشله‌رم

ایلمک ساللام پول آللام
اربابین قیزین آللام
ارباب قیزین وئرمه‌سه
ایلمگی ترسه ساللام

ایلمک ایلمک قوش ایلمک
قاناتی گوموش ایلمک
من دالی‌یا قالاندا
یئگین‌، یئگین دوش ایلمک
ایلمک سالانلارین آنالاری هر زمان اؤز اوشاقلارین بیر دیل ایله کرخانایا یوللاردیلار‌، ایلمک سالانلارین آنالاری بئله اوخویاردیلار:
علی بالا دور ایاغا
گون دوشدو یورقانیوا
اوستان گلیب دالینجا
شوی گتیریب بویونجا
آپاراجاق اؤزایله آنا
شوی ویراجاق دویونجا
او زامان مظلوم اوشاقلار آنالارینین جوابیندا بئله اوخویاردیلار:
ای وای آنا کرخا
باغریمی‌قان ائیله‌دی
ایلمک‌ سالان بارماغیم
گؤر نه قابار ائیله‌دی
(تایلاری قان ائیله‌دی)
آنا سؤیله ییر:
اولسون اوغول گئت یئنه
آخشاماجان سوت یئنه
(آخشامیوی گود یئنه)
آخشام ائوه گلنده
بیرشاهیوی وئر پیه
بارماغیوا سورت یئنه
ایلمک سالانلار‌، چوخ زامانلار، ایلمک سالماقدا بیر بیرلری ایله یاریشاردیلار. او زامان بئله اوخویاردیلار:

آغ ماللا‌، گوی ماللا
حسنین قولون باغلا
ایلمک سالانلار ایشدن یورولوب‌، جمعه گونونو و جمعه آخشامینی و هفته اوچون آرزیلاردیلار. چونکو هفته اوچو(دوشنبه‌لر) و جمعه آخشامی‌لار‌، فرش کرخانالاری، ناهارا قدر ایشلردیلر. جمعه گونلری بوتونلوقله تعطیل اولاردی.
شاببادان‌، شوببادان
جمعه باخیر قوببادان
فرش قورتولان زامان کی ۳ لای الی ۱۰ لای قالیرمیش‌، بیله اوخویارمیشلار:
فرشی سالدیق له‌وره
الله نوبارک ائله‌سین
اوستایا خبر ائله‌ین
شاگردانانی حاضیر ائله‌سین
فرشی قورتاریب کسندن سونرا‌، فرشی سککیه سالیب بئله اوخویاردیلار:

فرشی سالدیق سککی‌یه
اوستا گئدیر مککه‌یه
اوستا بیزه بیر شاهی وئر
بیزده چیخاق سککی‌یه

Check Also

تولوق اوخشامالارى(۱) / بهزاد بیات فرد(حسرت زنگانلى)

تولوق اوخشامالارى(۱) / بهزاد بیات فرد(حسرت زنگانلى) آذربایجانین مدنی ـ فیکری تاریخی ان اسکی عصرلردن ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *