یاریمچیق سئوگی ۱/ قاسیم پناهی

panahi
یاریمچیق سئوگی – پووئست ۱
قاسیم پناهی

چیلله‌نین ان سویوق گئجه‌لریندن بیری ایدی. سئودا قارانلیق اوتاغینین بوغلانمیش پنجره‌سینین قیراغینداکی اوتراجاقدا اللرینی قوینونا قویوب شهره زیللندی. ایتی باخیشلاری گئجه‌نین قارانلیغیندا گیزلنمیش توستولری یاریب کئچه بیلسئیدی ده، باش اوجوندا آی اولدوزو گؤره بیلمه‌دی. اونا گؤره ده باخیشلارینی یول بویونجا دوزولموش ائلئکتیریک دیرک‌لرینین ساری لامپالاریندان آددیم ـ آددیم سوزدوروب و اونلارین شهرینین یولوندا اولان سئوگیلیسینی دوشونمگه باشلادی. شهرده سوکوتون پچیلتیسیندان باشقا بیر سس گلمیردی. سئودا دویغوسال بیر انسان اولدوغو اوچون قلمینی گؤتوروب و سئوگیلیسی اوچون بیر شعر یازدی:
شهرین آمانسیز سویوغوندا
سن یوخسان دئیه
اؤزوم ـ اؤزومو قوجاقلاییب
فوتولارلا اؤپوشورم
گلسن
بو تیکانلی یوللار
چیچک آچاجاق گؤزلریمده
ائله بو آنلاردا تئرمینالا گیرن بیر اوتوبوسون سسی شهرین سوکوتون و سئودانین جئب تئلفونونون مئساژ سسی اوتاغین سوکوتونو پوزدو.
سئودا تلسیک جئب تئلفونوندا بیر نئچه توش باساندان سونرا علی‌دن «جانیم! من تئرمینالا یئتیشدیم»- مئساژینی اوخویوب، شوک وئریلمیش کیمی‌آیاغا قالخیب، بینانین اؤنونده ساخلانیلمیش آرابایا دوغرو قاچیب، سئوگیلیسینی ائوه گتیرمک ایسته‌دی. سئودا رولون آرخاسیندا اوتوراندان سئوگیلیسی ایله نئجه قارشیلاشاجاغینی دوشونوردو. جانینا دوشموش استئرسدن نه ائده‌جه‌یینی بیلمیردی؛ سانکی ال آیاغی دونماق اوزه‌رینده‌یدی؛ آنجاق اؤزونو الده ساخلاسین دئیه، اؤز ـ اؤزونه بیر شئیلر پیچیلدایاراق آیریلیغین ان سون آنلارینی آراباسیلا آیاقلاییب کئچیردی.
اوتوبوس تئرمینالدا دایاناندان سونرا علی قارا اوورکوتونو اگنینه گئییب، قارا یون پاپاغینی باشینا قویوب، قولاقلارینا قده‌ر چکیب سوروجویه «اللرینه ساغلیق»- دئییب، اوتوبوسدان ائنیب، همن سیقار قوتوسوندان بیر گیله سیقار چیخاریب، اووجونون آراسیندا آلیشدیریب «سئوگیلی یوردوم»- دئیه، الینی تورپاغا سورتوب اؤپدو. سونرا سئودانین نومره‌سینی آرادی:
– سئودا آلو! آلو،‌هارداسان جانیم منیم؟
سئودانین دیلی سؤز توتار توتماز «جانیم بئش ـ اون دیقه‌دن سونرا یانیندایام»- دئدی.
– «هله لیک جانیم !»- دئیه، علی تئلفونونو جئبینه سوخوب، سیقارئتینی پوکلایاراق آددیملاماغا باشلادی.
گؤیلرین سینه‌سینی سؤکموش داغلارین سویوغو سانکی اونو شیلله‌له‌میش کیمی‌بیر نئچه آندا اوزلرینی قیزارتدی، آما علی «سئوگیلیم گلیر»- دئیه، وئجینه آلماییب آددیملاماسینا داوام ائتدی. بو آندا ایکی اوچ تاکسی سوروجوسو اونا یاخینلاشیب هر بیریسی بیر یئره چکیب «قارداش‌هارا گئدیرسن؟»- دئیه، سورو وئردیلر. علی، «بوراخین! من هئچ یئره گئتمیرم»- دئیه، دارتینیب اؤزونو اونلاردان خلاص ائتدی؛ آنجاق سوروجولردن بیریسی یئنه اونون قولوندان یاپیشیب دئدی:
– قارداش واللاه بیزده چؤرک اسیرییک،ناراحات اولما گؤرورسن کی گئجه‌نین یاریسی بو سویوغدا ایتی ووراسان قالاغدان چیخماز، آما چاره‌میز یوخدو. عاییله‌میزین یانیندا اوزوموز قارا اولماسین دئیه گئجه-گوندوز ایشله‌ییریک. گل من سنی آپارارام، آشاغی حئسابلارام.
بو سؤزلری دئیه- دئیه سوروجونون گؤزلری دولدو. علی‌نین قولونو بوراخیب، اوزونو قارانلیغین قوجاغیندا بوغولموش شهره ساری دؤنده‌ریب، داوام ائتدی:
– آللاه بئله یاشاییشی کسسین. نه دیر آخی؟! قیزیمین جئهیزینی دوزه‌لده بیلسه‌یدیم بو چتینلیکدن اوزوم قورتاراردی، آما یوخ بو آجی بیتمه‌میش باشقاسینین باشلانماسینا امینم. ائله حیاتدا بودور. “بیزلر یارالی یارانمیشیق، یاشاییشدا یالنیز یارادان -یارایا داشینماقدیر.
سوروجو بو سؤزلری دئییب اللرینی کتان شالوارینین جئبینه سوخوب، قیسا بویونو آیاق بارماقلارینین اوستونه چکیب، درین بیر آه چکدی. بو آندا علی آرخادان سوروجونون چیینلرینی اؤفکه‌له‌یرک دئدی:
–‌هامیمیز فهله‌ییک
عینی بیر فهله؛
سنین اللرین قاباردیر
منیم اوره‌گیم
اونون بئینی؛
هامیمیز فهله‌ییک
عینی بیر فهله.
سونرا اللرینی جئبینه سالیب ایکی اللی مین تومنلیک چیخاریب سوروجونون اووجونا باسدی. سوروجو پوللاری گؤردوکده اونون الینی قایتاریب، «قارداش من دیلنچی دئییلم، اوره گیم دولموشدو، اونون اوچون سنله دردلریمی‌پایلاشدیم. ندنینی اؤزومده بیلمه‌دیم، آما چوخ اوره‌گیمه یاتدین»- دئدی.
علی گوجله پولو سوروجونون اووجونا باساراق:
– آ کیشی مگر ایندی دئمه‌دین قارداش؟
– هه، دئدیم.
– باخما بیز بیر ـ بیریمیزی تانیمیریق، آنجاق هئچ نه ده اولماسا وطنداش و دیلداشیق. اونسوز دا سن منه قارداش دئدین؛ من ده ایسته‌ییرم قارداشیما بیر چای پولو وئرم؛ کیمه نه؟!
– آخی..
– آخیسی زادی یوخدور. هله دئنن گؤرک آدین نه‌دیر آی قارداش؟!
– آدیم «یاشار»دیر
– چوخدا گؤزل، یاشار قارداش سیقار چکیرسنمی؟
یاشارین دوداقلارینا بیر یاریمچیق گولوش قاچار قاچماز «یاشار سیقارسیز یاشایا بیلمز»- دئیه، علی‌دن سیقاری آلیب، ایکی بارماغیلا علی‌نین چاخماغی توتان الینه ووروب سیقارینی آلیشدیردی. سونرا اونلاردان بیر آز اویانلیق اولان اوتراجاغا ساری یئریییب «قارداش گل بورادا اوتوراق!»- دئدی. علی ده سیقارینی آلیشدیریب اونون یانیندا اوتوردو. شهرین یاریسینی اونلارین اولدوغو یئردن گؤرمک اولوردو. خییاوانلارین سویوق دؤشلرینه ساچیلمیش ائلئکتریک لامپالارینین ساریمتیل ایشیقلاری داریخدیرجی بیر اورتام یاراتسادا، اونلار بیر_بیرایله تانیش اولماق اوچون سئوینیردیلر.
یاشار «قارداش! هئچ من سنین آدینی سورمادیم!» دئدی.
– آدیم علی دیر
یاشار بونو ائشیتدیکده علی دئییب بیر آه چکیب سونرا سیقارینی دریندن پوکلایاراق دانیشماغا باشلادی:
– منیم گنجلیک چاغلاریمدا بیر یولداشیم واریدی اونون دا آدی علی ایدی. گئجه – گوندوزلریمیزی بیرگه کئچیرردیک. جئبلریمیزده بیر شئی اولماسادا اوره‌کلریمیزده سئوگی و بئینیمیزده ساواش وار ایدی. نه چوخ گئجه‌لری شهرین ان قارانلیق بوجاقلاریندا خیاللاریمیزدان دانیشیب “آکین” و “گونشی ایچنلرین تورکوسو”نو اوخویاردیق، آنجاق بیر گون آرادان یوخ اولدو؛ ائله بیل سو اولوب یئره هوپموشدو، نه عاییله‌سینین اوندان خبری وار ایدی، نه ده کی منیم.
یاشار یاناقلاریندا قیروولانمیش یاشلارینی ساغ الی ایله سیلیب، یومروغونو دویونله‌ییب سینیرلی شکیلده داوام ائتدی:
– آما بیر نئچه آیدان سونرا تاپیلدی، یازیق ائله بیل همین آدام دئییلدی. دلی اولوب خییاوانلارا دوشموشدو. عاییله‌سینه ده بئله چاتدیرمیشدیلار کی گونشه گئدنده باشینا‌هاوا گلیبدی. سونرالار توختایاجاق، ایندی یئددی – سکگیز ایلدیر حیاتینی ده‌ییشیبدی، آنجاق گون اولماز او ایگیدی خاطیرلامایام. بو آخشام دا کی سن لاپ اونون خاطیره‌سینی جانلاندیردین.
علی آیاغا قالخیب سیقارینی آیاغینین آلتیندا سؤندوردوکدن سونرا گؤزلرینی یاشارین گؤزلرینده دالغالانان دویغولاردان چکیب، قارداش بیز یورولانلاردان دئییلیک؛ «گلجک بیزیمدیر»- دئییب، الینی یاشارا ساری اوزادیب، «سنینله تانیش اولدوغوما چوخ سئویندیم؛ من گئتمه‌لییم»- دئیه اونلا ال وئریب، آرالاندی… آردی وار

Check Also

سویوق اوره‌ییمدن بئینیمه یوکسه‌لیر / سید رضا حسینی مرند

سویوق اوره‌ییمدن بئینیمه یوکسه‌لیر سید رضا حسینی مرند قار یاغیردی. ماشین سس‌سیزجه خیاباندا ایره‌لی‌له‌ییردی. سوروجو ...

۳ comments

  1. قاسیم پناهی

    سلاملار سایین ایشیق سایتیندا چالیشان امک داشلار بو نثر حیکایه دئییل پوئست’دیرو آردینی سیزه گؤندره جه یم بیر ده لوطفن یاریمچیق سئوگی آدیلا پایلاشین میننت دارام

  2. سایین پناهی جینابلاری چوخ سئویملی قلمینیز وار ،سیزه آلقیش اَن کیچیک موکافات دیر.یاشاییب یاشایین.
    یئنی قاپی

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *