چئویرن: رقیه کبیری
ترجمه: رقیه کبیری
رقیه کبیری

IMG_1402
اوزسوزلوخدی…
رقیه کبیری

– «اوزسوزلوخدی آدؤهتور. دوز بیر آیدی بیزیم ائودن ائله قان گئدیر، آدام دئییر بس بطنینده باش کسیبلر.» ائلات خانیمین أری سؤیله‌دی.
اؤز- اؤزومه دئدیم: «بوُیور..! ائودن قان گئدیر! آخی نییه بَه سنی آیری ناخوش‌نان بیرگه ایچری گؤندرنده لال اولدون؟ نییه بَه همیشه‌‌کی کیمی اعتراض ائله‌مه‌دین؟!»
بعضی مطب‌لرده ناخوشلاری جوت- جوت، یا اوچ- اوچ ایچری گؤندرمک دَب اولوب. من همیشه بونا اعتراض ائله‌ینلرین بیری اولموشام. آمما بویون بیر ائلات قادینی و اونون أریله بیرلیکده ماینا اوتاغینا گؤندریلنده، ندنسه دیلیم قیفیللاندی. بهداشت وزارتخاناسینین اعلانینا گؤره هر ناخوشون ۲۰ دقیقه ویزیت حاقّی هله کناردا قالسین، ناخوشون اینسانی حاقلارینی بئله تکلی- دیبلی اونوتدوم. ناخوشلوق مگر هر اینسان بدنینین اؤزل سیرّی دئییل؟ اؤزوم ده بیلمه‌دیم نییه قویون کیمی باشیمی آشاغی سالیب، اوْ أر-آروادین دالیسیجا ایچری گیردیم.
– «نئچه یاشی وار؟» دؤکتور سوروشدو.
– سیجیللیده قیرخ بئشدی.
«دئمک منیمله یاشیددی!»، اوره‌ییمده دئدیم. اوتوردوغوم صندلدن یاناکی چؤنوب، قادینا باخدیم. قادینین یاشماق آلتیندان گؤرونن چؤهره‌سینده یالنیز خوش‌تراش بورنو، آلما کیمی یاناقلاری، بیر ده گؤزونون ایسلاق آغیندا بیر جوت شَوه کیمی قاپ‌قارا شار گؤرونوردو.
«یقین حوضوردن دوشه‌جک»، دؤکتور دئدی.
– «هه آدؤهتور، ائویمیز دئییر ائله قان گئدیر کی، ائله بیل قویون باشی کسیبلر»
اوره‌ییمده دئدیم: «هئش گؤر او چیراق کیمی یانان یاناقلارا یاراشیر!؟»
قادین یاشماغینی دوداغی اوسته برکیدیب، گؤزونو یئره زیلله‌دی. دؤکتور دئدی: «دئنه جنگ مغلوبه‌دی داااا»
اوره‌ییمده دئدیم: «لاپ منیم کیمی!»
کیشی دئدی: «آی دئدین ها..! یورولوب یورقان- دؤشک یوماخدان. چؤل یئرینده اؤزو ده جانا گلیب. دئییرم آخی بیر بئله قان بو آروادین جورو جانینین هاراسیندان سوزور باااا»
کیشی بیر باشا دانیشیردی. دؤکتور ساعاتینا باخیب، قاشلارینی ییغیب، دئدی:
– « کیشی سن بیر دیلمانجلیغی بوراخ، مجال وئر اؤزو اؤز دردینی دئسین، من ده گؤروم چاره‌سی ندی؟ مگر یوز ایل قاباقدی، آرواد دیلینی قیسیب، باخسین!»
کیشی دئدی: «بیزیم ائل- اوبادا عادت بئله‌دی داینا..! جاوانلار ده‌ییشیلیر، آمما بیزی دای ده‌ییشمک اولماز»
دؤکتور اوزونو صندل اوسته اوتورموش قادینا توتوب، سوروشدو: «باجی اؤزون بیر دئه گؤرم نئچه واختدی قان گئدیر؟ آخیر دفه نه واخت آی‌باشی اولموسان؟»
قادین گئنه یاشماغینی برکیدیب، أرینه باخدی. أری ایسه باشینی ترپه‌دیب اشاره‌ ائتدی کی دئسین.
– «اوزسوزلوخدو قاغا، چوخداندی بئله‌یم. ایندی باش‌گیجللنمه‌سی دای مجال وئرمیر قویونلاری ساغیم.»
قادین ألینی تپه‌سینه قویوب، آرتیردی: «نه واختی ائله بیل تپه‌مه بوُز قویوبلار.»
«قانسیزلامیسان دااا» دؤکتور دئدی.
«اوزسوزلوخدو. نه واختی آی‌باشیدان کسیلمیرم. کسیلیرم ها، بئش گون باشیمی یوواندان سورا گئنه ده آی‌باشی اولورام»
آز قالدی قادینین سؤزونون آراسینا آتیلیب، دئییم: «لاپ منیم کیمی!»
دؤکتور سوروشدو: «لاختا- لاختا قان گئدیر؟»
«اوزسوزلوخدی، بیر ایکی گون اوّلده ائله‌ بیل قوش اوزومونون گیله‌لریدی، گیله- گیله قوپوب، دسمالا تؤکولور. ایکی گون سورا گیله‌لر لاختالانیر…»
اوره‌ییمده دئدیم: «لاپ منیم کیمی، یقین اونون دا میوم عاریضه‌سی وار.» آمما قادینسل عاریضه‌لریمیزین علامت‌لرینین اوخشارلیغی بیر یانا، ائلات قادینین شاعیرانه وصف ائتمه‌سینه کئف ائله‌دیم. مین ایل ده قالسایدیم، میوم عاریضه‌سینی بئله شاعیرانه توصیف ائده بیلمزدیم. قادینسل عاریضه‌نی بو گؤزللیکده تمثیل ائتمک اؤزو بؤیوک بیر هنردی.
قادین آرتیردی:
– «ها گؤزله کی قورتولسون. باشیمی یویوب، بو آی‌باشیدان او بیری آی باشینا هفته چه‌میر، گئنه باشلانیر. مه‌یر قورتولماخ بیلیر؟! اوزسوزلوخدی، سفری‌لریمین هئش بیرینده بئله قان گئتمه‌میشدی. دئییرلر ساراطان توتموسان.»
آرواد سؤزونو قورتارماقدا، یاش گیله‌لری گؤزوندن دامجیلادی. بیر آن نظریمه گلدی قادینین گؤزوندن دامجیلایان گیله‌لر قوش اوزومونون کال گیله‌لری‌دیر.
دؤکتور دئدی: «قورخما، سرطان دئییل، حوضوردن دوشوسن. یازیم گئت سونوگرافی ائله‌سینلر، جوابینی گتیرنده داوا یازارام.»
قادین أرینین آرخاسیجا قاپیدان چیخاندا، کئچیب اونون قالخدیغی صندلده اوتوردوم. دؤکتور بیمه دفترچه‌می آچیب، خودکاری آچیق صفحه‌نین اوستونه قویوب، سوروشدو: «سیزین موشکولوز ندی؟»
دئدیم: «قوش اوزومونون گیله‌لری..!»
۱۳۹۵، اردیبهشت آیی

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

اوزسوزلوخدی… / رقیه کبیری

رقیه کبیری
www.ishiq.net

آذربایجان ادبیات و اینجه‌صنعت سایتی

اوزسوزلوخدی… / رقیه کبیری

رقیه کبیری
www.ishiq.net

آذربایجان ادبیات و اینجه‌صنعت سایتی

اوزسوزلوخدی… / رقیه کبیری

رقیه کبیری
www.ishiq.net

آذربایجان ادبیات و اینجه‌صنعت سایتی