باغیشلا جناب!
سعید موغانلی
باغیشلا جناب!
من اولدوزومو اوغورلاتدیرمیشام
سیزین هوتئلده بخت اولدوزو تاپیلار؟!…
_دئییرسن نه‌چی‌یم؟
(دئییرسن شاعرسن هانی غزلین؟)*
_الیمیزه ایش وئره‌جک بو شعر
شعریمین نه‌ییندن قورخورسان؟
من غزل قوشا بیلمیرم آخی!!!
بویور وینستون چرچیل چک آغا!..
دونن دورنالار چاپیردی غزل چاپارلار
بیری هؤیکوردو ایمئیلیندن:
_شاه عابباسین ساراییندا یئر یوخدو گلمه‌یین،
سولطان ماحمود آغا آلزایمر توتوب
بو هفته بازارا شعر گتیرمه‌سین شاعرلر.
توختادین سن…
بیردن مسیح مارالاندان جالاندی
مشروطه پارکیناجان…
ستارخانین بئرنوسوندان آسیلدی مسیح
علی موسیو گونشدن آسیلدی
ثقه‌الاسلام تحت‌الحنکیندن.
اود توتوب یانیردی گونش…
…ا
بیردن دایاندی اولو اؤلولر
هاچان گؤی مچیدده نامازا دوراجاق پیغمبر؟
هاچان به ارکی سؤکوب!، ائله، گؤل قاییراجاقلار؟
هاچان تبریز متروسو بیزیم کنده گتیره‌جک صمدخانی؟
کندیمیز کاتداسیز قالیب.
هاچان شعره قیزیناجاق
شهرین بوش بئکار فهله‌لری.
بیری بیزیم شاعرلره بارماق ائله‌سین
عاغیل دیشیمیزه نه گلدی بیزیم؟
انا الحق کان ذهوقا
بیر کؤووز دوشونجه سپین
شاعیر ساچلاریمیزین ژئللی کؤوشنینه
بیری بایقوشو کیشله‌سین سیته‌لردن
پلاستیک ماسکالاری گؤتورون دوسلار
ایپک یاشماق‌لارین آرخاسیندان
گؤزلله‌نسین قیزلار.
میف دؤورونده کاغیذ یوخ‌ایدی آخی
یاشماق‌لارا شعیر یازیردی سئوگیلی قیزلار
ایندی قزئت آغا
ایندی ژورنال خانم
ایندی یاشماق سیرا کیتاب‌لاری
ایندی یالانچی آژانس‌لار
ایندد “گلدیم تاکسی”لر
طبیل دؤهول‌لر فیلم اولوبدولار
ایندی جیبیمیز خبر مرکزی‌دیر
جیبیمیز باند
ایجاره‌سیز-زادسیز
قیریلداییرلار
-“مئساژین وار…”
