رئال دونیادا یاساق سئوگی / معصوم جبارپور

masoom jabarpoor
رئال دونیادا یاساق سئوگی
معصوم جبارپور

بو گون نافله
کئشگه دون بو گونکو کیمی‌اولایدین
بو گونکو ملهم
سهرابین اؤلوموندن سونرا_
یئتیشن ایتکیلی داوادیر!
من دونندن سینمیشام…
سئوگینی دونیا خریطه‌سیندن سیلین،
سن نوبلی دوشونن بیر شاعیر
من ایسه اسگی غزللرین دوشگونو
سون اوجو
بیر شاعیرین یئری بوش لیریک دوشونجه‌لرده
ندن آنلامادین سؤزلریمی؟
سؤزلریمی‌آنلامادین گؤزلریمی‌آنلا باری
اورمانلی گؤزلریمی‌کشف ائده‌جک‌میسن ؟
تبریز گیجه‌لر
قونقادا کی داش آتلارین اؤنوندن کئچدیگیمده
دایانمادان کیشنه‌مه‌یه باشلاییرلار_
ایچیمده بیر دئپرم اولاجاقمی‌یاخیندا؟
قوجاغیندا
اؤزگه قادین‌جیقلار قوخویور
سنی
بیر گئجه بیر قوجاق بویو تانیدیم
ایندیسه
سئوگی آدیندا آداملاری قینامیشام
سن منی دوشونمه‌سنده اؤنملی دئییل
داها سئومه‌یی بوشلامیشام
رئال دونیادا یاساق سئوگی _
یالان دونو گئیدی!
ناغیللار دا بئله خیانت ایلک رولو آلیر
یازیق یالقیز اویوق!
اویوق قارغایا وورولموشدو
قارالیق ایشیق ساچیردی گؤزلرینه
توپراقدان گونده‌لیک اوغورلوق
یازیق اویوق!
آجلیقدان دوداقلاری کیلیتلنمیشدی…
ایللر بویو
توم وجودو قوز شوولری ایله تانیش ایدی
چیرپینیردی قارا گونلو_
قارا قارقایا
بیلمیردی :
دونیا بو سؤزلردن داها آلچاق ایدی
بیر گون توم سؤزلر اونودولور
بیلیسینیزمی؟
دنلی توپراق، بیرگون اونو چالدی
توم باغیرمالار بیر آندا سوسدو
سوسماق رضایت آنلامینا گلیرمی؟
هیییی
قیشقیرمایا بیر بوغاز قالمامیش
اویوق اویانیب
دانیشدی سئرچه‌لره
معصوم آدلی قیزلا دردلشدی
دئدی:
بیر گون ادام اولاجاغام
بو گونکو آداملاردان بئله مودئرن _
قاییدیب
اویوغون،
بیریسنین سویوق سویوق گولومسمه لرینه قارشی،
سسیز فریادلارینی
و خیانت ماجرالارینی
قولاغی ساغیر شه رین
تانریسیز کوچه لرینده باس باس باغیراجاغام
بلکه
بیر اعجازلا
جوجرن یارالار اوووچ دولوسو سویوغا سونولسون!
دون گئجه تبریزین قارقالاری شعر اوخوردولار
کئشگه دون ، بوگونکو کیمی‌اولسایدین
گئت
سنی جغرافیا سینیرلارینا سیغمادیق قدر سئودیم
بیر باکیره اؤپوجوک کیمی
بیر توتام ایستی قوجاق کیمی
نئجه سئرچه سیغینار تیتره‌رک قددار بیر اله
بیر توتام قوجاق
دوغرادی منی
گئت
بیر گون یالانچی قوجاقلاردا دوناجاقسان.
منی آختارسان می_
سهرابین اؤلوموندن سونرا
یئتیشن ایتکیلی داوادیر

Check Also

قاییتماز اولدو/ بهروز دولت‌آبادی(چای اوغلو)

قاییتماز اولدو بهروز دولت‌آبادی(چای اوغلو) چوخ صفالی، چالیشقان، آزادلیق وورغونو ده‌یرلی دوستوم «سیفی»یه اتحاف. نئجه ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *