بایرام ناغیلی / میر هدایت سیدمرندی – سسلندیرن: کبری میرحسینی

kobra mirhoseyni
بایرام ناغیلی
میر هدایت سیدمرندی – سسلندیرن: کبری میرحسینی

نووروز بایرامی‌گلمه‌میشدن؛ گئتمیشدی. دای او قَدَر ائو سیلیب سوپورمکدن– او قدَ‌ر ماراقلا یئدی لووون آلیب آخیر چرشنبه‌نی گؤزله‌مکدن- شال ساللاماقدان- یومورتا دؤیوشدورمکدن- گؤروشه گئدیب گلمکدن- بایراملیق آلیب وئرمکدن، خبر یوخویدو.
بایرام گونلری پیسدن-یاخشیدان یئل‌کیمی‌گلیب سوووشموشدو. مدرسه‌لر آچیلیب کیلاسلار قورولموشدو. اوشاقلار گلیب بیربیر انشالارین اوخویوب یئرلرینده اوتوروردولار.
اینشانین قونوسو (نووروز بایرامینین خاطیرالاری) ایدی. هرکس گلیب،دوغرو- یالان، گئدیب یا گئتمه‌دیگی سفرلردن؛ دال بادال دوزدویو جمله‌لری اوخویوب بیر نومره آلیردی. سیرا کریمه چاتدی. کریم اوجا بویلو آریق و ساری یوزلو، قاش‌قاباخلی اون‌دؤرت یاشیندا بیر اوغلان‌ایدی. نورمالدا کیمسه ایله دانیشمازدی. دوغروسو کیمسه‌لر اونونلا دانیشمازدیلار و ساناردیلار بیر اسکی‌یویان و فرش توخویانین اوغلویلا دوستلوق ائتمک، اونلارا باش آشاغیلیق گتیرر. کریم ویقارلی آددیملارلا کیلاسین اؤنونه گئچیب دفترینی آچیب انشاسینی اوخوماقا باشلادی. کریمین سسی کیلاسی بورودو. اوشاقلار اونون سسینی سایمادان بیربیرلریله قونوشوب دئییب گولوردولر. آما گئتدیکجه کریمین اوخودوغو جمله‌لر چکیش ‌سسی تکین قولاقلاریندان گئچیب قافالاریندا اوتوروردو. دانیشیقلار بیربیر کسیلیب قافالار کریمه ساری دؤنوب؛ گؤزلر کریمین آغزینا تیکیلیردی. معلّم‌کی کیلاسین پنجره‌سیندن حیطه باخیردی؛ کریمه ساری دؤنوب کریمین آغزیندان چیخان کلمه‌لری قولاقلاریلا اوتوردو. کیلاسی آغیر سیکوت بوروموشدو.
کریمین سسی کیلاسدا جینگیلدیردی:
«…..گؤزل آنام… او گؤندن کی، منله باجیمی‌بوراخیب آتامین یانینا کؤچدون، بیز آغیر گونلر گئچیریریک. ایلک گونلر قوهوم قونشو گلیب گئدیردیلر، آما گون گئچدیکجه گلیب گئتمه‌لرده آزالیردی. دای بو گونلر کیمسه بیزدن یاد ائتمیر. دوزدو سن گئدیب راحاتلاشدین، آما بیزی کیمه تاپشیردین؟! یاخشی بیلیرم‌ کی خسته حالینلا نه قَدَر چالیشاردین اونون- بونون پالتارلارین یویاسان و بوش ساعاتلاردا بیزیله برابر دزگاه باشیندا اوتوروب ایلمک دویونله‌یه‌سن کی قاباللار تئزتئز بیتیب اربابدان پول آلیب دردلریمیزه وئره‌سن.
یادیندادی آنا، بیر گون نازلی کیچیک باجیم تله‌سیکدن بارماغینی کسدی؛ آما سن دونیانین زورلوغونون آجیسینی اوندان چیخارتدین و اونون بارماقینین قانینا باخماییب؛ اینجه بدنینی پیچرقاجین آلتینا سالدین!؟ باجیم آغلییا- آغلییا دئییردی :
-“آنا… سن دئییرسن تئزتئز دوتله‌دا؛ منده تله‌سیک دوتله‌ییردیم بیردن بارماغیم پیچاق آلتینا گئتدی….”
باجیم ایچین چالا-چالا، آجی آغلیردی؛ دؤزه بیلمه‌دین اونو باغریوا باسدین، سنده آغلادین؛ منده آغلادیم. نئجه گون پیچرقاجین یئرلری اونون بدنینده زول- زول شیشیب گؤیرمیشدی.
یادیندادی ایلمک سالا سالا ، ایلمکلرین دیلیله اوخویاردین :
” گینه صف باغلاییب باخیرسیز منه؟!
قانلارین رنگیدیر بویویوب منی
اینجه بارماقلارلا مظلوم بالالار
گئجه‌لر یاتماییب توخویوب منی
…..”
یادیندادی آنا…صبح گون چیخمادان دزگاه باشیندا اوتوراردیق، مدرسه ساعاتی چاتینجا اوسدوموزون تویلرین سوپورگه‌ایله سوپوروپ تمیزلردین، بیزده گولردیک کی مه‌یه بیز یئریک یا فرشیک کی اوستوموزو سوپورورسن !؟
نه سنین حووصله‌ن اولاردی بیزیم باشقا نییازلاریمیزا چاتاسان ونه بیزیم بؤش واختیمیز اولاردی کی آرتیخراق درسلریمیزه چالیشاق. دوشوک نومره آلاندادا سئوینردیک کی اَن آزی سنین ساوادین یوخدورکی بیله سن. آما سن اؤزووو سیندیرمازدین، دفترلریمیزی آلیب باش آشاغی ترسه توتوب باخیب، مظلوم گولوب گینه بیزه گئری وئرردین. من چوخ زامانلار کیلاس مشقلرین یازا بیلمزدیم نییه‌کی وقتیم اولمازدی. آغا معلّم ساناردی بس من اوزلو و دانقاز اوشاغام. اودوکی آغا معلم ایسته‌مه‌میش الیمی‌آچاردیم تا گونده‌لیک شووومو وورسون، اما شادیدیم کی بونلاری سن بیلمیرسن.
سن اؤلن گوندن نئچه گون سونرا، ارباب بیزه گوونمه‌ییب گلیب دزگاهی گئری آپاردی. قورخوردو بیز فرشی پوزوب ریه‌لی توخویاق. ایندی من مدرسه‌دن چیخان زامان بیر باشقا فرش کرخاناسینا قاچیب فرش توخویورام. آما باجیمی‌قویمادیم کرخانایا گئتسین، آخی بیلیرسن آنا! کرخانالاردا، کیفیر سؤزلر دانیشیلدیغی اوچون بیر قیز اوچون اویقون یئر دئییل.
گئجه‌لرگلیب هم اؤز درسلریمه، همده باجیمین درسلرینه چالیشیرام. سنه سؤز وئریرم سنین ایسته‌یین کیمین درس اوخویوب دَیَرلی اینسان اولاق.
جمعه گونلری سنین یانیوا گلیب سنله دانیشیریق. بیلیریککی سسیمیزی ائشیدیرسن. البت سنین پوزقون قبریوی گؤرنده اوره‌ییم کدرلنیر. سنین قونشولارین قبیرلری ایکی اوچ قات، آینا کیمین قیرانیت داشلارداندی، آما سنین قبرین قارا سیمیت‌دندی..! سانیرام سن خسته اولان زامانلار بو گونلری دوشونوردون‌کی دئییردین:
کاشکی قبرین ایچی جنت اولا، اوستندن نه فایدا….؟
آنا….! بو گونلر بایرام گونلریدی و بو گونلر سنسیز بیزه چوخ زور گئچیری. چالیشدیم بایراما بیر کیچیک سوفره آچام. باجیما قیرمیزی بالیق‌دا آلدیم.
آنا…! بیز قوهوملارین گؤروشونه گئتدیک؛ آما دئیه‌سن بیز یوخوق، کیمسه بیزی گؤرمه‌یه گلمه‌دی!
بوگون مدرسه‌نین ایلک گونودو. اگر منله باجیم تازا پالتار گیمه‌میشیک، آما پالتارلاریمیز تمیزدیلر. اگر یئمه‌ییمیز یاغلی دئییل، آجدا دئییلیک. اگر اوشاقلار گئتدیک‌لری سفرلردن وآلدیقلاری هدیه‌لردن یازیبلار، منده سنین قبریندن یازاجاغام. سنه وئردیگیم سؤزلردن یازاجاغام‌. چالیشاجاییق یاخشی نومره‌لر آلیب روحووو شاد ائد‌ک. اگر آغا معلّم و صینیف یولداشلاریم منی سئومه‌سه لرده بئله، من اونلاری سئوه جاغام. روحون شاد اولسون آنا.»
کریم انشاسینی بیتیریب کیمسه‌نین اؤزونه باخمادان یئرینه ساری یولا دوشدو. نیه کی ایسته‌میردی اوشاقلار اونون گؤزونده اولان یاش دامجیسینی گؤرسون. آما بیلمیردی اوشاقلاردا دینمز سویله‌مز آغلاییردیلار و اوتانیرلار کی بوگونه قَدَر نییه بو بؤیوک اینسانا، یاخشی دَیَر وئرمه‌ییب واونون دَیَرینی پالتارلاریلا اؤلچوبلر. آغا معلّم‌ده گؤزلویونو گؤتوروب یاش دامجیلارینی اوزوندن سیلدی.
کیمسه‌دن بیر سس چیخمیردی. آغا معلّم بو کیچیک یاشلی، بؤیوک اینسانین آیاغینا قالخیب باش اَیدی. کیلاس بیردن بیره بومبا کیمین آچیلیب آلقیشلاما سسی گؤیه یوکسلدی.

Check Also

تولوق اوخشامالارى(۱) / بهزاد بیات فرد(حسرت زنگانلى)

تولوق اوخشامالارى(۱) / بهزاد بیات فرد(حسرت زنگانلى) آذربایجانین مدنی ـ فیکری تاریخی ان اسکی عصرلردن ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *