غزل
سحر خیاو

یولون چکیب گئده‌ن آن باخمادین دومانلیغیما
خزل- خزل تؤکولوب سوورولان سامانلیغیما
دلی سایاق دئیه‌سن داورانیر بو سنسیز آدام
یامان گولور گؤرورم یاخچیلار یامانلیغیما
کؤنول کوسر همشه سئوگیلیم اومان یئردن
نه دن اسیرگه‌ییسن اللرین اومانلیغیما؟
نه فیرتینالی گزیر سئودالی باشین کاپیتان
قوناق گل آغرین آلیم بیر قوجاق لیمانلیغیما
توتولدو گؤی نفسین توستو پوسگورن هاوادا
بو کؤکسومون یئری یایلاق بویور آمانلیغیما
داریخدیران گئجه‌لر من اومودلویام«سحره»
یقین گلیب چکه‌جک خط بو ناگومانلیغیما
نه معجیزه ائدیب عشقین یئنه غزل یازیرام
قاییتمیشام ائله بیل بیرده من جاوانلیغیما