چئویرن: رامین جهانگیرزاده
ترجمه: رامین جهانگیرزاده
رامین جهانگیرزاده

۵۱- یئکه
بیری وار چوخ یئکه‌دیر، او قدر یئکه‌دیر کی نه قده‌ر چیغیرسان سسین قولاغینا چاتمایاجاق؛ آددیملایاندا هر نه آیاغی‌نین آلتیندا قالاجاق؛ هر یئر خارابالیغا چئوریله‌جک. نه یاخشی کی یئکه اولمادیم…

۵۲- آختاریش
من چوخدان ایدی کی تانرینی آختاریردیم، تاپا بیلمیردیم. هر یئرده آدینی گؤروردوم، دام ـ دووارلاردا، کیتابلارین آراسیندا، یئرده، گؤیده، آنجاق اؤزونو هئچ واخت تاپا بیلمیردیم. هر یئر عاغلینیزا چاتسا اورا باش ووردوم، آنجاق تاپا بیلمیردیم. بو گون بیر گوزگوده گؤردوم تانرینی. گوزگو تانریییا دؤزه بیلمه‌ییب سیندی؛ تانری تیکه ـ تیکه اولوب تانریلارا چئوریلدی.

۵۳- حاجت
بو گونلر بیلمیرم نییه بعضی‌لری منه یئنه دخیل دوشوب؟! نه بیلیم بلکه ده حاجتی‌نین قبول اولماغینی ایسته‌ییر. دوغروسو یاواش ـ یاواش اؤزومه اینانیرام کی من موقددس آدامام. موقددس اولماسایدیم منه دخیل دوشمزدیلر. آللاه حاجتینیزی قبول ائله‌سین بعضی‌لری. ایلاهی رامین.

۵۴- اویونبازین توهومو
بیری وار ائله بیلیردی منی اوینادیر، من ده ائله هئی اویناییردیم و اونو منی اویناتماق توهومو بوروموشدو. دئییردیم قوی گؤیلو خوش اولسون. کیم ـ کیمه‌دیر، دونیا بئش گون او دا خوش گون.

۵۵- جلیل قفه‌سینده
ندنسه بو گونلر ائله هئی اویونبازلار قاباغیما چیخیر، بیر نئچه ساعات بوندان قاباق جلیلده بیر نئچه دوستوم، بیر اویون اویناییردیلار. اویوندان باش آچا بیلمه‌دیم، آنجاق بو کلمه‌لری اونلارین آغزیندان ائشیدیردیم: کاراگاه! / تئروریست! / دوکتور! / آللاه!
اونلار اوینادیقجا من ده قاباغیمدا کی کاغاذدا آدام باشی چکیردیم. باش، باشین اوستونه مینمیشدی، باش، باشین آلتیندا قالمیشدی، باش باشدان بویلانیردی، باشیمی باشلاردان قووزاییب اونلارین باشلارینا دیققت ائتدیم، باشیم چیخمادی باشلارینداکی آغیزلاریندان چیخان باشلاردان، باشیمی گؤتوروب چیخدیم باشلارینین ایچیندن.

۵۶- منی قینامایین
بو گونلر اؤزومده دئییلم، بیری وار بئینیمی دلیک ـ دئشیک ائدیر، بئینیمده یووا سالیب. منی قینامایین! اونو اودلاماق ایسته‌ییرم. ائله اودلاماق ایسته‌ییرم کی هئچ کولوندن ده بیر اثر قالماسین. من بونو ائده‌جم، بو یاخین زامانلاردا بئینیمه نفت تؤکوب اونو اودلایاجام.

۵۷- قهرمان
من هئچ واخت قهرمان اولماق ایسته‌میرم، هئچ واخت! بیر گون گؤرسم کی قهرمان اولورام، هئیکلیمه ائله آفتافا گؤتوره‌جم کی هئچ ایت دفترینده ده آدیم اولماسین.

۵۸- تیلیب دوشمک
چوخ آتیلیب دوشمه‌یین، آتیلین آنجاق دوشمه‌یین. دوشون آنجاق آتیلمایین. نه آتیلین نه ده دوشون، هم آتیلین هم ده دوشون. آتیلیرسیز آتیلین، دوشورسوز دوشون آخی منه دئین یوخدور ـ سن نییه آتیلیب دوشورسن؟!! بونو دئمک ایسته‌ییرم کی منیم آتیلیب دوشمه‌ییم سیزین آتیلیب دوشمه یینیزه باغلی‌دیر. هر حالدا بیز آتیلیب دوشوروک، گؤیدن اوچ آدام دوشدو، بیری گئتدی اویانا، بیری گئتدی بو یانا، بیری ده قالدی یانا ـ یانا…!

۵۹- ایش ایچینده ایش
بیزه زامان لازیم دئییل، داها سامانین ساخلاماغی ایش وئرمز. ایش ـ ایشدن سووشوبدور. ایش ایچینده ایش وار. ایت هورور! کاروانی قویمایین کئچسین، ایشه قالاریق، لوطفن ساخلایین، بو ایتین هورمه‌یی فرقلی‌دیر.

۶۰- بیر شئی
ساعات بیر؛ سیزین عاغلینیزا من نه یازماق ایسته‌ییرم؟ بیر شئی یازماق ایسته ییرم، آنجاق هله ایسته میرم بیر شئی یازام. بیر شئی یازاجاغام، هله بیر شئی تاپمامیشام. چالیشیرام بیر شئی تاپام، بیر شئی تاپا بیلمیرم. بیر شئی تاپسام سیزه سؤز وئریرم بیر شئی یازام. بارماغیمی قویورام دوداغیما، فیکیرلشیرم، بئینیمه زور وئریرم، بیر شئی آلینمیر، دیرناغیمی یئییرم؛ اهن تاپدیم؛ دیرناغیمین آراسیندا سؤز وار؛ بودا سیزین اوچون بیر دیرناق آراسی یازی.

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

آزدان آز، چوخ‌دان چوخ (۸)

رامین جهانگیرزاده
www.ishiq.net

آذربایجان ادبیات و اینجه‌صنعت سایتی

آزدان آز، چوخ‌دان چوخ (۸)

رامین جهانگیرزاده
www.ishiq.net

آذربایجان ادبیات و اینجه‌صنعت سایتی

آزدان آز، چوخ‌دان چوخ (۸)

رامین جهانگیرزاده
www.ishiq.net

آذربایجان ادبیات و اینجه‌صنعت سایتی