ائل حیکایه‌لری: (یار یارا تن گلنده) / سسلندیرن: کبری میرحسینی

kubra mir
ائل حیکایه‌لری: (یار یارا تن گلنده)
سسلندیرن: کبری میرحسینی

اوزون زامانلار اؤنجه، بیر بیرینه تای اولان ار _ آرواد واریمیش. بونلار آواملیقدا، ساده لؤوح لیکده بیر_ بیریندن گئری قالان دئییلدیلر. آنجاق بیری‌نین گؤردویو ایش او بیریسی‌نین خوشونا گلدیینه گؤره همیشه بیر_ بیری ایله مئهریبان ایدیلر. بیر گون بئله اولور کی، باشقا شئی‌لر آلماق اوچون پیه‌ده کی اینه‌یی ساتمالی اولورلار. کیشی اینه‌یین بوینونا چاتینی سالیب، سورور بازارا. گؤرور کی، بازاردا کئچی ساتیرلار، کئچی خوشونا گلیر. اینه‌یی کئچی ایله باش _ باشا ده‌ییشیر. کئچینی قاتیر قاباغینا سورور تویوق _ جوجه ساتیلان یئره. اورادا بیر پیپییی قیرمیزی خوروز گؤرور، چوخ خوشونا گلیر. کئچینی وئریب خوروزو آلیر، دوشور یولا.‌هارادا بیر شئی خوشونا گلیر الینده‌کینی وئریب اونو آلیر. ائله بوجور آلیش _ وئریش ائده _ ائده ائوه بیر توربا تورش آلچا ایله قاییدیر.
آرواد کیشی‌نین گلدیینی دویان کیمی‌سئوینه _ سئوینه کیشینی قارشیلاییر. کیشی‌نین چیینیده کی توربانی یئره قویماقدا اونا کؤمک ائله‌ییر. توربانی یئره قویا _ قویا دئییر :
– هه، کیشی دئ گؤره‌ک نه‌یی ساتیب، نه‌یی آلدین، نه قده‌ر قالدی ؟
– کیشی چکینه _ چکینه دئییر:
– آرواد بیلیرسن نه وار ؟ بازارا تزه‌جه گیرمیشدیم کی، گؤردوم یاخشی بوینوزلو بیر کئچی ساتیرلار، خوشوما گلدی اینه‌ییله باش _ باشا ده‌ییشدیم.
آرواد دئییر: – نه اولار کئچی یاخشی حئیواندیر. لاپ یاخشی ائله‌ییبسن.
کیشی دئییر: – هله بیر دایان، بو‌هاراسی‌دیر. تویوق _ جوجه ساتان یئرین یانیندان کئچنده بیر مخمل توکلو خوروز گؤردوم، خوروز نه خوروز ! کئچینی وئریب خوروزو آلدیم.
– خوروز، لاپ یاخشی، نه عجب سنین یادینا دوشوب بیزیم تویوق‌لارا ائله بیر دنه خوروز لازیم ایدی، ساغ اول کیشی!
کیشی دئییر: – هله بو‌هاراسی‌دیر، بیر دایان، تاخیل ساتیلان یئردن کئچنده آرپا گؤردوم. خوروزو وئریب آرپا آلدیم.
آرواد یئنه سئوینیر: – کیشی، یاخشی ائله‌میسن، عجب ائله‌میسن، بو بویدا حیطیمیز بوش _ بوشونا قالیب. آرپانی سپیب عوضینه نه قده‌ر تاخیل بیچریک. اؤزوموز ده اون ائله‌ییب، بیشیریب یئیه‌ریک. تویوق _ جوجه‌یه‌ده وئره‌ریک.
کیشی دئییر: – آرواد هله دایان، آرپانی دا بیر توربا تورش آلچا ایله ده‌ییشدیم. بودور گتیرمیشم.
آرواد سئوینجله دئییر: – نئجه، تورش آلچا ؟ من نه واختداندی یئریک‌له‌ییرم تورش آلچایا. سن نه آغیللی کیشی‌ایمیشسن. منیم اوره‌ییمدن کئچه‌نی نئجه یاخشی بیلیبسن، آی سنین قادانی آلیم، آی سنین باشینا دولانیم.
کیشی ده راضی قالیر کی، ائله‌دییی بازارلیق آروادی‌نین خوشونا گلیب. حال بو کی، بازاردان تورش آلچا ایله قاییداندا قورخوردوکی، آرواد اونو او کی وار دانلاسین.
آرواد اریله کؤمک‌لشیب تورش آلچا تورباسینی ان قیمتلی بیر نعمت کیمی‌ائوه آپاریر. دوز دئییرلر کی، یار یارا تن گلنده سؤزلریده، ائله‌دیکلری ده، ایش‌لری ده بیر _ بیرینه خوش گلیر و اؤزلرینی دونیانین ان خوشبخت آدام‌لاری حئساب ائدیرلر.

حئکایه‌نی کبری خانیم میرحسینی‌نین سسی‌له دینله‌یین:

 

Check Also

تولوق اوخشامالارى(۱) / بهزاد بیات فرد(حسرت زنگانلى)

تولوق اوخشامالارى(۱) / بهزاد بیات فرد(حسرت زنگانلى) آذربایجانین مدنی ـ فیکری تاریخی ان اسکی عصرلردن ...

One comment

  1. سسیزه قوت اوره ینیزه ساغلیق، عزیز خانیم میر حسینی چوخ گوزل سسله ندیریب سیز

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *