۴۱- بینگ بینگلشمک
آغزینی آچیب، بینگ بنگلشمه، بنگلادیشده بیر کئچی اوتاران وار سن گونشدن، اولدوزدان، آیدان دیزغیرداندا، او گونشی توتوب آتیر بیر شوشه بانکایا، اولدوزلاردان زینقیروو جورلاییب سالیب کئچی‌لرینین بوینونا، آیی کئچی‌لرینه یئدیردیر بلکه کئچی لرینین سودو چوخالسین… یوخ شوخلوق ائله‌دیم، ایشینده اول! بیر آز بینگ بنگلش بیزه بیر آز کهکشان دیزغیرت.
۴۳- بیری وار «ج» حرفیمه گیر وئریر
منیم اؤزومه گیر وئرن چوخ ایدی، شوکورلر اولسون بیری وار«ج» حرفیمه گیر وئریر. بیلیرم «ج» حرفینی گتیرمه‌سم، «ن» حرفینه گیر وئره‌جکلر، سونرا، «ی»، سونرا، «م»، سونرا «ا» و سونرا «ر» حرفینه، بئله لیکله من قورتاراجام و حرفلریمین بیر اوجو قیریلیب قالسا بیر یئرده بلکه اونا دا، گیر وئردیلر. هر حالدا بیز حرفلردن یارانمیشیق. بیزی تیکه ـ تیکه ائتسه‌لر ده، یئنه‌ده بیر حرفیمیز قالاجاق. هر حالدا من آخیردن اوله اؤزومو سیلمه‌یه باشلاییرام؛ بلکه هانسی حرفدن یارانماغیمی آنلادیم.
۴۴- تورپاق و قان
یاخشی یادیمدادیر، اوشاقلیقدا کانالئتلرده چیمنده، آیاقلاریمیزی شوشه کسردی، آیاغیمیزین قانینی دایاندیرماق اوچون، بیر آز تورپاق تؤکردیک اوستونه. تورپاق قانین قاباغینی آلاردی، داها قان سوزولمزدی. ایندی زامان ده‌ییشیب، تورپاق اوستونده قانلار تؤکولور. داها تورپاق تؤکولن قانین قاباغینی آلا بیلمیر.
۴۵- کفن موفته اولاندا
ماراقلیدیر سنین دوداقلارین قاچاندا، دوداقلارینی توتماق اولمور، منیم ده سطیرلریمین باغی قاچاندا کلمه‌لریمی توتماق اولمور. هر حالدا ایکیمیزده بیر قاپی‌یا چیخیریق. سن دئییرسن بویور، من دئییرم یوخ، کئچمه‌رم واللاه سن بویور. بویور ـ بویوردو اولور گل گؤره‌سن، اؤزوم اؤلوم بونو کفنله‌یه‌سن دوز دئییرم. بئله‌دیر ده کفن موفته اولاندا، هامی اؤلمه یی قنیمت بیلیر. سن اؤله‌سن، اونو کفنله‌ییم دوز دئییرم. بو هایدی ـ هایدی دا بیری منی هایا باسیر، من هویلانیرام، من ده قورخومدان هویا باسیرام اونو.
۴۶- سیچان باز
او ائله بیلیر من سیچان دئشییینی ساتین آلاجام، اونون دوشوندویو دوغرودور. من چوخداندیر سیچان دئشییینین آل-وئرینده‌یم، سیچانلارلا اویناماغی، سیچانلاری اویناتماغی سئویرم. بیری قوشباز اولور، بیری ایت باز، بیری ده آت باز، من ده سیچان بازام.
۴۷- سکس ـ مکس
سئکسوال بیر حیاتدیر یاشاماق، بونو هئچ واخت دئیه بیلمه‌رم کی منیم سکس مکسله ایشیم یوخدور، یوخ ائله ایشیم پئشه‌م سکس ـ مکسدیر، او ائله بیلیرکی من اونون نه دئدیییندن و کیملره دانیشدیغیندان قورخاجام و چکینه‌جم اؤزومدن. یوخ بو ساده‌جه منم، ایچیمده ـ میچیمده اولان حیسلر ده منیم‌دیر، ایستر چیرکین اولسون ایستر تر- تمیز. آنجاق بیر شئییم وار، یوخ منظوروم او شئی دئییل، منظوروم ایکی اوزلو اولماقدیر. هئچ اولماسا چالیشمیشام کی اوزومو ایکی قات ائله‌مه‌یم. دوغروسو ایکی اوزلو آداملار هامیدان چوخ فاحیشه اولورلار.
۴۸- شیطانین بالاسی
هامیدان چوخ اؤزومدن قورخورام، هردن اؤزومو ائله چیرپماق ایسته‌ییرم کی هئچ ایسته‌میرم آیاغا قالخام. بو گونلر او حالدایام، بو گونلر ان چیرکین و موندار آدام کیمی گؤسترمک ایسته‌ییرم اؤزومو، البتده گؤسترمک یوخ ائله چیرکین و موندار اولماغیمی آیدینلاتماق ایسته‌ییرم. بعضی‌لری ائله بیلمه‌سین کی من ایمام بالاسی‌یام، من دوغروسو ائله شیطانین بالاسی یوخ، شیطانین اؤزویم.
۴۹- شعر نه دیر؟!!
شعر بیر اویونجاق دئییل، شعر بیر اویوندور. شعری اویونجاق ائدیب، اؤزونو اویناتما. شعر «حسن سوخدو ده‌ییرمانی» دئییل کی شعر ساده‌جه بیر ده‌ییرماندیر، آدینی شاعیر قویورسانسا، بونو بیلمه‌لی‌سن کی ده‌ییرماندا هر نه‌یی دارتماق اولماز. شعر نه گؤیده‌دیر، نه یئرده، شعر ساده‌جه سنده‌دیر، بیر آز اؤزونو سیلکه‌له‌سن شعر تؤکولر سندن. شعر تکجه وارلیغین ائوی دئییل، ایندیکی شعرلر نئچه مرتبه‌لی بینالاردی، هر مرتبه‌نی چیخدیقجا بیله‌جکسن کی شعر اوجالدیقجا هر نه آیاغینین آلتیندا قالیر. شعر نه اوره‌کدیر، نه گؤز، نه ده کی قاش؛ شعر آیاقدان باشا باشدیر، باشین اولماسا باشین چیخمایاجاق شعردن.
۵۰- زیبیل
هر دن ائله دویورام کی، تام بیر زیبیل قابی‌یام، ایچیمه او قده‌ر زیبیل دولور کی، زیبیللر قولاغیمدان، بورنومدان، آغزیمدان تؤکولور. بو شکیلده اولان یازینین عکسینه من دئییرم: ـ لوطفن بوندان آرتیق داها زیبیل تؤکمه‌یین ایچیمه، آرتیق من زیبیلدن دولموشام!
