آتلیلار …
اسماعیل خرمی
ایچیندن اود توتوب دئیه‌سن یانیر بو حیات
کوچه لر بیر اوشاق ایزینه تامارزی قالیر.
دمیر دیمدیکلی آتلیلار
آیاق باسیرلار بیر ایچیم یاشام اوسته.
سرین و یومشاق
بیر اودوم یوخو اوسته.
دامارلاری نئفت قویولارینین تریاکی‌سی
اوره‌کلری-
دولارلارا سوواشیق بو آتلی‌لارین،
کورکلریندن جهنم تورباسی
وگؤرلریندن قارا سئودانین
کولگه‌سی سورونور.
اونلار-
اود سالیریلار تانرینین دیک باخدیغی یئره.
دووارلار سیزیلداییر-
دووارلار تیتره‌ییر-
دووارلار قورخور بو آخشام.
قبیردن خورتلامیش بو آتلیلار آیاقلاریندان.
