ایکی شعر / میرحسینقلی ریاحی‌فر(سیّد)

riyahifar
ایکی شعر
میرحسینقلی ریاحی‌فر(سیّد)

۱-       گلین!

یازیریق آچیلان چیچکدن یازدا
گلین قیشدا سولان گولدن ده یازاق!
مرمر سینه‌لردن یازان آز دئییل
گلین قابار اولموش الدن ده یازاق!

یازیریق دوداقدا جان آلان خالدان
گوموش کمر، اینجه بئل ایپک شالدان
عرفان عالمینده تاپیلان حالدان
گلین گؤزدن آخان سئلدن ده یازاق!

یازیریق گؤی اوزره گؤز ووران آیدان
قییا باخیشلاردان قیقاجی چایدان
عاشیقه معشوقدان وئریلمیش پایدان
گلین تئز آغاران تئلدن ده یازاق!

یازیریق گوناهسیز یئی اولان سویدان
دئییریک گلیندن، دئییریک تویدان
آغ آپپاغ بوخاقدان، الیف تک بویدان
گلین دالا بنزر بئلدن ده یازاق!

یازیریق خانیمی‌قورویور کنیز
مئی پایلاییر مجلیس آرا آی بنیز
غزلده توی توتور ساحیلسیز دنیز
گلین دوزلاق اولان گؤلدن ده یازاق!

«اؤزگه چیراغینا یاغ اولماق بسدی»
اؤزون اوستون بیلن دیلیمی‌کسدی
بیری پیشدی بیری سویوقدان اسدی
گلین«سیّد» آنا دیلدن ده یازاق!

۲-       آغ گون حسرتینده

گؤیوموزده بیر گون هومای اوچمادی
آغ کؤلگه‌سین گؤرک قارا دونیادا
قارا ایلانلارا دوشدو ایشیمیز
باش گؤتوروب گئتدیک‌هارا دونیادا

یاشام بویو باخدیق خزان باغلارا
باهاردا سارالمیش سولموش تاغلارا
سیغیندیق گؤی دلن اولو داغلارا
توش گلدیک چووغونا قارا دونیادا

قیشین چیلله‌سینده یاندیق آلیشدیق
درده همدم اولدوق غمه آلیشدیق
باجارمادیق دینمز اولاق دانیشدیق
کؤکسوده گول آچدی یارا دونیادا

نه ایشله‌دیک هدر اولدو امکلر
زول ـ زول اولدو قابار چالدی کورکلر
یولداشلاری قوجاقلادی دیرکلر
نسیمی‌لر یئتدی دارا دونیادا

گئدن یولداشلاری هر گون آنیرام
قارانلیغی یارماق اوچون یانیرام
یازیق بو «سیّد»ی چوخدان تانیرام
بیر آغ گون گؤرمه‌دی قارا دونیادا

Check Also

دیل‌سیزلیین دیلی / ع.ن. چاپار

دیل‌سیزلیین دیلی ع.ن. چاپار منه دیل یوخ، دیل‌سیزلییی اؤیره‌دینیز! منه دئیین معناسینی – اوغرون – ...

۲ comments

  1. evin abaad ustad

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *