چئویرن: رقیه کبیری
ترجمه: رقیه کبیری
رقیه کبیری

kabir

وو وی۱
رقیه کبیری

جان… جیسم… ایکیسینه‌ده توخونوب، ایکیسینی ده زده‌له‌ییب. هاردان کؤک سالمیشدی؟ بیلمیرم. هاردان کؤک سالدیغینی نه علمین باشی چیخیر، نه ده منیم. دوردوغوم یئرده کؤک آتمیشدی. نه ال توخونموشدو، نه آغیز. نه بیر کؤرپه‌نی دیرچلتمیشدی، نه ده بیر سئوگی‌یه جان وئرمیشدی. جانیمی زده‌‌له‌ییب، جینسیّتیمه قییدی.
یارا وار باغلارلار، یارا وار داغلارلار. آمما منیم باغلانمیش یارامین داغ- دامغاسی هم جانیمین، هم ده جیسمیمین جینسیّتنه توخوندو.
آینالانیرام. جیسمیمی آینانین دوُرولوغوندا گؤرورم. الیمی سینه‌مه چکیرم. هله ده آغرییر. قیراغا چکیلیرم… آینالانیرام… قیراغا چکیلیرم… آینالانیرام… آینا منی اؤزونده ساخلامیر. تاپدیغی کیمی ده ایتیریر. کئف‌سیزلیک‌له آینا توتماز. کئف‌سیزلیک آینانین دوُرولوغونو کاسلادیر. جیسمیم‌له جانیما باسیلمیش دامغانین ایزی کیمی. سرطان، جیسم- جانیمی زده‌‌لمه‌دن ایلیشیب آینادا قالمالی‌یدیم. اولاسی‌یدی؟ گؤره‌سن بیر گون بیر آینا تاپیلاجاق کی اینسانین ساغلاملیغینی اؤزونده ساخلاسین؟!
دئسم کی شیمی‌درمانی سببیندن توکو تؤ‌کولموش باشیم هئچ ده وئجیمه دئییل، یالان دئمیشم. گئج- تئز، توکوم کؤکدن گؤیه‌ره‌جک. آمما دؤشوم نئجه..؟
«آغلاماقدان ایش چیخماز»، دئدی. «اؤزووو بوراخاجاخسان. اؤزووونن ساواشمییه‌جاخسان. سنی استرس‌دن قوتارار. آرام اوتوراجاخسان تا اؤزو آستا- آستا گلیب گئچسن»
– «ایش ایشدن کئچندن سورا؟»
– «هله نه اولوب کی؟ اوُزون اوُزادی بیر یول وار قاباغیندا»
اوتاندیم دؤکتوره دئیَم کی، منیم احوالیم تویدان سوراکی حنا احوالیدی. «کوردان، کاردان، چولاخدان اولسایدیم گئنه بیر سؤز…»، دئدیم.
– «هر اورقانین اؤز یئری وار. شوکر ائله کی ایندی هر جور پروتز وار.»
– «پروتز؟… یوخ! قوی اوندا سینه‌م تاختا کیمی قالسین، آمما پروتز یوخ!»
سؤزومو سایماییب، سؤزونه دوام وئردی:
– «هئش جور چالیشمییه‌جاخسان. نه فیکیرلشه‌جاخسان، نه ده چالیشاجاخسان کی فیکیرلشمییه‌سن. قوی فیکیرلر عیناً سیچان کیمی هاردان گلیر گلسین، هارا گئدیر گئتسین. سن فقط دور باخ. آنجاق پیشیک کیمی اولاری توتماق اوچون اوستلرینه جومما. فیکریوی‌نن عملین بیر اولسون. گئدنده گئت، گلنده گل، اوتوراندا اوتور. یئینده یئه، گؤیلون موسیقی ایسته‌ینده، موسیقی‌یه قولاخ وئر… آغلایاندا دا آغلا. آنجاق هئچ کیمی سایما. اؤزون اؤزووه دئه کی، ایندی آغلاماغیم گلیر، اونا گؤره ده آغلیرام. اؤلنده ده اؤل، آمما اؤلومه فیکیر وئرمه.»
بیزیم بو حکیم انکولوژیست۲ اولمادان چوخ، پسیکولوژیست‌۳ دیر. چالیشدیم هر زادا عادی باخیم. باشاردیقجا فیکر ائله‌مه‌ییم. اونون دئدی‌یی کیمی باغداش قوردوم. بارماقلاریمی بیر- بیرینه قیفیللادیم. کوره‌ییمی دیکلتدیم دؤشومو قاباغا وئریب، گؤزلریمی یومدوم کی، بلکه ایچیمده اولان هؤشنه آستا- آستا گلیب، سوووشسون. دؤشوم تیره چکدی. آغلاماغیم گلد‌یینه گؤره آغلادیم…
آینالانیرام. جرّاحلیقدان سورا، بو بیرینجی دفه‌دیر کی جسارت تاپیب، بو قدر آینا قاباغیندا دایانیب، اؤز جیسمیمه باخیرام. بیر آینایا باخیرام، بیر ده آینانین باشیندا چرچیوه‌لنمیش جیسمیمین بیر پارچاسینا، سرطانلی اورقانیمین شکلینه. اوزده ساغلام گؤرونور، آمما ایچدن آغاجین ایچینی قورد یئمیش کیمی‌دیر.
آینا نه قاش- گؤزومو گؤستریر نه آغیز- بورنومو، نه ده چیین‌لریمه آغیرلیق ائله‌ین قوللاریمی. آنجاق سینه‌مده‌کی بیر جوت نور‌افکن کورلوغونو اوزومه چکیر. اوسته‌لیک هامار و کیشی کؤکسونه دؤنموش دؤشوم گؤزومه هم آغلامالی، هم ده گولمه‌لی گلیر. اوره‌ییمی یاندیران یئری بوراسیدیر کی، حتی کیشی‌لرین دؤشونده اولان مرجی بویوندا گیله ده، تاختایا دؤنموش صاف سینه‌مده گؤزه دیمیر. هامارلانمیش کؤکسومده، دریمین کسیلمیش یئرینده، تکجه اَت- دری جینسیندن اولان، بیر جوت مووازی قیرمیزی خط گؤرونور آنجاق.
آیاغا دوروب اؤزومو آزاد بوراخیرام. چالیشیرام طبیعی باخیم هر شئیه. چالیشیرام یوخ، سهو ائله‌دیم. اصلینده چالیشمیرام. استرس، غصه، فلان قوی اؤزو گلیب کئچسین. نه ایشیم وار آخی..! بو گونلر ایشیم- پئشه‌م اؤزومله باریشماق اولوب. چالیشیرام اؤزومله نه ساواشیم، نه ده ساواشماییم. ایستیرم باشاردیقجا طبیعی داورانیم. تاپینماق کیمی. آغلاماغیم دا آغلاماغا تاپینماق‌دیر. ندنینی آختارمادان آغلاییرام. آغلاماغی نه پیس، نه ده یاخچی سانیرام. «ساده‌جه آغلایاندا آغلا، گولنده گول»، اؤزوم اؤزومه دئییرم.
مریضخانادا قالارکن قالمیشدیم کی موبایل‌لا اؤزومدن چکدی‌ییم شکیلی وئریم ظاهیر ائله‌سینلر یا یوخ. طبیعی داورانماق فیکریمی بیر یانلیق ائلیر. ایسته‌دی‌ییم ایشی گؤرمه‌لی‌یم، نه اولور اولسون.
شکیل‌خانایا گیرنده، استرس، غصّه، هامیسی اؤتوب، بیتمیشدی. اؤزومو یاخشی اله آلمیشدیم. ایچری گیرمه‌دن شکیل‌خانانین آینا شوشه‌سینده باشدان آشاغا، اؤزومه بیر نظر سالدیم. تاختا کؤکسوم شوشه‌نین آینالیغیندا ائله ده بتر گؤزه ویرمیردی.
«بو شکیلی ظاهیر ائله‌ییب، سورا دا چرچیوه‌یه توتارسیز» دئییب، موبایلیمی شکیلچی‌یه ساری اوُزاتدیم. شکیلچی قبیضی میزین چکمه‌سیندن چیخاردیب، اوزرینده بیر شئی یازمادان، موبایلی اَلیمدن آلیب باخدی. قفیلدن ایلدیریم وورموش آدام کیمی بیردن- بیره رنگ روفو دَییشدی. یئریندن قالخیب:
– «بو نه‌دی خانیم؟ اؤزووو سَریمیسن؟»
–  «نه‌دی کی، شکیل‌دی دااا»
شکیلچی‌سه قاشلارین دؤیونله‌ییب، سیقار قوطوسونو کؤینک جئبیندن چیخاردیب، بیر سیقار آلیشدیردی:
– «من بو ایشلردن گؤرمه‌رم… اماکن گلیب بونو منیم لابراتوواریمدا گؤرسه، توکان- بازاریمی چکیب باغلار»
موبایلیمی آلیب، سویو سوزولموش شکیل‌خانانین قاپیسینا ساری یوللانیردیم کی، آیاغیمی ائشییه قویوب- قویمامیش بیر داها گئری دؤندوم. شکیلچی دؤندویومو گؤرجک، عصبی بیر حالدا سیقاری‌نین کؤتویونو فیلیم قوطولاری‌نین بیریسی اوزرینده ازمک ایسته‌دیکده بارماقلاری قوطونون داریسقال آغزینا ایلیشدی. گوجونن بارماقلارینی قوطونون ایچیندن چیخاردیب گؤزاوجو منه باخدی. منسه دوداغیمی قاچیرتدیم.
«آی محترم، بو سرطانلی بیر خانیمین عملدن قاباخ عکسی‌دی. ایندی جراحلیخ ائلییبلر. ایستیر بدنی‌نین کسیلمیش قیسمتینی عؤمرو بویو اوتاغی‌نین دووارینا ووروب، یادیگار ساخلاسین. آللاه ائلمه‌میش زننده عکسی زادی دَییر کی! بیرده بون‌نان سیزین توکان بازاریزین باغلانماسینا نه دخلی وار؟»
شکیلچی قالدی کی گولسون یوخسا کدرلنسین. بیر اؤزومه، بیر ده هامارلانمیش کؤکسومو سوزدو.
– «آلـلاه کؤمه‌یی اولسون»
منسه اؤزومو سیندیرمادیم:
– «ایندی آمازونلارا بنز‌یر»
شوبهه‌لی بیر حالدا دلی‌یه باخان کیمی منه باخدی:
– «آمازون ندی؟»
– «آمازونلار یونان افسانه‌لرینده دؤیوشن خانیملاریدیلار کی، یایی دؤشلری اوسته راحاتجا چکیب، کیشی دوشمن‌لری اوخلاماغ اوچون اؤزلری بیله- بیله دؤشلرینی کسرمیشلر»
شکیلچی قفیلدن قهقهه چکیب گولدو.
– «مئمورینی چیخارت وئر گؤروم نئینیه بیللم… ظاهیر ائلییَن‌نن سورا فایلین سیله‌جام. سن ده شتر دیدی، ندیدی هاااا… یاخچی؟ هئش کیم بیلمه‌سین من بو شکیلی ظاهیر ائله‌میشم هاااا»
– «سیز بونو منه بیر تابلو کیمی وئرین من ده عاغلیمین لغت‌خاناسیندا هر نه شتر وارسا سیله‌رم»
آینانی اؤزومدن بوشالدیرام. منسیز اونون دورولوغو داها دا گؤرکملی‌دیر. کامپیوترین باشیندا اوتورمامیش بیر داها چیلپاق جانیم‌لا دیزه چؤکورم. خودخوری ائلمه‌دن بیر آز دؤزورم. استرس‌سه اؤزباشینا گلیب اؤتوشور. پروتزلری سئچمه‌یه گرک سویوق‌قانلی اولوم. حتی بو دؤنه اؤکوتمه‌یله آغلاماق ایسته‌ییرم، اؤکوتمه‌یله آغلاییب، دینجه‌لیرم. غصه‌دن بوشالیرام. ایندی عاغیللی- باشلی آدام کیمی کامپیوتر باشیندا اوتورا بیله‌رم.
مانیتورداکی پروتزلرین شکیل‌لرینه باخیرام. بو پروتزلرین هئچ بیریسی آینانین باشینا ووردوغوم تابلویا بنزه‌میر.
دؤکتور «هر ایکیسینده ده وار… اؤزو ده قرئیدِ سه دی»، دئمیشدی. دانیشا- دانیشا  پاتولوژی‌نین آنالیز کاغیذی الینده بوزوشموشدو. دؤکتوردن اؤنجه اؤزوم گوگل‌ین آختاریش موتوروندا «قرئیدِ سه» آنلامینی آختاریب، تاپمیشدیم. سورا تک‌باشینا اوتوروب آغلامیشدیم. اوندا هله طبییعی داورانماغی، اؤزومله ساواشماماغی باشارمیردیم. آغلاماغا گؤره دئییل، اؤز حالیما اوره‌ییم یانیب، آغلامیشدیم. منی اؤیودن اولمامیشدی. غصه خیرتده‌ییمین یولون کسمیشدی. اؤزوم اؤزومه توختاقلیق وئره بیلمیردیم.  اوره‌ییم ایسته‌میشدی کاشکی بیریسی تاپیلیب، منی دانلاییب، دئیردی: «اؤزووو سَریمه قیز، دور آیاغا! درمان دالیسیجا گئتماخ عوضینه اوتانمیسان اوتوروب گؤزووون آبقوراسینی سیخیسان؟ اؤلوم دئییل کی قیر- ساققیز کیمی گلیب سنه یاپیشسین. سرطاندی دااا. ماشالــلاه  اؤزون کی درس اوخویوبسان بیلیسَن کی علم هر دَیقه، هر ثانیه آپدیت اولور!»
دی گل کی، کیمسه تاپیلمامیشدی بو سؤزلری منه دئسین. علم هر ثانیه آپدیت اولسایدی دا، هله بوراجان اونون ندنینی، هاردان گلدی‌یینی، نئجه تاپیلدیغینی بللی ائده‌ بیلمه‌میشدی.
خرچنگ سؤزونو اؤزوم اؤزومه تکرار ائله‌ینده قفیلدن خرچنگ‌لرین ماققاشا اوخشار قوللاری، کؤکسومو جیرماقلاییب، دؤشلریمی دیده‌له‌دی‌یینی حیس ائله‌میشدیم. سورا اؤز- اؤزومه «یووو، نه خرچنگ نه ده کانسر، ائله من ده هامی کیمی سرطان دئیه‌جه‌یم. سرطان سؤزو خرچنگدن داها یومشاق دیلیمده دولاشیر. سرطان یومشاق- یومشاق اینسانلارین جانینین کؤکونه ایشله‌سه ‌ده، خرچنگ سؤزو کیمی، قاباجیل دئییل، آغیزدا دولاناندا، آدامین جانینی دیده‌له‌میر. آنجاق نسه اؤلوم کیمی بیر جور قورخو سالیر آدامین اوره‌یینه»
بون‌نان بئله دؤکتوردن سوروشدوم: «قرئیدِ سه یانی نمنه؟» او ایسه ماتملی باخیشینی منه زیلله‌دی. باخیشی ائله غصّه‌لی‌یدی کی بیر آن اؤز دردیمی ایتیریب، اونون دردینه قالدیم. دئدیم یقین دؤکتورون ده لاپ یاخین آداملاریندان بیریسی، بلکه باجیسی، بلکه ده یاشام یولداشی بو درده گرفتار اولوب کی، اؤزونو منیمله بئله اؤزدش گؤستریر.
– قرئیدِ سه یانی اوّلین فورصتده گرَح عملِ جراحی اولاسان. جراحلیقدان سورا دا انکولوژیست یانینا گئدیب شیمی‌درمانی درمانلاری آلاسان. اؤزوده آغیر عمل‌دی. بیر آز دا باهالی‌دی. تعجّوب ائلیرم… آخی… بئله سنین یاشیوا یاراشمیر باااا!»
دؤکتور یادیمدان چیخارتدیغیم تک‌باشینا اؤتوب کئچن قیرخ ایکی ایلی یادیما سالدی. آز قالیردی دؤکتورون سؤزلرینی دینله‌یه- دینله‌یه گؤز یاشلاریم گئنه یاناقلاریمی ایسلاتسین. او ایسه میزی‌نین اوستونده‌کی کیتابی وارقلایاراق سؤزونه دوام وئردی:
– «هرچند، نئچه ایلدی کی ابتلا یاشی آشاغی گلیب، اما هر دردین بیر درمانی وار…. دئدین سوبایسان دا، یووو؟ سَن‌نَن سورا خانواده‌زده سرطانا مبتلا اولان وار؟.. واختی تلف ائله‌مه. یازیرام گونو صاباح گئدیب مریضخانادا یاتاسان»
گؤز قاباغیندا اولان وجودومون قادینلیق کیملی‌یی بیر آزدان یوخا چیخاجاق ‌ایدی. بیله‌ییمه باغلادیقلاری قول‌باغی‌نین اوستونده یازیلمیش کیملی‌ییمی اوخودوم. آدیم، سوی آدیم، آتامین آدی‌نین یئری قول‌باغینا یاپیشمیش برچسبین اوستونده بوش قالمیشدی. گؤزلریم دولوخدو. دؤشلریمی اوووجلاریمدا توتدوم. اوووجلاریما آغیرلیق ائله‌دی. لَمف دویونلری اونلارین ایچینده سرطانا دؤنوب، وَز باغلاسایدی دا، هله ده یومشاق ایدیلر. اووجومو اَل دییلمه‌میش دؤشلریمین گیله‌سینده دولاندیردیم. قولتوقلاریمین  آلتیندا گزدیردیم. بارماقلاریمین اوجو جویز بویدا لَمف‌لره توخوندوقدا، اؤزومدن اختیارسیز آغلادیم. پرستار قاپیدان اَییلیب، دئدی: «سانجاق، ساعات، مصنوعی دیش… هرنه واریندی چیخارت! یاریم ساعاتا جان عمل اوتاغینا گئده‌جاخسان… باخ… بونا! هله آغلیری… نه‌یین معطلی‌سن؟ دی دور عمل پالتارلاریوی گئی آخی!»
جانیم ائله بیل سال داش ‌ایدی. گوج- بیللاهینان اونو تخت اوستوندن قالدیردیم.
پرستار بیر داها گئری دؤنوب «تئز اول پالتاریوی دَییش آخی»، دئدی.
اونون دئمه‌یینه اؤکوتمه وورا- وورا اَینیمیده‌کی مریض‌خانا پالتارینی چیخاردیب، کاغیذ کیمی خیشیلدایان بیر دفه‌ گئییملیک پالتاری گئینده عاغلیمدان بیر فیکیر کئچیب آغلاماغیم درحال کسیلدی. پالتاری گئیمه‌میش موبایلمیی گؤتوروب، جانیمین زده‌لنمیش بؤلگه‌سیندن بیر نئچه شکیل چکدیم. بیردن- بیره پرستاری قاپی چرچیوه‌سینده دایانمیش، اوزونو جیرماقلایارکن گؤردوم…
آینانین باشینا وورموش شکیلی گؤتوروب، مانیتوردا گؤرونن پروتزلرله توتوشدورورام. بیر گؤزوم شکیلده، بیر گؤزوم مانیتوردا…
دؤکتور «قارنیندان کسیب، پروتز قویماق اولار»، دئمیشدی. اَلیمی قارنیما چکیرم. آلتی آی شیمی‌درمانی سوره‌سینده، آریقلامیشام. قارنیمین نه پی‌یی قالیب، نه اَتی. کؤکسومده‌کی بیر جوت مووازی کیسیلمیش یارا ایزی بوتون حیاتیما یئترلی‌دی.
«بیر ده تزریقی پروتز وار»، دئمیشدی دؤکتور. مانتیتورداکی شکیللری بیر بَه بیر آچیرام. تزریقی پروتز نئجه اولا بیلر، دئیه، گوگل‌دن اوخویوب، شکیلینه باخیرام. ایضاحی یازیلارینی دا بیر بَه بیر اوخویورام. سیلیکون آدلی بیر مادّه کؤکسون جراحلیق اولان یئرینه نؤوبتی اولاراق زینه- زینه تزریق اولونوب، سورا دری‌نین آلتی قوووق کیمی شیشیر…
«گؤره‌سن قوووق دؤشون گیله‌سی اولماز؟»
کیمسه یوخدور سوآلیمی جوابلاسین. اَلیمی هامارلاشمیش کؤکسومه چکیرم. مانیتوردا پروتزلره عاید صحیفه‌لری بیر بَه بیر دییشیرم. لیفجی‌یه بنز‌ر بیر پروتز دیقّتیمی چکیر. پروتزین گیله‌لری دوغال گیله‌لره بنزه‌ییر.
شکیللره باخماغا دوام وئره بیلیمرم. گئنه طبیعی اولمالی‌یام. آزاد بوراخیرام اؤزومو. عادی باخیرام هر زادا. گیله اولور اولسون، اولمور اولماسین. نه اولدوغونا فیکیر وئریرم، نه ده اولمادیغینا. نه دؤشون وارلیغینی دوشونورم، نه ده یوخلوغونا. آنجاق هر زاددان اؤنملی ریلکس اولمالی‌یام. اؤزومو آزاد بوراخیرام کی غصّه اؤتوب کئچسین. نارین- نارین آغلاماق ایسته‌ییرم. آغلاییرام. سورا اؤکوتمه ووروب، هؤنکور- هؤنکور آغلاییرام…

آبان ۱۳۹۲

 ایضاح:
۱-  Wu- wei اسکی چین فلسفه‌سینده عادی و طبیعی داورانماق.
۲- – انکولوژیست: قان متخصیصی
۳- پسیکولوژیست: روانشناس

چاپ

5 پاسخ

  1. حؤرمتلی قلمداش، ابوالفضل جورابچی جنابلاری؛ هر بیر اثره نقد یازماق (مثبت یا منفی اولدوغونا باخمایاراق) او اثره قیمت وئرمک آنلامیندادیر. دقت‌له حکایه‌نین اوخویوب، آنالیز ائدیب، فیکیرلریزی من و اوخوجولارلا پایلاشدیغیزا گؤره سیزدن تشکور ائلیرم. یقین کی سیزین باخیشلاریزدان فایدالاناجاغام.
    سیزه یازیلاریزدا اوغورلار آرزو ائدیرم.

    سایقی‌لاریملا: رقیه کبیری

  2. حؤرمتلی رقیه خانیم کبیری کیمی بیر یازارین اثرینه نقد یازماق منیم حدیمده دگیل. آنجاق جسارت ایله، ادبیابیمیزا ماراقلی و بو ساحه ده فعال بیر اوخوجو اولاراق، نظریمه چاتانلاری یازماق ایسته ییرم.
    “وو وی” ناغیلیندا سرطان خسته لیگی سونوجوندا، دؤشلری کسیلن و شیمی تراپی سونوجوندا، ساچلاری تؤکولن اورتا یاشلی بیر خانیمین دویغولاری چوخ رئال، آچیق و عینی زاماندا درین دویغولو بیر شکیلده قلمه آلینیب. بو درورومدا اولان بیر خانیمین اؤز ساغلیغینی گوزگوده، یوخسا شکیلده اولسا بئله، قورویوب اؤزو اوچون ساخلاماسی اوخوجونون گؤز یاشینی آخیداجاق قدر دویغولو اولدوغونون یانیندا چوخ دا رئال و گرچکچی دیر.
    بونون یانیندا، یاردیمجی بیر تراپی اولاراق مدیتاتسیون و اوزاق شرق متودلارینا اشارده ائدیلمه سی چوخ دیققت چکیجی و ادبیاتیمیزا بیر تازالیق دیر. اوروپا اؤلکه لرینده مدیتاتسیون و اوزاق شرق متودلاری بیزیم توپلوموموزدان داها چوخ تانینیر. بو باره ده یایغین بیر شکیلده بیلگیلنمه و بیلگیلندیریلمه گئدیر. روح ساغالتیجیلیق (پسیکوتراپی) عرصه سینده اوزاق شرق متودلاری جددی بیر سئچنک (آلترناتیو) اولاراق دیققته آلینیر و بیرچوخ روح ساغالتیجی اؤز خسته لرینه مدیتاتسیون توسیه ائدیر. بونون یانیندا کلاسیک و “علمی” طب بئله مدیتاتسیونو بیر پارا خسته لیکلره قارشی بیر اؤنلم (پیشگیری) اولاراق قبول ائتمکده دیر. بیزیم توپلوموموزدا ایسه “علم” این آنجاق اوروپا و امریکادان قایناقلاندیغی اینانجینا دایاناراق، مدیتاسیون و اوزاق شرق متودلاری “غیرعلمی” اولاراق توصیف ائدیلیر و بیزیم بیلیم آداملاریمیز بو متودلارا یاخین گلمکدن چکیندیگلری اوچون آنجاق شارلاتانلار بو متئدلاردان یارارلاینیرلار.
    رقیه خانیمین مدیتاتسیون و اوزاق شرف متودلارینی بو ناغیلدا بیر دوکتروون دیلیندن اوخوجویا یئتیرمه سی دوغرودان دا تحسین ائدیلملی دیر.
    “وو وی” ناغیلیندا ندن – سونوج ارتباطینا چوخ قیسا بیر اشاره ائدیلیبدیر. خسته نین جراحلیق اوتاغینا گیرمه دن قولونا باغلانان و اوستونده کیملیک بیلگیلری یازیلمیش اولان قول باغیندا آتاسینین آدینین یئری بوش قالیب. دئملی بو خانیم آتاسیز بیر قیز اولاراق یاشاییب. بو اشاره دیققتلی بیر اوخوجونون گؤزوندن قاچماسا دا، عموم اوچون سرطان ایله آتاسیزلیغین ارتباطینی آیدینلیق ایله آنلاتمیر. بو خانیمین سرطانا توتولماسیندا رول اوینایان فاکتورلار، اونون اوشاق و جوان ایکن یاشیدلاری طرفیندن اولدوغو کیمی بوتون اجتماعی محیطده “یئتیم”، “آتاسیز” اولاراق گؤستریلمه سی، آتاسیز اولدوغو اوچون قیرخ ایکی یاشینا قدر اؤزونه بیر حیات یولداشی سئچه بیلمه دیگی، بو خانیمین آناسینین دا کیشی سیز بیر خانیم اولاراق چتینلیکلره معروض قالدیغی، یاشامینی زحمت ایله سوره بیلدیگی، بلکه ده بیر چوخ زامان “آی آلله بو قیز اولماسا ایدی اؤزوم بیلردیم نه پوخ یئمه لییم” کیمی دویغولاری اولدوغونا، و بو آغیر یاشام شرطلرینین سرطانین گلیشمه سینده کی رولونا عوموم اوخوجونون آنلایابیلدیگی قدر آیدینلیق گتیریلمه میشدیر.
    بو خانیمین دؤشلرینی الدن وئرمه سینده، اونون قادینلیق کیملیگینین ده یوخ اولونماسی چوخ آیدین و آچیق آنلاتیلیبدیر. آنجاق دؤشلرینی الدن وئرمه سی ایله آنالیق دویغوسونون دا یوخ اولدوغونا اشاره ائدیلمه ییبدیر. دؤشلری کسیلدیکدن سونرا ساغ بیر آنا کیمی اوشاغینی باغرینا باسیب امیشدیرمک دویغوسونون دا یوخ اولدوغو و بو حسرت و آرزو دیله گتیریلمه ییب دیر.
    ناغیلین سونو ایسه خسته خانیمین اینترنت ده پروتز دؤش مودلی آختارماسی و شرق فلسفه سینه دایانان اؤز اوغورتو (تلقین به نفس) و آغلاماق ایله راحاتلیغا قاووشماسی و نئچه نقطه ایله قورتولور. بورادا گئنه اؤزتوختاتما (خوددرمانی) وورقولاندیغی، دئملی “هر انسان سونوندا اؤزو اؤزونه یاردیمجی اولمالی دیر” دیله گتیریلدیگی چوخ مثبت و خوش گؤرولو بیر سون دور.
    آلترناتیو اولاراق، بیر – ایکی آرتیق جمله ایله بو خسته خانیمین پروتز دؤش تاخدیقدان سونرا بیر قولچاق آلیب، گئجه یاینیندا یاتیرداراق پروتز دؤشونو قولچاغیل آغزینا سالماسی، اونو اوخشاماسی و قوجاقلاییب باغرینا باسماسی ایله آنالیق دویغولارینی یاشاماغا چالیشدیغینین یانیندا بیر ده اوشاق ایکن قولچاقلارینی جانلی و روحلو اولاراق حس ائدیگینین خوش خیالیندا راحات بیر یوخویا گئتمه سی ایله سونا گله بیلردی بو ناغیل.

    حؤرمتلی رقیه خانیمین آچیق اورکلی بیر انسان اولدوغونا و منیم یازدیغیما مثبت گؤز ایله باخاجاغینا دریندن اینانیرام.

    بوتون یوردداشلاریمزا و دیلداشلاریمیزا ساغلیق، شنلیک و باشاری دیله ییرم.

  3. حؤرمتلی سورگون جنابلاری، سلام.
    اورتاق دیلین باره‌سینده دئمه‌لیم کی هله‌لیکده چوخلو ندنلره گؤره تورکجه نثر یازماقدا اورتاق دیل یوخدور. آنجاق من «وو وی» حکایه‌سینده ده آیری یازیلاریم کیمی چالیشمیشام باشاردیغیم ادبی دیلده بیر روایت یازیم. آمما آرتیرمالیام کی حکایه تکنیک‌لرینه دایاناراق کاراکترلرین دیالوگلارینی هر هانسی بیر یئرین آغزی‌ایلا یازماق اولار. من ده بو شیوه‌دن فایدالانمیشام. بیر یازیچی اولاراق هر شخصین اؤز یاشادیغی یئرین لهجه‌سی‌ایله یازماقلا راضی‌لاشمیرام. اوسته‌لیک من خوی دوغومویام و تبریزده یاشاییرام.
    سایقی‌لارلا: رقیه کبیری

  4. سلام
    رقیه خانیم کبیری نین اللری آغریماسین. ایشیق سایتیندا گلمیش (وووی ۱)ی دؤنه دؤنه اوخودوقدا، بو ناغلیجیغی آرتیقجادان به یه ندیم. اونون جنسیت بابتیندن مووصوعا باخماسینا آرتیق ماراقلاندیم. چونکو قادینلارا مخصوص اولان خسته لییی و، او خسته لییه باغلی تؤووشنه لری ده، یالنیز قادین یازیچی لاری آرتیق آچا بیلرلر و. بونو دا رقیه خانیم کبیری دریندن آچمیشلار.
    بیزیم میللی وارلیغیمیزدا، خصوصا ادبی چالیشمالاردا ، رقیه خانیم کبیری کیمی یازیچی لار، زامانا اویغون اولان یئنی ادبیاتیمیزین زنگینلشمه سینه داها آرتیق اثر قویاجاقلار. دیرناق آراسی دئمک اولار کی فارس ادبیاتیندا دا (فروغ)ون چالیشمالاری تأثیرلی اولموشدور. ایندیلیکده شاعرلریمیزدن فریبا خانم تبریزدن و، آیلار خانیم زنگاندان آد اپارماق اولار. مدرن شعر یازان یئنی یئتمه قادین شاعرلریمیز ده، آز دئییل، ببیزیم یئنی ادبیاتیمیزدا بو اؤنملی بیر حرکت دیر.
    کبیری جنابلاریندان بیر سووالا جاواب قایتارماسینی رجا ائدیرم:
    بیزیم ادبیاتیمیزدا اورتاق دیل وارسا منه تانیتدیرسینلار اؤزوم اؤیرنمک اوچون چوخ اؤنملی دیر، چونکو (وووی ۱)ده تبریز شیوه سی آرتیقجا گؤرونور. آیا اؤزلری بیله بیله بو شیوه نی سئچمیش و یا تبریز شیوه سینی بیر اورتاق دیل بیلیرلر؟
    من قاراپاپاق ائلیندن اولاراق سولدوزدا یاشاییرام، آیا یازیلاریمی قاراپاپاق آغزی له یازمالییام یاداکی، تبریز شیوه سی له؟ بونلاردان علاوه بیر اورتاق دیل وارسا او دیلی و او دیلده یازیلمیش بیر اثری منه تانیتدیرسالار چوخ گؤزل اولار.

    سایغی لارلا: سولدوزلو سورگون محرۤم پریزاد

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

وو وی۱ / رقیه کبیری

رقیه کبیری
www.ishiq.net

آذربایجان ادبیات و اینجه‌صنعت سایتی

وو وی۱ / رقیه کبیری

رقیه کبیری
www.ishiq.net

آذربایجان ادبیات و اینجه‌صنعت سایتی

وو وی۱ / رقیه کبیری

رقیه کبیری
www.ishiq.net

آذربایجان ادبیات و اینجه‌صنعت سایتی