زنگانین قوجامان شاعری «عباس بابایی(سؤیلر)» دونیاسینی ده‌ییشدی
الیمیزه چاتان خبره اساسن، چوخ تاسفله زنگانین «سؤیلر» تخلصلی ده‌یرلی و گؤرکملی شاعری اوستاد «عباس بابایی» ۷۱ یاشیندا اردیبهشت آیی‌نین ۲۷ینجی گونو دونیاسینی ده‌ییشمیشدیر.
«عباس بابایی» ۱۳۲۳جو ایل زنگاندا دونیایا گلمیش، ۱۳۴۴ینجی ایلدن شعر یازماغا باشلامیشدیر. اونون فارسجا شعرلری تهراندا یاییلان فردوسی، روشنفکر، چاپار، صدا و… س کیمی درگیلرده یاییلمیشدیر. مرحوم حسین منزوی و عمران صلاحی اونون یاخین یولداشلاریندان اولوب و اونون یارادیجیلیغی‌نین اینکشاف و یاییلماسیندا دانیلماز رول‌لاری اولموشدور. ۱۳۵۰ینجی ایل ایکی مین جیلدده “چراغ و چاه” آدیندا بیر شعر مجموعه‌سی چاپ اولور. کیتاب چاپدان چیخاندان سونرا “نگارش اداره‌سی” یاییلماسینا اجازه وئرمه‌ییب، دایاندیریلیر و سونرا کارتن‌سازی کارخاناسی‌نین ده‌ییرمانیندا دارتیلیر.
عباس بابایی ۱۳۶۹ ایلدن زنگاندا «ایشیق» درنه‌یینده فعالجاسینا اشتراک ائدیر و تورکجه شعر یازماغا اوز چئویریر. اونون شعرلری امید زنجان، بهار زنجان، پیک آذر و بایرام درگیلرینی ایشیقلاندیرمیشدیر. مرحوم شاعریمیزدن ایکی تورکجه کیتاب: “گلیرم” و “آییق گئجه‌لر” آدلاریندا و بیر جیلد فارسیجا “رد خون بر سنگ” آدی‌لا شعر مجموعه‌سی ایشیق اوزو گؤرموشدور و دؤردونجو کیتابی چاپا حاضیرلانیبدیر.
اوستاد عباس بابایی‌نین وداع و تورپاغا تاپشیرما مراسیمی اردیبهشت آیی‌نین ۲۸ دوشنبه گونونون آخشام اوستو ساعات ۱۶دا زنجانین «یوخاری مزار» قبریستانلیغیندا کئچیریله‌جکدیر.
بیز «ایشیق» – آذربایجان ادبیات و اینجه صنعت سایتی‌نین امکداشلاری، ادبی جمعیتیمیزه اوز وئره‌ن بو ایتگینی بابایی عائیله‌سینه، شاعرین دوست و تانیشلارینا و زنجان ادبی مدنی درنک‌لرینه باش ساغلیغی وئریر و اوستاد بابایی‌نین خاطیره‌سینی عزیزله‌ییریک.
«ایشیق» – آذربایجان ادبیات و اینجه صنعت سایتی
۲۷ اردیبهشت ۱۳۹۴
یک پاسخ
سلام. حئیف لر اولسون. آدام اصلاً قبول ائده بیلمیر عباس بابایی ایله بایرامدان قاباق دانیشیب، یئنی کیتابی نین چاپی حاققیندا مصلحت لشیب، ایشه باشلاماغیمیزا رغماً، بو بؤیوک کیشی نی الدن وئره ک. اوستادین یوللادیغی کیتاب بوتونلوکله منیم یانیمدا امانتدیر. عائله سی منله تماس توتسالار، کیتابی خدمتلرینه تقدیم ائده رم. بیز بئله قرارا گلمیشدیک کی کیتابی حاضیرلاییب، چاپ ائتدیره ک. ایندی کی اوستاد آرامیزدان کؤچوبدور، یقین کی کیتابین چاپ اولوب- اولماماسی حاققیندا، اونو عائیله سی تصمیم توتمالی دیر.
بوتون زنگانلی دوستلارا اوستادان کؤچمه سینی تسلیت دئییرم. من بو بؤیوک شاعیریمیزن بیر چوخ اثرلرینی تورکجه همشهرینی چیخاردان گونلرده، زنگان صحیفه لرینده چاپ ائتدیردیم.