چئویرن: ایشیق
ترجمه: ایشیق
ایشیق

eloglu
او گئجه‌
صدیار وظیفه(ائل اوغلو)

یئنه‌ خاطره‌لر آپاریر منی‌
ایستکلر آرزیلار گولله‌نن‌ یئره‌.
بیرگون‌ دوداغیمدا شیرین‌ گولوشلر
بیرگون‌ گؤزیاشلاریم‌ سئلله‌نن‌ یئره‌.

گزیرم‌! عؤمرومون‌ گئجه‌لرینی‌
هیجان‌ ایچنیده‌، گومان‌ ایچینده.‌
گزیرم‌ عؤمرون‌ کوچه‌لرینی‌
یئنه‌ چن‌ ایچینده‌، دومان‌ ایچینده‌.

لحظه‌وار، وئرمه‌رم‌ عصیرلره‌ من‌
گئجه‌وار، وئرمه‌رم‌ عؤمورلره‌من‌.

آپاریر آردی‌لا او گئجه‌ منی‌
او گئجه‌ سود یولو آغ‌ آپپاق‌ایدی‌
اوگئجه‌ سودیولو، سود یوخوسو تک‌
یورغون‌ فیکریمیزه‌ آغ‌ یاتاق‌ ایدی‌

او گئجه‌ ایسلاندی‌ باخیشلاریمیز
او گئجه‌ اودلاندی‌ باخیشلاریمیز.

اوگئجه‌ موغانین‌ سئیرینه‌ چیخدیق‌
اوگئجه‌ نه ‌اوزاق‌ بیر سفر ایدی.‌
او گئجه‌ دوستلوغون‌ الینی‌ سیخدیق‌
او گئجه‌ یاشاماق‌ بیر هنر ایدی‌.

او گئجه‌ آنالار یولدو ساچینی‌
یولدوق‌ گؤزوموزدن‌ مورگولری‌ بیز.
او گئجه‌ آغلادیق‌ آنالارا بیز
بیزه‌ غالب‌ گلدی‌ وطن‌ عشقیمیز.

سوردوک‌ عومروموزو یوخوسوز،گولوم‌
نه ‌یاتدیق‌ عؤمورده‌، نه‌ یوخو گؤردوک‌؟
آرخادا آز عؤمور، قارشیدا اؤلوم‌
حیاتدا نه‌ گؤردوک‌، بیز قورخو گؤردوک‌.

* * *

یوخو گلمیر گؤزومه‌
اوزون‌ ایللردیر منیم‌؛
هانی‌ کؤرپه‌لیکده‌کی‌،
رنگلری‌ افیلله‌نن‌
یاشیل‌ یوخو چمنیم؟‌
ایتدیکجه‌ کورپه‌لیگم‌
ایتدی‌ یوخو چلنگیم‌؛
هانی‌ سود امرلیکده‌
گؤزلریمدن‌ سوزولن‌
منیم‌ سود رنگلی‌ یوخوم‌؟
هانی‌ جوانلیغیمدا
بیر گؤزه‌لین‌ تئلینده‌
ایلیشیب‌ قالان‌ یوخوم‌؟
هانی‌ جوانلیغیمدا
بیر بولاغین‌ باشیندا
دوم‌ دورو سولاریله‌
گوموش‌ سهنگه‌ دولوب،‌
ییرغالانیب‌،چالخانیب‌
آخیب‌ دورولان‌ یوخوم‌؟
هانی‌ جوانلیغیمدا
آدینی‌ بیلمه‌ دیگیم‌
بیر گؤزه‌لین‌ تئلینده‌
ایلیشیب‌ قالان‌ یوخوم‌؟
او یئللره‌ قاریشیب‌
او تئللره‌ قاریشیب‌
تئلله‌نیب‌ داراق‌ ـ داراق‌
منیم‌ دارانان‌ یوخوم‌؟
گؤزلریمدن‌ اود آلیب‌
آلیشیب‌ یانان‌ یوخوم‌؟

* * *

بیرگون‌ یوخوم‌ سئوگیمین‌ داراغینا ایلیشدی؛‌
آزادلیعین‌ آل‌-الوان‌ بایراغینا ایلیشدی‌؛
بیرگون‌ قورتولوشلاردا
منیم‌ بؤیوک‌ خالقیمین‌
زحمته‌، حریته‌
ماهنیلاری‌ جار اولان‌ دوداغینا ایلیشدی؛‌

منیم‌ او کؤیره‌ک‌ یوخوم‌
فیکریمه‌ اؤرپک‌ یوخوم‌
داها گلمیر گؤزومه‌
من‌ اونا حسرتم‌سه‌
اودا، حسرت‌ گؤزومه‌.

بیرگون‌ ایلشیدی‌ یوخوم‌
یوردومون‌ یازیق‌ ـ یازیق‌ یئلله‌نن‌ بایراغینا؛
بیرگون‌، قارانلیقلاردا
قارانلیقلار شهرینده‌
گؤزگو گؤسترمز یئرده‌
بیر بیلیجی‌ کیشی‌نین‌
گؤزلریندن‌ یاغ‌ آلمیش‌
اوره‌گیندن‌ اود آلمیش‌
فیکیرلره‌ نور وئره‌ن‌
چیراغینا ایلیشدی‌.
بیر گونده‌ چکمه‌لرله‌
سینه‌م‌ اوسته‌ گزه‌نین‌
تاپدالاییب‌ یوخومو،
خیسین‌ – خیسین‌ ازه‌نین‌
ایزلری‌ اؤلوم‌ یوللو
آیاغینا ایلیشدی‌.

بعضاً ائله‌ اولوب‌کی‌،
یوخوم‌، اوخ‌ اولوب‌ منه‌
باتیبدیر گؤزلریمه‌
داها او چاغدان‌ بری‌؛
فیکریم‌ گزیر گؤیلری‌
فیکریم‌ سوزور گؤیلری‌
نه‌گؤیدن‌ علاج‌گلیر
نه‌ علاج‌سیز یئر دینیر
یوخوم‌ سرین‌ سولارتک‌
دئشیلیر گؤزه‌ ـ گوزه‌
گؤزومدن‌ سوزه‌ ـ سوزه.‌

بعلی‌ منیم‌ عزیزیم‌
یوخوگلمیر گؤزومه‌
«اؤزوم‌ حسرت‌ اؤزومه‌»
نئجه‌ سرحد قویوم‌ من‌
گئجه‌مه‌، گوندوزومه؟‌

هانی‌ او دینج‌ آخشاملار
هانی‌ سئودالی‌ گئجه‌
یانیب‌ اریین‌ شاملار
او کؤچری‌ قوشلارین‌
ایلهامینا نه‌ اولدو
یازین‌ گلمه‌دیگیندن‌
دورنالار اونودولدو؟

* * *

منه‌ او گئجه‌نین‌ عومرونو وئرین‌
وئریم‌ عؤمور بویو گوندوزلریمی.‌
یوخوم‌ یارالانسا، گؤزومه‌ سرین‌
ائله‌ اوگئجه‌ می‌، دیل‌ ازبریمی.

‌او گئجه‌ قاییتدیق‌ خاطره‌لره‌
او گئجه‌ بیز درین‌ دره‌لر ائندیک.‌
بیز آیاق‌ یالیندیق‌ آرزیلار آتلی‌
اوگئجه‌ آی‌آتین‌ بئلینه‌ میندیک.‌

یاندی‌ گؤزلریمده‌ اوگئجه‌م‌ منیم‌
اولدو نفسیمده‌ توستو عزیزیم‌.
آه‌ منیم‌ عؤمرومو، منیم‌ گونومو
قارانلیق‌ گئجه‌لر کسدی‌ عزیزیم‌!

اولدوزلو گئجه‌لر نئج‌ اولدو گولوم‌
هانی‌ گئجه‌لرین‌ آیدینلیقی‌ بس؟‌
یوخسا قورخودوبلار سودو قاچیبدیر
هانی ‌اولدوزلاردان‌ سوزولن‌ هوس؟‌

بوتون‌ اولدوزلارلا پیچیلداشاردیق‌
باشدان‌ آپاراردی‌ رؤیالار بیزی.‌
بیلیرم‌ او گئجه‌ قاییدیب‌ گلسه‌
بیز اونو یالاریق‌ او یالار بیزی.

‌بو منم‌، سوکوتون‌ هارایلاریندا
سینمیشام‌ «قره‌ باغ‌ شکسته‌سی‌» تک‌.
بو یانیق‌ گئجه‌نی‌ بو یانیق‌ منی‌
مندن‌ آلان‌ تورپاق‌کیمه‌ وئره‌جک‌

یوخسا اونودوبدور او یاشیل‌ چؤللر
او شئح‌لی‌ چمنلر قایالار بیزی‌؟!
بیرده‌ قوجاغینا آتیلساق‌ بلکه‌،
او چوپور قایالار،قایالار بیزی‌؟!

منه‌ او گئجه‌نی‌ قایتاران‌ اولسا
اوسته‌لیک‌ وئره‌رم‌ عؤمرومو وارسا.

اوگئجه‌ آرزیلار غبطه‌ لندیلر
بیزیم‌ عشقمیزه‌، ایراده‌‌میزه‌.
او گئجه‌ کاینات‌ یاتیبدیر دئیه‌
دونیانی‌ بیرگئجه‌ وئردیلر بیزه‌.

 

 

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

او گئجه‌ / صدیار وظیفه(ائل اوغلو)

ایشیق
www.ishiq.net

آذربایجان ادبیات و اینجه‌صنعت سایتی

او گئجه‌ / صدیار وظیفه(ائل اوغلو)

ایشیق
www.ishiq.net

آذربایجان ادبیات و اینجه‌صنعت سایتی

او گئجه‌ / صدیار وظیفه(ائل اوغلو)

ایشیق
www.ishiq.net

آذربایجان ادبیات و اینجه‌صنعت سایتی