اگر تانریم بیرجه آنلیق، منیم کؤهنه بیر قولچاق اولدوغومو اونودوب، منه بیر پارچا حیات باغیشلاسایدی؛ احتمال کی، اوندا بوتون عاغلیما گلن‌لری سؤیله‌مزدیم. بلکه سؤیله‌دیک‌لریم حاقدا دریندن دوشونردیم. منجه هر شئین دیری، اونا وئریلن ظاهری دیردن یوخ، داشیدیغی معنادان آسیلی‌دیر. اوندا آز یاتاردیم، گونومون چوخونو رؤیادا کئچیره‌ردیم. اونسوزدا گؤزلریمیزی قاپادیغیمیز هر بیر دقیقه‌ده ۶۰ ثانیه ایشیق ایتیریریک. هامی دایانارکن من یول گئدردیم. هامی یاتارکن اویاق قالاردیم. هامی دانیشارکن، من قولاق آساردیم. شوکولات‌لی دوندورما یئمکدن نه حظ کی آلمازدیم!
اگر تانریم منه بیر پارچا حیات باغیشلاسایدی، چوخ ساده گئینیب گونشی قارشیلایاردیم. گؤزلریمی گونشین اوزونه دیکه- دیکه جیسمیم‌له برابر روحومودا سویوناردیم.
تانریم! اوندا، سینه‌مده اوره‌ییم دؤیونرکن، نیفرتیمی بوز اوزه‌رینه یازار و گؤنشین دوغماسینی گؤزله‌ییردیم … اوندا من اولدوزلارا «ونگوگ»۱ رؤیالی، «بئندیت»۲ نفس‌لی شئعیرلریمی رسم ائدردیم و آیا «سیرات»-ین۳ شیرین سسی ایله سئوگی نغمه‌لری باغیشلایاردیم. گؤزیاش‌لاریم‌لا قیزیل گؤل‌لری سوواراردیم، تیکان‌لارینین آجیسی، لئچک‌لری‌نین شیرین- شیرین اؤپوشو جانیما سینسین- دئیه.
تانریم! اگر بیرجه پارچا عؤمروم اولسایدی، سئودییم اینسان‌لارا: سیزی سئویرم دئمه‌دن گونلریمی کئچیرمزدیم، بوتون کیشی‌لر و قادینلاری اؤز سئوگیمه ایناندیراردیم. سئوگییه ساریلیب سئوگی قوینوندا یاشایاردیم. اینسان‌لارا گؤستره‌ردیم کی، قوجالیق‌دا روحدان دوشوب سئوه بیلمه‌یه‌جگ‌لرینه ایناندیقلاری اوچون یانیلیرلار. اونلار بیلمیرلر کی، قوجالیق اونلارین سئوه بیلمه‌دیک‌لری آنلاردا اونلاری حاقلایا بیلر. کؤرپه‌لره ایکی‌جه قاناد وئریب و بوراخاردیم کی، اوچوشو اؤزلری اؤیرنسینلر. قوجالاری ایسه باشا سالاردیم کی، اؤلوم قوجالیقلا یوخ، اونودقان‌لیقلا گلر.
آخ اینسان‌لار، اینسان‌لار! سیزلردن نه‌لر، نه‌لر کی، اؤیر‌نمه‌میشم. یاخشی بیلیرم کی هامی زیروه‌یه دوغرو جان آتـیر، بونو بیلمه‌دن کی، اوغور اونلارین اللرینده کی اؤلچولردن آسیلی‌دیر. یاخشی بیلیرم کؤرپه، او تومبول و یوموشاق اووجوندا ایلک دفعه آتاسی‌نین بارماغینی سیخارکن، آتانی عؤمورلوک تورا سالیر. اینانمیشام کی، اینسان او زامان باشقاسینا اوجادان باخماغا حاقلی‌دیر کی، او آدامی اؤز آیاق‌لاری اوسته دایانماغا، یوخارییا دوغرو قالخماغا ایناندیرا بیلسین.
من سیزلردن چوخ شئی اؤیر‌نمیشم. نه یازیق کی، آرتـیق، اونلاردان یارارلانا بیلمه‌یه‌جه‌یم. چونکی، اونلاری چمدانـیما یـیغارکن اؤلوم‌ده منی حاق‌لایاجاق!
2 پاسخ
سلام. بو داستان دا «بئندیت» و «سیرات» کلمه لری ایشله نیب.اولار اونلارا مورد بیراز توضیح وئررسیز کی نمنه آدی دیلار؟
ممنون
حسن ایلدیریم، اللرین وار اولسون.