(۱)
اؤزون کیمی
مهربان و سئویملی‌دیر خاطیرن.
نییه کی
یالنیزلیق چوبانی‌نین اوجاغ عطری کیمی
هر گون
اوره‌ییمین بوش دوزنلیگینده دولاشیر
و تنها قویمور منی.
(۲)
سورگون ائدیبلر ایچیمه قارانلیقی؛
آنجاق من،
تانری‌نین هر گونو
قورتوم – قورتوم چکیرم باشیما گونشی؛
قارانلیق کئچه‌جک
نییه کی
تانری دا سئومیر اونو.
(۳)
او گون کی
آددیملارینین موسیقیسی
اوره‌ییمین کوچه‌سینده دولاشا
قاچاجاغام
آغری‌نین و یورغونلوغون الیندن…
قاچاجاغام سنین باشماقلارینلا…
سنین ایاقلارینلا…
سنینله…
(۴)
ساچ تئل‌لری یولدادیرلار
گئج یا تئز گله‌جکدیلر؛
داریخما
منیم کیچیک آینام!
(۵)
“داغ داغا چاتماز …” سؤزونو ائشیدنده
قه‌هر بوغور اؤزومو،
قورخورام
قورخورام
اؤز قوجاقلاریندا قووشدورالار داغلاری بیربیرینه
گون‌لر و آی‌لار،
آنجاق
سنینله من
بیر داغین آرخاسیندا خاطیره‌یه چئوریلک.
(۶)
گلمه‌سن
کدردن یاغاجاغام
گلسن
سئوینجدن…
گل کی
گؤیلرجه گؤی قورشاغی توخویوم سنه.
(۷)
آیلارجا یورغونلوق و دیدرگین‌لیکدن سونرا
آچیرام مکتب چانتامین آغزینی
میدادیم، قلمیم
بیر آز خیردا پول
گونده‌لیک یادداشت دفتریم…
ائو کلیدی له
یوز قیسا قیسا ناغیل کتابی‌نین آراسیندا
سهراب و فروغین شکیلی…
سانکی
بیر عطیر شوشه‌سی سینیبدیر،
چانتام
حیات عطری وئریر.
(۸)
یورغونلوق گونلری…
دیدرگین‌لیک گونلری…
گؤز ایشله‌دیکجه
ایچیمده دالغالانیر آجی بیر تنهالیق،
من
اورمو گؤلویم!
(۹)
چایین گوزگوسوندن اوزومه گولن
اوشاقلیق خیالیملا
شکیل چکدیرمک ایسته‌ییرم.
دبرمه‌دن
سو آپاریر شکلیمی!
چای آشاغی قاچیرام
ماوی لئچک اوجا بوی بیر قیز
حیرتله منه باخیر.
اوشاقلیغیمی سو آپاریب اؤزویله.
(۱۰)
بوگون
رقص ائتدی منیم اوچون آنام
گؤزه‌ل و مهربانجاسینا!
و منی سئویندیرمک اوچون
بوتون باجاریغینی ایشلتدی
بوغازیندا گیزلنمیش قه‌هرله
و گیزلنمه‌یه یئر تاپمایان گؤز یاشی‌لا.
یاشیل گؤزلری
شیمال بؤلگه‌سینین زینه یاغیشیندا ایشیلدایان-
بیر مئشه گؤرونوشونه چئوریلدی!
یک پاسخ
“کولگه”(رحمتلیک سایه مقدسی یه)
یول لاردان یورغونام،
گئجه دن بئزار،
کؤنلومه داغلاری،
کیم بئله سالدی.؟
یئلیمیش؟،
یا گؤزون، دویغولو یاشی؟
گونشین گؤزونن،
کیم سنی آلدی.؟
گئجه نین پارلاغی،
یئنی اولدوزوم
دیلیمده دونیاجا،
بیر هارای واردی.
سحرلر آچیلسا
داغیلسا گئجه
یئنی دن کؤنلومده،
بوش یئرین واردی.