من گله‌جه‌یین یازیسی‌یام
مسعود آذر
“بیر مای‌ین عشقینه”
یارانمیش کایینات بیر ماییس‌لا برابر.
ای انسان اوغلو دوشون منی،
اینان منه.
من حیاتین شیرینی، آجیسی‌یام،
من گله‌جه‌یین یازیسی‌یام.
ابدیت زیروه‌لرینین یولچوسو منم،
چیخ منیمله سئیره بو جهانی
گل گزه‌ک قاریش با قاریش دونیانی.
آیاقلاشسان منیمله بو زیروه‌لره دوغرو
سئوینه‌رم
یوخ، تؤشویوب قایدیرسان،
سینمارام سندن
اینان کیسمه‌دن اوموب
کیمسه‌نی قینامارام.
بو منیم یازیم‌دیر، بو منیم قده‌ریم!
من وارام، یقین یاشاییر حیات،
دولانیر کائینات.
دونوب سوساجاق بوتون وارلیق
دایانارسا اوره‌ییم،
دایاناجاق فلکین چرخی،
یوخ اولارسام
سؤنه‌جک حیاتین اوجاغی.
ای انسان؛
منیم سسیم، حیاتین شیرین نغمه‌سی،
منیم سؤزیم، شعرین آخارتیسی
سئوگی ماهنیسی.
منیم سئوگیم؛ داغدیر، مئشه‌دیر، دنیز،
اولدوزلاری سانا گلمه‌ین گئجه‌دیر،
سماسی ماوی گؤل.
سرویلر شه‌هری‌دیر، سئوگیمین شه‌هری.
گل پایلاشاق؛ سئوینجیمیزی، کدریمیزی.
بیرگه یئییک چؤره‌ییمیزی. بیرلیکده ایچک شرابیمیزی،
ایکییه بؤلک بهشتدن آتیلان قیزیل آلمانی دا.
ای انسان اوغلو دوشون منی
اینان منه،
حیاتین شیرینی، آجیسی منم.
گله‌جه‌یین یازیسی منم.
اردیبهشت ۹۴
