(۱)
گؤزلرین
اؤزونده بوغور بولاق‌لاری،
و بوغازین
سیزیلتی‌دان آییریر دومانی.
گئجه کئچمه‌ده‌دیر نازلیم!
چوخداندیر گؤرونور سحر،
و ایتیلیب‌دیر قارانلیق.
آددیملاری‌نین سسی نه قده‌رده آستا اولسا
کار ائله‌ییر زامانین قولاقلارینی.
(۲)
گؤزلریمی اوولاییر یوخو،
و اللریم
کتاب آراسیندا ایتیریر یولونو؛
من
اوره‌ییمین درینلیگیندن ائشیدیرم
سن اوخویان سئودیگیم ماهنینی؛
و رؤیالاریم
آیاق توتوب، قالخیر زامان پیلله‌لریندن یوخاری؛
من
هانکی سازی چالاجاغام بو گئجه
میضرابلی یا میضرابسیز؟!
(۳)
هر نه اوخویورام
دیلیم توتولور!
نه‌ده سونسوزدور
بو یاساق قایدا!
کاش بوندان اؤنجه
توتولایدی دیلیم!
(۴)
دؤرد فصیلی کورومک گره‌ک
حقی باطیلدن آییرماق اوچون.
کؤکسوزدور دووارلار،
و بولاشیقدیر جهالته
یارالی، دردلی قایدالار.
نازلیم!
گونشین آردینجا
بیر ائلچی گؤندرمه‌لی‌ییک.
سیلمه‌لی‌ییک کؤهنه‌لیگی
و جیلیدله‌مه‌لی‌ییک یئنی‌دن
باهار نارینج چیچک‌لریله ائوی.
(۵)
قولاق‌لار زنگ‌دن آسیلی
گؤزلر گؤزتچی؛
نه هنگامه‌دیر سس‌سیزلیک خیالیندا.!!
سوراغینا گلدیکده
بیر گلین اولور گئجه‌نین بوشلوغو؛
و کؤلگه‌لر
نه‌ده آمانسیزجاسینا اویناییرلار!
بو وارلیق شامی‌نین آلتیندان
سحر آچیلدیقدا،
سس‌سیزلیک یئتکینله‌شه‌جک
زنگ‌لرین سسیندن.
