اولاسی دئییل / ناصر داوران

n-davaran1
اولاسی دئییل
ناصر داوران

یالان سؤزدور گلمییه‌جه‌یین
اوتوز ایل بیرگه گئتدیییمیز یول‌لار،
قاباغیندا شکیل چکدیردیییمیز
آغ چیچک‌لی بوداق‌لار،
ایش‌سیز گونلریمیزده
سیرغالارینا سیغینیب
دویدوغوموز اوشاق سئوینجی
اونودولاسی‌دیر می؟
من گوزگوده
هله ده سنی گؤرورم
غبارلی به‌نیزیمی‌سئیر ائده‌رک
پوزولان دئییل
نفس‌لریمیزه کؤلگه سالان بو اورتاق‌لیق
دؤنمه‌لی‌سن یقین.
پولیس‌لی دویغولاریمیزدا
قازاندیغیمیز قورخولاری
نئجه بؤلوشدوره‌جه‌ییک؟
کیمه دوشه‌جک
چکدیییمیز زیندان‌لارین
گؤروش گون‌لری؟
کیتاب‌لاریمیزی نئیله‌مه‌لی‌ییک؟
شعریمی‌نه؟
شعریمه باغیشلادیغین بویالاری
سیله‌بیله‌جک‌می‌سن؟
توتاق کی قاب ـ قاشیق‌لاری ایکی بؤلدوک
ایکی خالچامیز وار
بیریسی سنین اولدو
بیریسی منیم
باشقا شئی‌لر ده هکذا
الده ائده بیلمه‌دیییمیز ایستک‌لریمیز
کیمین اولسون؟
گوناه‌لاریمیزی بؤل گؤره‌ک
بؤله بیلسه‌یدیک کی
یئر کوره‌سی مداریندان چیخمازدی.

Check Also

بیر اوووج شیفره‌دن عیبارتم/ افراسیاب نورالهی

بیر اوووج شیفره‌دن عیبارتم افراسیاب نورالهی بو منیم بانکا کارتیمین شیفره‌سی…… بو یاناجاق کارتیمین …… ...

One comment

  1. اوستاد داوران شعیرینیزدن داها کؤورلدیم
    منی آپاردی قارانچیل خاطیره لریمه…
    دویغونو اؤپورم و…

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *