سنسیزلیک‌لر(۹)
مجتبی نهانی
(۱)
من، سنی سس‌سیزه آلمیشام
بدنیم تیتره‌ییر هر چالدیغیندا
آمان وئرمیر یادین
قابار چالیر یالقیزلیق
گؤز یورولور-
یوللارینی گؤزلمکدن
قارا باسیر اوره‌ییمه
نه زامان بیته‌جک بو وورغونلوق؟!
(۲)
سونسوز بیر فیلمه بنزه‌ییر-
اللرینین قاچیشی اللریمدن
بوش-بوش گَزدیییم دار کوچه‌لرده
بورخوق-بورخوق،
توز آلمیش خاطیره لرله
قاییتمادیغیم او گونلره
اود توتموش بیر آدامین سرگوزشتی‌له-
آنجاق کئچمک اولوب، چاره منه.
(۳)
گونشین دوغدوغو یئردن-
سنه باخیرام
بیتن گونو-
حسرتیمه باغلاییرام
سؤنوک آرزولاریمین ایشیغیسان!
(۴)
بولودلار
رهلی-بزه‌لی
یاناقلارینا دوشن-
آلمالارا بنزه‌ییرلر
سئودایا سوسوز،
دوداقلارا یاغان-
یاغیشلار کیمی.
(۵)
یوخدور سندن اؤته-
بیر باخیشیم
گؤزوم گؤرمور-
آی ایشیغین
باشیم دؤنمور-
یول گئدیشینه
تکجه وارام،
هئچ اولمایانلاردا.
