ایندی کی گئدیرسن…/ علی جوادپور

ali javad
ایندی کی گئدیرسن…
علی جوادپور

ایندیکی کوچورسن نه یین وار آپار
قالماسین یوردوندا اوجاق داشین‌دا!
بیر ده کی آدینی کؤنلومدن قوپار
قوی ساکیت یاشاییم بو گنج یاشیمدا!

بیر قاتار دورنا تک کئچ باشیم اوستن
او قده‌ر آرالان گؤزلریمدن ایت!
نه سنین آرخانجا سورونه‌رم من
نه ده کی قوشلارلا سن داها قاییت!

داشلارین اوستوندن یئری! قالماسین-
گئتدیگین یوللاردا آیاق ایزلری!
دئدیگین ناغیلین بیری قالماسین
اؤزونله ییغ آپار یالان سؤزلری!

من سنین آرخانجا داش آتماسام‌دا
آرخایین اول سودا آتمایاجاغام!
تله‌سیک کؤچونو یوباتماسام‌دا
داها یوکونوده چاتمایاجاغام!

ایندی کی گئدیرسن نه‌یین وار آپار
قالماسین یوردوندا اوجاق داشین‌دا!
بیرده کی آدینی کؤنلومدن قوپار
قوی ساکیت یاشاییم بو گنج یاشیمدا…!

Check Also

قاییتماز اولدو/ بهروز دولت‌آبادی(چای اوغلو)

قاییتماز اولدو بهروز دولت‌آبادی(چای اوغلو) چوخ صفالی، چالیشقان، آزادلیق وورغونو ده‌یرلی دوستوم «سیفی»یه اتحاف. نئجه ...

۲ comments

  1. افراسياب نورالهي

    چوخ گؤزه ل … اوره یینه ساغلیق

  2. چوخ ساغ اول معللیم. لذت آلدیم

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *